¹ Enyuma ly'ebyo, mwami Aswero ayinamulira Hamani oku burhegesi, mwene Hamedata, muagagi; amuyinamula oburhwali ahaeba n'entebe have enyanaya ly'abarhambo bali hofi naye. ² Abakozi ba mwami, bakagi yimanga oku muhango gwa mwami, bakagi fukama n'oku yunamira Hamani, bulya lyo lyal'irhegeko lya mwami oku bimuyerekire. Cikwone Mordekai arhakagi fukama n'oku muyunamira. ³ N'abakozi ba mwami bakagi bera oku muhango gwa mwami, babwira Mordekai: bulyagurhi oliwagomera irhegeko lya mwami? ⁴ nkoku bakagi bishubirira ngasimango arhanakenga bayunva, bakumanyisa Hamani, lyobalola erhi Mordekai asezire omu muhigo gwage; bulya alibabwizire oku ali muyahudi. ⁵ Na Hamani abona oku Mordekai arhafukama embere zage. Agwarhwa n'oburhe; ⁶ Cikwone aderha oku arhahumekwo Mordekai yene, bulya balimubwizire lubaga luck Mordekai arhenziremwo, na alonza oku hererekeza obuko bwa Mordekai, abayahudi boshi bali omu bwami bwa Aswero. ⁷ Oku mwezi gwa burhanzi gwoguli mwezi gwa Nisani, oku mwaka gw'ikumi na kabirhi gwa mwami Aswero, baband'enkuro, kwokuderha oku bayesh'ecigole, embere za Hamani, ngasi lusiku na ngasi mwezi, kuhika oku mwazi gw'ikumi na kabirhi, two guli mwezi gwa Adari. ⁸ Lero Hamani abwira mwami Aswero: hali omu mirhundu yoshi y'obwami bwawe lubaga luguma lushandire omu mbanga, lugwerhe n'amarhegeko garhashushiri aga ezindi mbaga, na barhakenga amarhegeko ga mwami. Birhali oku bunguke bwa mwami okubalekera oluhuma. ⁹ Nkaba mwami abwine bwinja, irhegeko ly'oku bahererekeza liyandikwe, naheba talanta bihumbi ikumi bya nfaraga omu maboko g'abakozi, lyo baziheba omu muhako gwa mwami. ¹⁰ Mwami ahogola olupeta lwage omu kuboko, analuha Hamani, mwene Hamedata, muagagi, mushinganya wa bayahudi. ¹¹ Na mwami abwira Hamani: enfaranga zikuhabirwe, n'olwo lubaga, obijire oku olonzize. ¹² Omwandisi wa mwami ahamagalwa olusiku lw'ikumi na kasharhu lw'omwezi gwa burhanzi, na bayandika kushimbana ebyalirhegesirwe na Hamani, oku baganda ba mwami, oku barhegesi ba ngasi murhundu, oku barhambo ba ngasi lubaga, oku ngasi murhundu kushimbana oluderho lwamwo, oku ngasi lubaga kushimbana oluderho lwabo. Byayandikwa okw'izino lya mwami, n'okuhebokw'obunanire bw'olugondo lwa mwami. ¹³ Amaruba garhumwa oku njira ya ngasi murhundu gwa mwami, oku bashereze, bayirhe, n'oku herekeza abayahudi, misole n'abashosi, barho n'orhubonjo n'abakazi, oku lusiku luguma, olw'ikumina kasharhu lw'omwezi gw'ikumi na kabirhi, gwoguli mwezi gwa Adari, n'oku ebirugu byabo bihagulwe. ¹⁴ Agomaruba galigwerhe lwandiko luguma lwaligasirwe luyalagazibwe omu ngasi murhundu, n'okubwira embaga zoshi okucirheganya okulwo lusiku. ¹⁵ Amaruba gagenda burharhindimiza, kushimbana irhegeko lya mwami. N'olandiko lwa yalagazibwa e Size, murhundu mukulu, cikwone mwami na Hamani bali omukunywa, omurhundu gw'e size gwali omu njoli.