¹ Omwaka murhanzi gwa Belshaza, mwami w'e Babeli, Danieli abona ebilorho n'amabonekezi g'omurhima gwage, amango aligweshire ahanshingo. Buzinda ayandika ebilorho, na oku ganira ebyali binene kulibyo. ² Danieli arhondera aderha: nakagilola amabonekezi gani g'obudufu, na lolaga, empusi zini z'emalunga zahukiza bwenene oku nyanja nene. ³ Na nsimba zini nene zarhenga omu nyanja, zirhashushini nguma oku yindi. ⁴ Eyaburhanzi yalishushire entale, na yaligwerhe ebyubi bya nyunda; namakasinza, guhika amango ebyubi byamakulwa; na amarhega okw'idaho na ayimanga bwimana nka muntu, na amahabwa omurhima gw'omuntu. ⁵ Na lolaga, ensimba y'akabirhi yalishushire namugunga, na yali yimanzire luhande luguma. Yaligwerhe mirhibadu isharhu omukanwa omumino gage, na bamayibwira: yimuka, olye nyama nyinji. ⁶ Enyuma z'ebyo nakagisinza, na lolaga, eyindi yalishushire engwi na yaligwerhe oku mugongo byubi bini nka kanyunyi, eyo nsimba yaligwerhe birhwe bini, na oburhwali bwayihabirwe. ⁷ Enyuma z'ebyo, nakagisinza, omu mabonekezi gani g'obudufu, na lologa, hali ensimba ya kani, yakuyobohya, ya misi, na ya burhwali bwenene; yaligwerhe mino mali ga cuma, yakagirya, n'oku vuna, n'okulabarha ebisigaliza; na erhanali shusire ezozindi nsimba za burhanzi, na yaligwerhe mahembe ikumi. ⁸ Nakagisinza amahembe, na lolaga, erindi ihembe lisungunu lyamamera omugarhi kago, na gasharhu omugalya mahembe gambere gakulwa embere ly'eryo ihembe, na lolaga, lyaligwerhe amasu nka masu ga muntu, na akanwa, kakagiderha okubwibone. ⁹ Nakagisinza, ene bagwerhe baheba entebe z'oburhambo. Na omukulu w'ensiku adamala.Omwambalo gwage gwali mweru nka lubula, na enviri z'okwirhwe lyage zaliyosire nka bwoya bucire, entebe yage kaliyosire nka ngulumira za muliro, n'ebizinge byage nka iberekana lya muliro. ¹⁰ Olwishi lw'omuliro lwakagihulula embere zage. Cihumbi bihumbi byakagimukolera, na bihumbi ikumi milioni byaliyimanzire embere zage. Abatwi bemanja batamala, na ebitabu byayigulwa. ¹¹ Nakagisinza ntyo, enyanya za emyanzi y'obwibone ihembe lyakagiderha; na bulya nakagilola, ensimba ya nigwa, na omubiri gwayo gwa sherezibwa, gwahebwa oku muliro okuyocibwa. ¹² Ezindi nsimba zakulwa oburhwali bwazo, cikwone zayushulirwa akalamu kuhika kasangi kagerwa. ¹³ Nakagisinza amago g'amabonekezi gani g'obudufu, na lolaga, oku bitu by'emalunga hayisha oshushire mwene muntu; ayegera emunda omukulu w'ensiku, na banamyegeza hofi naye. ¹⁴ Bamuha oburhwali, irenge na obwami: na ngasi mbaga, amashanja, na abantu ba ngasi luderho bamukolera. Oburhwali bwage bwali burhwali bwa miakula burhakahwa, na obwami bwage burhaka shabuka. ¹⁵ Nie, Danieli, nagwarha omurhima gulugusire mulinie, na amabonekezi g'irhwe lyani ganyobohya. ¹⁶ Nayegera hofi na muguma omu bali aho, namudosa ebyali by'okuli mulibyo. Ambwira, na ampa amahugulo. ¹⁷ Ezonsimba zini nene, bali bami bani bayishi zuka omw'igulu; ¹⁸ cikwone ocesibwe wa Olengerire ayishihabwa obwami, anayishigwarha obwami amango goshi, emyakula oku myakula. ¹⁹ Buzinda nalilonzize manye ebiyerekire eyo nsimba ya kani, erhalishushire zabo, yakuyobohya bwenene, yaligwerhe amino g'ecuma n'enyunu z'amarhale, yakagirya, kuvunangiza, n'okulabarha emisigala. ²⁰ na okubiyerekire mahembe ikumi yaligwerhe okw'irhwe, na okubiyerekire lirya lindi lyameraga,na embere lyaryo gasharhu garhenga, oku lirya ihembel lyaligwerhe amasu, akanwa kakagiderha oku bwirhundulike, na okuboneka bwenene kulusha agabo. ²¹ Nabona eryo ihembe lyalwissa abacesibwa, lyanabahima. ²² Kuhika amango omukulu w'ensiku ayishigiha abacesibwa obushinganya bwa Olengerire, na amango gahika go abacesibwa bagwasire obwami. ²³ Ambwira ntya: ensimba ya kani, buli bwami bwa kani bwayishibà omw'igulu, burhashushiri agandi mami, bwayishi shereza igulu lyoshi, okulabarha n'okuvunangiza. ²⁴ Amahembe ikumi, bali bami ikumi bayishirhenga omwago mami. Na owindi ayishi yinuka enyuma zabo, arhashiyorhe k'abarhanzi, na ayishi honola bami basharhu. ²⁵ Ayishi kajajacira Olengerire, arhindibuze n'abacesibwa b'Olengerire, na ayishi langalira okuhindula amango n'irhegeko; na abacesibwa bashilekerwa omu maboko gage mango maguma, mango manji, na ecirholo c'amango. ²⁶ Nabuzinda hayishiyisha olubanja, na bamukule oburhwali bwage, anasherezibwe n'oku bulabula lyoshi. ²⁷ Obwami, oburhwali, na obukulu bwa ngasi mami gali idaku ly'amalunga, gayishihabwa olubaga lucesibwe lw'Olengerire. Obwami buli bw'ensiku n'amangon na ngasi b'oburhwali bayishimukolera n'oku mukenga. ²⁸ Aha ebinwa byahweraho. Nie Danieli, nalugurha bwenene entanya zani, nahinduka enshusho, nabika n'eyomyanzi omu murhima gwani.