¹ Dario abona bwinja okuheba omu bwami bwage barhegesi igana na makumi gabirhi, bo balikwanine okuba omu bwami bwoshi. ² Aheba okwirhwe lyobo barhambo basharhu, mulibo mwali Danieli, mpulyo abo barhegesi bakabarhulira oku emikolo eyosire, na lyo mwami arhaki lugirwa n'emikolo. ³ Danieli arhaluka abo barhambo b'abarhegesi, bulya muliye mwali muka olengerire, na mwami alirhanyize oku muyimika oku bwami byoshi. ⁴ Lero abarhambo n'abarhegesi balonza obulyo bw'oku songera Danieli oku byaliyerekire obwami. Cikwone barhabonaga bulyo, erhikantu kakushubirira, bulya ali mwaikubagirwa, na barhanakagibona muliye ihushe, erhi mabi. ⁵ N'abo bantu baderha: rhurhabwini bulyo bwaku songera Danieli, nkaba rhububone omu marhegeko ga Nnamahanga wage. ⁶ Nantyo abo barhambo n'abo barhegesi bagenda caligumiza emwa mwami, na bamuganiza ntya: Mwami Dario, olame ensiku zoshi! ⁷ Abarhambo boshi b'obwami, abaganda, abahanuzi, na abimangizi bayemire oku irhegeko ly'obwami liyalagazibwe, n'endahiro nkali, lidesire oku ngasiye, omu kasangi ka nsiku makumi gasharhu, owa jira isala oku mungu yeshiyeshi erhi oku muntu,orhali kuli we, mashi mwami, ayishi kwebwa omu bulumba bw'entale. ⁸ Bwonobuno, mashi mwami, oyemere endahiro, na oyandike irhegeko, lyo birhaki hinduka, kushimbana amarhegeko g'aba Medi na aba Peresi, gali garhahinduka. ⁹ Kulibyo mwami Dario ayandika irhegeko na endahiro. ¹⁰ Erhi Danieli amanya oku irhegeko lyayandisirwe, acishubirira omunyumpa yage, mulya amadirisha g'ecumpa c'enyanya gali yigusire kuyerekera e Yerusalemu; na kasharhu omu lusiku akagi fukama, oku salira, na oku haramya Nnamahanga wage, nkoku anakagijira burhanzi. ¹¹ Lero abo bantu bayisha caligumiza, na bashimana Danieli ogwerhe asalira n'oku hamagala Nnamahanga wage. ¹² kandi banaja emwa mwami, n'okumubwira oku biyerekire endahiro y'obwami: K'orhayandikaga endahiro edesire oku ngasiye omu kasangi ka nsiku makumi gasharhu wajira isala oku mungu yeshiyeshi erhi oku muntu, orhali we, mashi mwami, ayishikwebwa omu bulumba bw'entale? Mwami ashuza: ntyo kwobinali, kushimbana irhegeko ly'abamedi na aba Peresi, na lirhakahindamuka. ¹³ baciri rhola obuderhe babwira mwami: Danieli, muguma w'empira z'e Yuda, arhacigonzize bici kuliwe, mashi mwami, ciru n'endahiro wayandikaga, na alyajira isala lyage kasharhu omu lusiku. ¹⁴ Mwami agaya bwenene erhi ayunvantyo; ahuna omu murhima okuciza Danieli, na kuhika izuba lizike aciseza oku muyokola. ¹⁵ Cikwone abobantu bazigalala emunda mwami ali,na bamubwira: omanye, mashi mwami, okw'irhegeko lya Medi na Peresi lisegerize ngasi ndahiro erhi ngasi irhegeko liyemirwe na mwami okurhahinduka. ¹⁶ Lero mwami ahana irhegeko oku Danieli alerhwe, na akwebwe omu bulumba bw'entale. Mwami arhola obuderhe abwira Danieli: Nnamahanga wawe, okolera burhahusa, akucize! ¹⁷ Balerha ibuye, na baliheba oku muhango gw'obulumba, mwami aheba obunanire bwage n'obwa abakulu, mpulyo ntabyo bywhindukaga kuli Danieli. ¹⁸ Mwami anashubira omu bwami; alala budufu bwoshi burhalya, arhanalerhaga muherula hofi naye, na arhahuniraga. ¹⁹ Mwami azuka oku muco, na omuceracera, na agenda dubaduba ebwa bulumba bw'entale. ²⁰ Erhi ayegera aha mwina, ayakuza Danieli okw'izu ly'oburhe, mukozi wa Nnamahanga ozine, Nnamahanga wawe okolera burhahusa, kanahashire oku kuciza n'entale? ²¹ Na Danieli abwira mwami: mwami, olame ensiku zoshi! ²² Nnamahanga wani anarhumire malahika wage na ashweka orhunwa rhw'entale, zirhajijire kubi kwoshi, bulya nabonekine muzir'ishembo embere zage; na embere zawe kwonokwo, mashi mwami, ntajijire mabi. ²³ Lero mwami ashagaluka bwenene, anarhegeka oku bahuluse Danieli omumwina. Danieli akulwa omumwina, barhanabonaga kuliye aha ayagalisire, bulya alicikubagire Nnamahanga wage. ²⁴ Mwami arhegeka oku abo bantu basongeraga Danieli balerhwe na bakwebwe omu mwina gw'entale, abana babo na bakabo; na embere bahike omu mwina, entale zabagwarha na oku vunangiza ebivuha byabo byoshi. ²⁵ Eyuma ly'ebyo, mwami Dario ayandikira embanga zoshi, amashanja goshi, oku bantu ba ngasi luderho, balamire omw'igulu lyoshi: omurhula kulimwe oku bwinji! ²⁶ Ntegesire oku, omu bwami bwani bwoshi, bayobohe n'oku kenga Nnamahanga wa Danieli. Bulya ali Nnamahanga ozine, na alamire emyakula; obwami bwage burhaka shabuka, na oburhwali bwage bwabera kuhika ebuzinda. ²⁷ Ye okayokola anacizè, anajire ebirhangazo omu mpigu n'igulu. Ye wayokolaga Danieli omu bulumba mw'entale. ²⁸ Danieli ayololoka oku burhegesi bwa Dario, na oku burhegesi bwa Sirusi, mu Peresi.