¹ Omwaka murhanzi gwa Dario, mwene Asuero, wa buko bwa ba Medi, olwa wahindukaga mwami w'obwami bw'abakalidayo, ² Omwaka murhanzi gw'oburhegesi bwage, nie, Danieli, nabona omucitabu oku haligwasirwe hagere myaka makumi galinda oku mabi g'e Yerusalemu, kushimbana omubale gw'emyaka Nnamubaho abwiraga Yeremia, mulebi. ³ Nayerekeza amalanga emunda Nnahamwirhu Nnamahanga, mpulyo ndibirhira oku mahuno n'okuyinginga, omukucishalisa, okuyambala busunzu na oluvu. ⁴ Nakagi salira Nnamubaho, Nnamahanga wani, namujirira aga mahungamo: Nnahamwirhu, Nnamahanga mukulu na wakuyobohya, we kabika endagano yawe na oku babalira balya bakusima na okukenga amarhegeko gawe! ⁵ Rhwagomire, rhwajijire amabi, rhwali bakali na bagoma, rhwahindukira amarhegeko gawe n'amahano gawe. ⁶ Rhurhayunvagya Abakozi bawe, abalebi, baderhaga okw'izino lyawe oku bami birhu, abarhambo birhu, ba larha, na oku lubaga lwoshi lw'ecihugo. ⁷ Kuliwe, Nnahamwirhu, we mushinganya, na nirhu nshonyi ebusu, okulu lusiku,oku bantu b'e Yuda, na oku bikala b'e Yerusalemu, na oku Israeli yeshi, oku bali hofi n'abali kuli, omubihugo byoshi waba shandazize enyanya z"okuhemuka bacigomesagya embere zawe. ⁸ Nnahamwirhu, enshonyi oku malanga girhu, oku bami birhu, oku barhambo birhu, oku balarha, bulya rhwakujirire ebyaha. ⁹ Emwa Nnahamwirhu, Nnamahanga wirhu, olukogo n'obwonjo, bulya rhwabire bagoma kuliwe. ¹⁰ Rhurhayunvagya izu lya Nnamubaho, Nnamahanga wirhu, okukulikira amarhegeko gage alihebire embere zirhu kugerera abakozi bage, abalebi. ¹¹ Israeli yeshi ahemukire irhegeko lyawe, na acihindula okurhayunva izu lyawe. Lero obuhanya bwarhuhandakwo na endahiro ziri nyandike omu marhegeko ga Musa, mukozi wa Nnamahanga, bulya rhwagomire Nnamahanga. ¹² Ahikirize akanwa aderhaga kulirhwe na kuli abarhambo birhu balirhurhegesire, arhuhebirekwo buligo bunene, na burhasagiboneka kundi kurhyo idako ly'amalunga nk'ebyabaga e Yerusalemu. ¹³ Nkoku birhayandisirwi omu marhegeko ga Musa, Obwobuhane bwoshi bwarhujirekwo; na rhurhahamagalaga Nnamubaho, Nnamahanga wirhu, rhurhalekaga amabi girhu, rhurhayunvagya okuli kwawe. ¹⁴ Nnamubaho alanzire obwobuhanya, na anabulerha kulirhwe; bula Nnamubaho, Nnamahanga wirhu, ali mushinganya omu bijiro byage byoshi, ci rhwe rhurhayunvagya izu lyage. ¹⁵ Na bunola, Nnahamwirhu, Nnamahanga wirhu, we wakulaga olubaga lwawe omucihugo c'e Misiri oku kuboko kwawe kw'obuhashe, na kwo kwaguhaga izino nkoku binali ene, rhahushire, rhajira amabi. ¹⁶ Nnahamwirhu, kushimbana olukgo lwawe lunene, mashi oburhe bwawe na okutula gwawe gurhenge oku murhundu gw'e Yerusalemu, okuntondo yawe ecesibwe; bulya; enyanya z'ebyaha birhu n'amabi ga ba larha, Yerusalemu n'olubaga lwawe bali omu nshonyi oku boshi barhuzungulusire. ¹⁷ Bunola ntyo, mashi Nnamahanga wirhu, oyunvirhize amahuno n'okuyinginga kwa omukozi wawe, na, oku buzigire bwa Nnahamwirhu, omolekere amalanga gawe oku bacesibwa hawe hasherire! ¹⁸ Nnamahanga wani, rhega okurhwiri na oyunve! Bwikula amasu olole omushekera kwirhu, olole omurhundu bayakulizamwo izino lyawe! Bulya arhali arhali bushinganya bwirhu burhumire rhwakuyinginga, ci mukogogo lwawe lunene. v 19 Nnahamwirhu, yunvirhiza! Nnahamwirhu, babalira! Nnahamwirhu, yunvirhiza! okole orhana cerwe, oku buzigire kuliwe, mashi Nnamahanga! Bulya izino lyawe Lori lyahamagalwa okumurhundu gwawe n'oku lubaga lwawe. ²⁰ Naciriderha kandi, nakahuna, nakahungama ebyaha byani na ebyaha by'olubaga lwani Israeli, na ndwirhe okuyinginga kwani emwa Nnamubaho, Nnamahanga wani, okusengerera entondo ecesibwe ya Nnamahanga wani. ²¹ Naciriderha kandi, omu mahuno gani, erhi amulume, Gabrieli, nazindigibona omu mabonekezi, anyegeraho oku kubalala kwa dubaduba, oku kasangi k'entulo y'ebijingo. ²² Anyigiriza, ananganiza. Ambwira: Danieli, nyishirage buno oku kuyigula obwenge. ²³ Ene orhondera oku salira, akanwa mwarhenga, nanayisha okukumanyisa; bulya olu musimwa. Yunvirhiza omwanzi, na oyunve amabonekezi! ²⁴ Migobe makumi galinda ya hebirweho oku lubaga lwawe, na oku murhundu gucesibwe, okunenesa amahushe na okumalira ebyaha, okucesa amabi n'okulerha obushinganya bw'ensiku n'amango, okuheba obunanire oku mabonekezi na omulebi, na okushiga Omucesibwa w'abacesibwa. ²⁵ Obimanyage lero, na oyunve! Kurhenga amango emyanzi ya yalagazagya oku Yerusalemu yaciyubakwa kuhika oku Mushigwa, oku mulongolanyi, hali migobe nda na migobe makubi galindarhu na gabirhi, emihanda na enjira zalungulwa, ci oku mango g'amalibuko. ²⁶ Enyuma lyamigobe makumi galindarhu na gabirhi, Mushigwa muguma akulwa, na arhayishigwarhe mugombozi. Olubaga lw'omurhambo wayisha lwayishi shaba omurhundu na ahacesibwe, na abuzinda bwage bwayishi yisha nka cihonzi; burhegesi oku obusherere bwagendekera guhika obuzinda bw'entambala. ²⁷ Ayishijira ndagano nzibu na banji mugobe muguma, na oku cirholo c'omugobe ayishilekesa enterekero na entulo; Omushereza ayishijira ebintu byenshonyi, kuhika obusherere na ebyajijirwe biyimangire oku mushereza.