¹ Kwonokwo lusiku, mwami Aswero aha omugoli Esta enyumpa ya Hamani, mushombanyi wa bayahudi; na Mordekai aja embere za mwami, bulya Esta amanyisa mwami obuguma baligwerhe. ² Mwami ahogola olugondo lwage, alihire Hamani, analuha Mordekai; Esta, ahalwage, aheba Mordekai omunyumpa ya Hamani. ³ Kandi Esta aciriderha buhyahya embere za mwami. Acikweba oku magulu gage, alaka, amamuyinginga okulahiza ebijiro bigalugalu by'obubi bwa Hamani, muagagi, n'obuhimi bw'emihigo have oku bayahudi. ⁴ Mwami alambulira Esta akarhi k'amasholo anayimuka anabera ayimanzire embere za mwami. ⁵ Anaderha lero: nkaba mwami abwine bwinja, n'ankaba nyemerirwe embere zage, nkaba bisimisize mwami, nkaba ndi mwinja emalanga gawe, biyandikwe okulahira amandiko ga Hamani, mwene Hamedata, muagagi, na gayandikagwa naye omukulonza okushereza abayahudi bali omu mirhundu yoshi ya mwami. ⁶ Bulya gurhi nakabona obuhanya bwahikira olubaga lwani, na gurhi nakabona obusherere bw'obuko bwani? ⁷ Mwami Aswero abwira omugoli Esta n'omuyahudi Mordekai: lolaga oku nahire Esta enyumpa ya Hamani na anamanisirwe oku murhi bulya analikire okuboko oku bayahudi. ⁸ Yandikagi ebikwanine oku bayahudi nkoku musimire, okw'izino lya mwami, na muhebekw'obunanire n'olugondo lwa mwami;bulya amaruba mayandike okw'izino lya mwami n'okuhebwa kw'obunanire oku lugondo lwa mwami garhaka galulwa. ⁹ Abandisi ba mwami bahamagalwa agomango, olusiku lwa makumi gabirhi na zisharhu lw'omwezi gwa kasharhu, gwoguli mwezi gwa Sivani, na bayandika kushimbana byoshi Mordekai arhegesire, oku bayahudi n'oku bakulu b'emirhwe, abarhegesi n'abarhambo ba mirhundu igana na makumi gabirhi na nda gali kurhangira kurhangira ebuhindi kuhika e Etiopia, ngasi murhundu kushimbana amandiko gabo, na ngasi lubaga kushimbana oluderho lwabo, n'abayahudi kushimbana amandiko gabo na kushimbana oluderho lwabo. ¹⁰ Bayandika okw'izino lya mwami Aswero, na bahebakwo obunanire oku lugondo lwa mwami. Barhuma amaruba oku ba bulibirha Bali ok biterusi n'oku bihesi byaburhagwa omu buso bwa mwami. ¹¹ Kugerera ago maruba, mwami alihire abayahudi, oluhuma omu mirhundu muguma okurhimanana n'okurhesa akalamu kabo, okushereza, oku niga n'oku hererekeza; haguma n'abana babo n' bakabo, ngasi b'omu lubaga bakayishi rhola emiherho okurhabalira abayahudi, n'okuhagula ebirugu byabo. ¹² n'ebyo omu lusiku luguma, omu mirhundu yoshi ya mwami Aswero, olusiku lw'ikumi na kasharhu lwa mwezi gw'ikumi na kabirhi, gwo guli mwezi gwa Adari. ¹³ Agomaruba galigwerhe olwandiko lwaligwasirwe oku yalagazibwa omu ngasi murhundu, n'okumanya embaga zoshi oku abayahudi bacirheganyize Olwolusiku okuciholera abashombanyi babo. ¹⁴ Ba bulibirha, bali oku biterusi n'oku bihesi, bagenda burhalindiriza na dubaduba, kushimbana irhegeko lya mwami. Olwandiko lwa yalagazibwa e Size, murhundu mukulu. ¹⁵ Mordekai arhenga aha bwami, n'omwambalo gw'akanyabwami gwa bule na mweru, n'ishungwe linene lya masholo, na cishuli ca nyuzi ndukula. Omurhundu gw'e size gwa balanjira oku bushagaluke. ¹⁶ Hali obushagaluke, mwishingwe n'irenge omu bayahudi. ¹⁷ Omu ngasi murhundu, ngasihoshi, irhegeko lya mwami lyakagija n'olwandiko, hakagiba omwishingwe oku bayahudi, n'amadinye n'akarama. Na bantu banji omu mbaga z'ecihugo bayoboha abayahudi, bulya ecoba c'abayahudi ca bagwarha.