¹ Oku mwezi gw'ikumi na kabirhi two mwezi gwa Adari, olusiku lw'ikumi na kasharhu, lusiku irhegeko n'olwandiko lwa mwami lyaligwasirwe lijirikane, na lyo abashombanyi n'abayahudi bali langalire oku barhegeka, byahinduka kundikundi, n'abayahudi barhegeka abashombanyi babo. ² Abayahudi bacigusha omu mirundu yabo omu bwami bwoshi bwa mwami Aswero, okuheba okuboko oku ngasiboshi bali balongize obuhezi; na ntaye wasimisire, bulya ecoba cabo cagwarha embaga zoshi. ³ N'abarhambo boshi b'emirhundu, abarhegesi b'emirhwe, abarhegesi, abakanani na mwami, barhabaza abayahudi enyanya z'ecoba baligwerhekwo Mordekai. ⁴ Bulya Mordekai ali wa burhwali omu nyumpa ya mwami, irenge lyage lyayalagala omu mirhundu yoshi, bulya ajaba n'oburhwali kulusha. ⁵ Abayahudi bashurha oku bwoji bw'engorho abashombanyi babo boshi, babaniga n'oku baherekeza, babajira nkoku balonzize abali bagayire. ⁶ Omu Size, murhundu mukulu, abayahudi bayirha n'oku hererekeza bantu magana garhanu, ⁷ bana niga Parshandata, Dalfoni, Aspata, ⁸ Porata, Adalia,Aridata, ⁹ Parmashta, Arizai, Aridai, na Vayezata, ¹⁰ bana ikumi ba Hamani, mwene Hamedata, mushombanyi wa bayahudi. Cikwone barhajiraga buhaguzi. ¹¹ Olwolusiku abanizirwe omu Size, murhundu mukulu, bamanyisibwa mwami. ¹² Na mwami abwira omugoli Esta: abayahudi bayosire n'oku hererekeza omu Size, murhundu mukulu, balume magana garhanu na bana ikumi ba Hamani. Bici ohunyire kandi. wabijirirwa. Bindi bici ocihunyire? Wabihabwa. ¹³ Esta ashuza: nkaba bisimisize mwami, abayahudi bali e Size bayemererwe okuciri jirantyo irhondo kushimbana irhegeko ly'ene, na bamanika oku mirhi abana ikumi ba Hamani. ¹⁴ Na mwami arhegeka oku bijirwentyo. Olwandiko lwa yalagazibwa omu Size. Bamanika abana ikumi ba Hamani; ¹⁵ n'abayahudi bali e Size bacigusha buhyahya olusiku lw'ikumi na zini lw'omwezi gwa Adari na bayirha omu size, murhundu mukulu bantu magana gasharhu. Cikwone barhahagulaga. ¹⁶ Abandi bayahudi bali oku mirhundu ya mwami bacigusha n'okuhalira akalamo kabo, bacirhamusa erhi bacirhesa oku bashombanyi babo, na bayirha bihumbi makumi galinda na birhanu oku bali bagayire. Cikwone barha hagulaga. ¹⁷ Ebyo byahika olusiku lw'kumi na zisharhu z'omwezi gwa Adari. Abayahudi barhamuka olw'ikumi na zini, na bajira lusiku luguma lwa karama na mwishingwe. ¹⁸ Abali e Size, bacigusha olw'ikumi na zisharhu n'ikumi na zini, barhamuka olw'ikumi na zirhanu, na balujira lusiku lwa karama na mwishingwe. ¹⁹ Byobirhuma abayahudi b'ebulambo, balama omu mirhundu erhalikwo lukuta, bajira olusi lw'ikumi na zini lw'omwezi gwa Adari lusiku lwa mwishingwe, karama n'idinye, lwo barhumirana oluhembo ngasi muguma oku wabo. ²⁰ Mordekai ayandik'ebyo, anarhumira abayahudi boshi amaruba bali omu mirhundu yoshi ya mwami Aswero, hofi erhi hali. ²¹ Anarhegeka oku bakacishinga ngasi lusiku lw'ikumi na zini n'ikumi na zirhanu z'omwezi gwa Adari ²² nkansiku bahabagwa oluhuma n'okucirhesa oku bashombanyi babo, okucishingira omwezi oburhe bwabo gwahindukaga mwishingwe, n'emishibo yabo kaba karama, n'okujira olwo lusiku lusiku lw'idinye na lwa mwishingwe lwo bacirhumira omuhembo ngasi muguma oku wabo n'okugabira abakenyi ebirugu. ²³ Abayahudi nahekera okujira ebi bali bamarhondera na ebi Mordekai abayandikiraga. ²⁴ Bulya Hamani, mwene Hamedata, muagagi, mushombanyi wa bayahudi boshi, alirhozire omuhigo gw'oku bahererekeza, na abanda e Puri, kwokuderha oku cigole, lyo babayirha n'oku bashereza. ²⁵ cikwone Esta embere za mwami, mwami arhegeka oku mandiko okuhirimiza okw'irhwe lya Hamani omuhigo mubialijirire abayahudi, n'oku mumanika oku murhi, ye n'abagala. ²⁶ Byobirhuma Olwolusiku baluhamagala purimu, okw'izino lya Puri. Kushimbana ebyali yandisirwe omu maruba, kushimbana ebi bone babwine byahika, ²⁷ abayahudi barhola kulibone na kuli emiburho yabo, na oku ngasiboshi balicishwekire kulibo, omuhigo gw'oku kuza n'oku cishinga ngasi mwaka ezo nsiku zibirhi, kushimbana oku birhegesirwe n'amango. ²⁸ Ezonsiku zaligwasirwe oku kengerwa n'oku cishingirwa muburho oku gundi, omu ngasi mulala, omu ngasi murhundu; na ezo nsiku za purimu zirhaligwasirwe okuyibagirwa omu bayahudi, erhi enkegero zirhenzibwe omu miburho yabo. ²⁹ Omugoli Esta, mwali wa Abishaimi, n'omuyahudi Mordekai bayandika bwakabirhi okuyemeza e Purimu. ³⁰ barhumira abayahudi boshi amaruba, omu mirhundu igana na makumi gabirhi na nda ya mwami Aswero. Galigwerhe emyanzi y'omurhula n'obwikubagirwa, ³¹ oku kengesa Ezonsiku z'e purimu oku kasanzi karheganye, nkoku omuyahudi Mordekai n'omugoli Esta babirheganyagya kulibone na kuli emiburho yabo, kugerera okucishalisa kwabo n'endulu zabo. ³² Ntya irhegeko lya Esta lya hamiriza e purimu, n'ebyo byayandikwa omu citabu.