¹ Efrahimu anacilise empusi, akulikire n'empusi y'ebushoshokero bw'izuba; ngasilusiku anayushule obushumi n'obulyalya; ajire n'endagano na Ashuru, na banaheke amavurha e Misiri. ² Nnamubaho ali omu kadali na Yuda naye,na ayishi hana Yakobo oku lugenzi lwage, anamulembule oku bijiro byage. ³ Omunda ya nina Yakobo agwarhwa mwenewabo akashugulu, na omu burhwali bwage, alwisa Nnamahanga. ⁴ Alwisa maahika, anahima, ayama anagali muyinginga. Yakobo amurhimanaga e Beteli, na eyo yo Nnamahanga arhubwizire. ⁵ Nnamubaho ali Nnamahanga was mirhwe; izino lyage ye Nnamubaho. ⁶ Na nawe, galukira Nnamahanga wawe, olange obucesibwa n'obushinganya na olangalire Nnamahanga amango goshi. ⁷ Efrahimu ali murhimbuzi ofumbirhe omu kuboko kwage ebipimo bigalugalu, asima okurhebana. ⁸ Na Efrahimu aderha: omu kuli, ntagalaga, nagwasire obuhirhi; ci malehe ga mukolo gwani, barhakabona bugoma emwani, ntabyo biri bigalu. ⁹ Na nani, ndi Nnamubaho, Nnamahanga wawe,kurhenga omucihugo c'e Misiri; nayishi kulamisa omu mahema, nkoku nsiku z'idinye. ¹⁰ Naderhezize abalebi, nayushula amabonekezi, na kugerer'abalebi nahana emigani. ¹¹ Nka Galadi burhali busha, balibasherera okunali. Balibarherekera empanzi omu Gilgali: n'empero zabo zayishibà nka birholo bya mabuye omu migaku y'amashwa. ¹² Yakobo ayakira omucihugo c'e Aramu, Israeli akolera omukazi, na enyana ly'omukazi alanga obuso. ¹³ Kugrerea omulebi Nnamubaho ayinamula Israeli kurhenga e Misiri, na kugerera omulebi Israeli alangwa. ¹⁴ Efrahimu agayisa Nnamubaho bwenene: Nahamwabo amubulagirakwo omuko ashandazagya, ayishi muhirimizakwo enshinyi zage.