¹ Obwobudufu, mwami arhahuniraga, anahuna bamulerhere ecitabu c'ebyagezire, n'enkengero. Bacisoma embere zage. ² na babona biyandisirwe oku Mordekai ashobesire okubiyerekire Bigtani na Tereshi, baganda babirhi ba mwami, balanzi ba muhango, balilonzize okuhumakwo mwami Aswero. ³ Mwami aderha: ishungwe lici lya lukengwa na lyagolyago Mordekai ahabirwe kulibyo? Ntabyo ahabirwe, kwo abakozi ba mwami bashuzize. ⁴ Lero mwami aderha:ndi oli omungo? Hamani aliyishire omu muhanda gw'embuga gw'enyumpa ya mwami, okuhuna mwami okumanika Mordekai oku murhi anamurheganyize. ⁵ Abakozi ba mwami bashuza: Hamani ye yimanzire omungo. Na mwami aderha: adahe. ⁶ Hamani adaha, na mwami amubwira: bici bikwanine okumuntu mwami alonza oku kengesa? Hamani acibwira muliyene: undi kundusha mwami akakengesa? ⁷ Na Hamani ashuza mwami: oku muntu mwami alonza oku kengesa, ⁸ bihunyire okurhola emyambalo y'akanabwami erya mwami acirhumbikira n'eciterusi mwami agendakwo n'okwirhwe lyage kube ishungwe ly'akanyabwami, ⁹ kuheba eyo myambalo n'eciterusi oku muguma omu barhegesi bakulu ba mwami, n'okuyambika omuntu mwami alonza okukengesa, okumugendesa oku citerusi omu mulimbwa, n'okualanjira embere zage: ntya kwobajira omuntu mwami alonzize oku kengesa! ¹⁰ Mwami abwia Hamani: rhola bwonobuno emyambalo n'eciterusi, nkoku onadesire, inquiries Mordekai ntyo, muyahudi, otamire oku muhango gwa mwami; orhasize kantu okubyo waderhaga. ¹¹ Na Hamani arhola emyambalo n'eciterusi ayambika Mordekai, anamutembeza omu mulimbwa munene gw'omurhundu, anajayakuza: ntya kwobajira oku muntu mwami alonzize oku kengesa! ¹² Mordekai ashubira oku muhango gwa mwami, na Hamani ashubira emwage duba, azinzibire ahundisire n'irhwe. ¹³ Hamani aganirira Zereshi, mukage, n'abira bage boshi, ebyamuhikire byoshi. N'abanyabwenge bage, na mukage Zereshi, bamubwira: nkaba Mordekai okololi wahirima embere zage ali buo bwa bayahudi, orhamujire gurhi, ci wahimwa embere zage. ¹⁴ Okubacigwerhe bamubwira, abaganda ba mwami baheka Hamani honaho omu idinye Esta alirheganyize.