¹ Erhi Efrahimu akabire alyaderha, cali cobà: Akagi yimuka omu Israeli. Cikwone acigomesa kuli Bali, na anafa. ² Nantyo agendekera agoma, banaciyayuse n'enfaranga z'enshushano nyayuse, nshushano z'obutuzi bwabo; byoshi yali mikolo ya batuzi. Baderha oku bibayerekire: mpulyo ngasi bali barherekera banyunyugurha amanina. ³ Byobirhumire bayishiyorha nka lwikungu lwa muceracera, nka lumè lwakala duba, nka kabumbu kadwirhwe n'empusi emburhambi ly'ecihwanja, nka mugi gulu gwahuluka ah'idirisha. ⁴ Na nani, ndi Nnamubaho, Nnamahanga wawe, kurhangira omucihugo c'e Misiri. Orhamanyiri bandi na Nnamahanga kundusha, na harhali owindi muciza nka nie. ⁵ Nakumanyiraga omw'irungu, omu idaho lirhayera. ⁶ Baciyigurhize omu malambo gabo; baciyigusa, na emirhima yabo ya mina, byobyarhumire banyibagira. ⁷ Nayishi bayorhera nka ntale; nka ngwi, nyishi muherereza omunjira yage. ⁸ Nayishi barhanali, nka namugunga banyazire abana, nayishi beranga emirhima yabo; Nka ntale nkazi; ba namugunga bayishi ba vungunyula. ⁹ Ebikudwirhire obuhanya, Israeli, bulya wangomire, wagomera owaka kucizize. ¹⁰ Ngahi mwami aligi? Akucizagye omweyi mirhundu! ngahi abazuzi bawe baligi, balya wakagi bwira: Ompe omwami n'abarhwali? ¹¹ Nakuhire omwami omu burhè bwani, nayishi mukulira ye omu budarhi bwani. ¹² Obubi bwa Efrahimu buli bubike, ebyaha byage bihasirwe. ¹³ Omukero gw'oliwaburha gwakujakwo; ali mwana orhagwerhi bwenge, olya, oku gasanzi kakarhesirwe, orharhengaga omu cifuba ca nyoko. ¹⁴ Nayishi mugombola omu buhashe by'olufu, nayishi muciza n'olufu. We lufu, ngahi ebinyolo byawe biri? Nshimu ya lufu, ngahi okushereza kwawe kuli? Cikwone okuciyunjuza kwa hera omu kusinza kwani. ¹⁵ Efrahimu asimire okubà wakuyera omu benewabo, eempusi y'ebushoshokero bw'izuba bayisha, empusi ya Nnamubaho yarhenga omw'irungu, yaishi ganya enshoko zage, eganye emariba gage. Bayishihagula emihako y'ebirugu bw'ecishingo. ¹⁶ Samariya ahanwa, bulya ahemukire Nnamahanga wage. bayishi hirima oku ngorho; abinjikulu bayishi sherera, n'enda za bakabo Bali mazimi za sinwa.