¹ Modrekai, amanya ebigwerhe byajirwa byoshi, abera emyambalo yage, acibwika busunzu n'okucishiga oluvu. Anagenda omu murhundu anaja yakuza oku bululu bwenene, ² anagenda kuhika oku muhango gwa mwami, halya byalilahizibwe okuja omuntu oyambirhe busunzu. ³ Omu ngasi murhundu, ngasihoshi irhegeko lya mwami n'olwandiko lwage byahisire, haba njoli nene oku bayahudi, bacishalisa, balaka n'okuciduduma, na banji bagwishira oku babusunzu n'omu luvu. ⁴ Bambalikazi n'abambali ba Esta bagenda bamumanyisantyo, n'omugoli ayoba bwenene. Arhumira Modrekai emyambalo oku acibwike n'okumuhogoza busunzu, cikwone arhayemeraga. ⁵ Lero esta ahamagala Hataki, muguma omu baganda mwami ahebaga hofi naye, anamurhuma oku ajidosa Mordekai bici biri na ngahi anarhengaga. ⁶ Hataki aja emunda Mordekai ali, ebwa murhundu, mbere z'omuhango gwa mwami. ⁷ Na Mordekai amuganirira byoshi byamuhikire, n'okumuyereka ecishingo c'enfaranga Hamani analaganyize okuheba omu muhako gwa mwami Enyuma z'okuniguza abayahudi. ⁸ Amuha na lwandiko luguma lw'amandiko ga mwami lwayagazibagwa e Size oku bashereza, oku ayereke Esta anamumanyise byoshi; anarhegeka oku Esta aje emwa mwami oku muhuna obwonjo asengerere n'olubaga lwage. ⁹ Hataki ayisha abwira Esta ebinwa bya Mordekai. ¹⁰ Esta arhuma Hataki oku amubwira Mordekai: ¹¹ Abakozi ba mwami boshi n'embaga z'emirhundu zoshi bamanyire oku hab'irhegeko lihanyire oku lufu ngasi mulume erhi mukazi, okuja emwa mwami, omungo y'akanabwami, buzira oku hamagalwamwo; omuguma yene wakacira, oyu mwami akalambulira akarhi k'amasholo. Nani, ntahamagirwe emwa mwami kurhenga nsiku makumi gasharhu. ¹² Erhi emyanzi ya Esta ebwirwa Mordekai. ¹³ Mordekai arhumiza oku babwire Esta: orharhanye mpu wafuma wene omu bayahudi boshi, mpu bulya oli omunyumpa ya mwami. ¹⁴ Bulya, erhi wakahulika buno, oburhabale bwarhenga bandi enyanya z'abayahudi, nawe n'enyuma ya sho mwasherera. Nandi omanyire erhi akaba kano kasangi kokakuhisize omu bwami? ¹⁵ Esta arhumiza oku babwire Mordekai: ¹⁶ Genda, oshubuze abayahudi boshi bali e Size, na bacishalise enyanya zani, buzira okulya erhi kunywa nsiku zisharhu. Nani niena nacishalisa rhweshi n'abajakazi bani, Buzinda naja emwa mwami, ciruakaba irhegeko; nakaba nafa, nfe. ¹⁷ Mordekai agenda anajira nkoku Esta ali murhegesire.