¹ Mwami na Hamani bagenda okw'idinye emwa omugoli Esta. ² Olwolusiku lwa kabirhi, mwami aciribwira Esta, erhi bagwerhe banywa ecinywebwa: bici ohunyire, mugoli Esta? wabihabwa, olwifinjo lwawe luli luhi? ciruankaba cihimbi ca bwami, wacihabwa. ³ Omugoli Esta ashuza: nkaba nayemerirwe emalanga gawe, mashi mwami, n'ankaba mwami abwine kwinja, ampe akalamu kani, byompunyire ebyo! ⁴ Bulya barhuguzize, nie n'olubaga lwani, oku rhusherezibwe, rhubagwe, n'okumalirwa. Nakandi, rhuciguzibagwe omurhundu baja na bajakazi, nakahulisire, cikwone omushombanyi arhakahashire arhuliriza amabi ajirire mwami. ⁵ Mwami Aswero arhola obuderhe abwira omugoli Esta: ali ndi na ngahi ali ohizire okujirantyo? ⁶ Esta ashuza: Omubisha, na mushombanyi, ali Hamani, oyu mugalugalu hala! Hamani agwarhwa n'ecoba embere za mwami n'omugoli. ⁷ Na mwami, omu burhe bwage ayimuka, arhenga omwidinye aja omu ishwa ly'obwami. Hamani asigala okuhuna obwonjo oku kalamu Kate emwa omugoli Esta, bulya abwine oku obusherere bwage bukola buhige omu murhima gwa mwami. ⁸ Erhi mwami agaluka embuga ly'akanyabwami okushubira omu lwarhamba lw'idinye, abaona Hamani anaharhire ebwa ncingo Esta ali, aderha: nkaba kurhabalira Kandi omugoli, emwani omu bwami? Erhi ebyo binwa bihuluka omu kanwa ka mwami, barhumbikira Hamani amalanga. ⁹ Na Harbona, muguma omu baganda, aderha embere za mwami: lolaga, omurhi gwarheganyibagwa na Hamani kuli Mordekai, waderheraga mwami bwinja, guyimanzire ahamwa Hamani, okubuli bwa makano makumi garhanu. Gumanikwekwo Hamani! ¹⁰ Na bamanika Hamani oku murhi analirheganyize Mordekai. N'oburhe bwa mwami bwarhulirira.