¹ Mwami Belshaza ahana idinye linene, oku bakulu b'ebihumbi bage, ananywa ecinywebwa embere zabo. ² Belshaza, erhi aba ama labula oku cinywebwa, arhumiza ebikombe by'amasholo na ebya enfaranga ishe Nebukadeneza akulaga omw'ishengero e Yerusalemu, mpulyo mwami n'abakulu bage, bakabo n'abaherula babo, banyweramwo. ³ Lero balerha ebikombe by'amasholo byakulagwa omw'ishengero, by'omunyumpa ya Nnamahanga e Yerusalemu, na mwami n'abakulu bage, bakabo n'abaherula babo, babikolesa okunyweramwo. ⁴ Banywa ecinywebwa, banakuza emyungu y'amasholo, ye nfaranga, y'amarhale, ye cuma ye mirhi n'eyamabuye. ⁵ Ogomango, haboneka eminwe y'ecigasha c'omuntu; na cayandika, embere ly'itara oku ngwa y'olukuta lw'akanyabwami. Mwami abona obuzinda bw'eco cigasha cakagiyandka. ⁶ Lero mwami ashirula, arhemuka; enziha zage zalekana, na amadwi gage gahukulana. ⁷ Mwami ayakuza bwenene oku bahamagale abasagasi, abakalidayo, abahamuzi; na mwami arhol'obuderhe abwira banyabwenge b'e Babeli: ngasiye wankasoma aga mandiko n'oku ga mpugulira ayambikwa ebidukula, ayambala omugufu gw'amasholo omw'igosi, na agwarha entebe ya kasharhu omu burhegesi bwo bwami. ⁸ Abanyabwenge boshi ba mwami badaha; cibarhahashaga oku soma emyandiko n'okuha mwami amahugulo. ⁹ Okubirya mwami Belshaza, ali rhemusire bwenene, ahinduka enshushoi, n'abakulu bage bajondera. ¹⁰ Mwamikazi, enyanya ly'emyanzi ya mwami n'abakulu bage, adaha omu lwarhamba lw'idinye, aderha nantya: mashi mwami, olame amango goshi! Entanya zawe zirhalugurhe, n'amalanga gawe garhahindule enshusho. ¹¹ Omu bwami bwawe muli omuntu ogwerhe muliye muka gwa myungu ecire; n'amango ga sho, rhwabona emwage obulangale, obwenge, na obukengukwe buyosire nka bukengukwe bwa myungu. Nakandi mwami Nebukadeneza, sho,mwami, sho, amuheba murhambo wa balagu, wabasagasi, wa bakalidayo na bahamuzi. ¹² bulya babona muliye, muli Danieli, wayirikagwa na mwami Belshazari, murhima muguma gulengerire, gwa bumanyi na gwa bwenge, na obulenga bw'okuhugula ebilorho, okuhugula emigani, na oku kola amadoso mazibu. Ntyo Danieli ahamagalwe, na ahana amahugulo. ¹³ Ntyola Danieli alerhwa embere za mwami. Mwami arhola obuderhe abwira Danieli: Kawe Danieli, muguma w'omumpira z'ebuyahudi, olya mwami, larha, alerhaga kurhenga e buyahudi? ¹⁴ Nayunvire ebikuyerekire oku ogwerhe muliwe muka gw'emyungu, na oku banakabona emwawe obulagashane, obwenge na obukengukwe burhalusize. ¹⁵ Mira banderhera banyabwenge, abasagasi, mpulyo bansomera eyi myandiko n'okumpa amahugulo; cikwone barhahashire oku mpa amahugulo g'omwanzi. ¹⁶ Nayunvirhe oku wanahana amahugulo na okushuza oku amadoso mazibu; bwonobuno, nkaba wasoma eyi myandiko n'okumpa amahugulo, wayambikwa ebidukula, wayambala omugufu gw'amasholo omw'igosi lyawe, na wagwarha entebe ya kasharhu omu burhegesi bw'obwami. ¹⁷ Danieli ashuza embere za mwami: Obike oluhembo lwawe, na obihe undi; cikwoki nasomera mwami amandiko, namuhè n'amahugulo. ¹⁸ Mashi mwami, Nnamahanga olienyanya alihire Nebukadeneza, sho, oburhegesi, obukulu, irenge n'olukengwa; ¹⁹ Na ahaniana ly'obukulu alimuhire, embaga zoshi, amashanja, abantu ba ngasi luderho bali omu bwoba n'okujuguma embere zage. Mwami akagiyirha abalonzize, alekere n'akalamu abalonzize; akagiyinamula abalonzize, na okuhonola abalonzize. ²⁰ Cikwone amango omurhima gwage gwa yinukaga, n'okuzibuhya omurhima gwage kuhika oku bwirhundulike, ahonolwa oku ntebe yage y'akanabwami na akulwa irenge lyage. ²¹ Ahinvwa egarhi kabenemuntu, omurhima gwage gwayorha nka gwa nsimba, na alama haguma n'ebihesi by'emuzirhu; bamuha okulya olubala nka nkafu, na omubiri gwage gwaloba oku lumè lw'emalunga, kuhika amanyirire oku Nnamahanga oli enyanya arhegesire oburhambuzi bw'abantu na oku anabuhe oyu alonzize. ²² Nawe, Belshaza, mugala, orhahonwire omurhima gwawe, ciru akaba walimanyire ebyo byoshi. ²³ Wacibarhwire enyana za Nnahamwirhu we mpingu; ebikombe by'enyumpa yage byalerhagwa embere zawe; ninyu mwabikolesa okunywera mwo ecinywebwa, we n'abakulu bawe, bakabo, n'abaherula babo; wakuzize emyungu y'enfaranga, y'amasholo, y'amarhale, ye cuma, y'emirhi n'amabuye, erhabona erhanayunva, na erhamanyiri kantu, orhanahire Nnamahanga irenge ogwerhe omu kuboko kwage omusa gwawe n'enjira zawe zoshi. ²⁴ Byobyarhumire arhuma obwobuzinda bw'ecigasha oku yandika ago mandiko. ²⁵ Ololage olwandiko lwa yandisirwe: mubale, mubale, lugero na kugabwa. ²⁶ Lolaga n'amahugulo g'eyomyanzi: Mubale: Nnamahanga anaganjire obwami bwawe na anabumalire. ²⁷ Lugero: wahebirwe oku lugero lw'obuzirhu, na wabonesire mwangu; ²⁸ Kugabwa: obwami bwawe bwagabwa, na buhabwe aba Medi na aba Peresi. ²⁹ Honaho Belshaza arhegeka, banayambika Danieli ebidukula, bamuheba omw'igosi omugufu gw'amasholo, na banayalagaza oku agwarha entebe ya kasharhu omu burhegesi bw'obwami. ³⁰ Bwonobwo budufu, Belshaza, mwami w'abakalidayo, ayirhwa. ³¹ Na Dario, mu Medi, agwarha obwami, erhi agwerhe miaka makumi galindarhu n'ibirhi.