¹ Oku mwaka gw'akasharhu gwa Kirusi, mwami was e Peresi, omwanzi gwafululirwa Danieli, wahamagalagwa Belshazari. Ogwomwanzi, guli gw'okunali, gumanyisize buhanya bunene. Ayunvirhiza ogwomwanzi, na agwarha obwenge bw'amabonekezi. ² Omwagomango, nie, Danieli, najira migobe isharhu omu mishibo. ³ Ntalyaga kalyo kinja, na omukanwa kani murhajaga nyama erhi cinywebwa, na ntanacishigaga guhika emigobe isharhu yahikirira. ⁴ Olusiku lw'amakumi gabirhi na zini z'omwezi murhanzi, nali oku cikombo c'olwishi lunene luli Hidekeli. ⁵ Nayinamula amasu, nasinza, na lolaga, Hali omuntu oyambirhe ecibwikwa, anali kabisire ecubunu cage oku mukaba gw'amasholo ga Ufazi. ⁶ Omubiri gwage gwaliyosire nka mabuye ga cishingo, amalanga gage gakagimoleka nka bulangale, amasu gage nka ngulumira ya muliro, amaboko n'amagulu gage galiyosire nka marhale marhyaze, na izu lyage liyosire nka lubi lunene. ⁷ Nie, Danieli, nabona niene amabonekezi, n'abantu rhwali rhweshi barhagabonaga, cikwone bayoboha bwenene, na balibirha okujicifulika. ⁸ Nasigala niene, na nabona ogo mabonekezi manene; emisi yampya, amalanga gani gatulula gana shandala, naheza n'emisi yoshi. ⁹ Nayunva izu ly'ebinwa byage; na nkoku nakagiyunva izu ly'ebinwa byage, nahirima n'omusisi, amalanga okw'idaho. ¹⁰ Na lolaga, okuboko kwampumakwo, kwa hugunya amadwi n'amaboko gani. ¹¹ Anambwira: Danieli, mulume musimwa; obe munvirhizi okumyanzi nakubwira, na ayimange ahawanali; bulya ntumirwe buno emwawe. Erhi ambwirantyo, nayimanga n'omusisi. ¹² Ambwira: Danieli orhayobohe kantu; bulya olusiku lurhanzi walonzagya oku yunva, na oku cirhohya embere za Nnamahanga wawe, ebinwa byawe byayunvirhwe, na myanzi yawe erhumire nayisha. ¹³ Omurhambo w'obwami bw'e Peresi anancisire nsiku makumi gabirhi na luguma; ci lolaga, Mikaeli, muguma omu barhambo bakula, anayishire anyokola, na nalibezire aho hofi na omwami w'e peresi. ¹⁴ Nyishirage buno oku kumanyisa ebyahikira olubaga lwawe omumango gayisha; bula amabonekezi gayerekire ogomango. ¹⁵ Ci okwagwerhe ambwira eyomyanzi, nakasinza okw'idaho, nanahwekera. ¹⁶ Na lolaga, owaligwerhe enshusho ya omwana w'omuntu ampuma oku kanwa. Nayashama, naderha, nanabwira owalinyimanzire emalanga: Nnahamwirhu, amabonekezi ganyobohize, na nahezize emisi yoshi. ¹⁷ Gurhi omukozi wa Nnahamwirhu akabwira Nnahamwirhu? Bunola ntagwerhi misi, ntacigwerhi muka. ¹⁸ Lero olya waligwerhe enshusho y'omwana w'omuntu acirimpumakwo buhyahya, na anzibuhya. ¹⁹ Anambwira: orhayobohe kantu, mulume musimwa, omurhula kuliwe! ozibuhe, ozibuhe! Na erhi agwerhe andesa, nacirigwarha emisi, na naderha: Nnahamwirhu aderhage, bulya wamampeba emisi. ²⁰ Ambwira: komanyire bici byarhumire nayisha emunda oli? Bunola ngalusire okujilwisa omurhambo w'e peresi; na honongenda, lologa, omurhambo we Yavani ayisha. ²¹ Ci nakumanyisa ebiyandisirwe omucitabu c'okuli. Ntaye ontabaza kulibo, orhali Mikaeli, murhambo winyu.