¹ Nebukadeneza, mwami, oku mbaga zoshi, oku mashanja goshi, oku bantu ba ngasi luderho, balamire omw'igulu lyoshi. Omurhula kulimwe okubwinji! ² Byansimisize oku mumanyise ebijiro n'ebirhangaza Nnamahanga mukulu anajijire emundandi. ³ Oku ebyobirhangaza biri binene! na ebisomerine bya burhwali! Obwami bwage buli bw'amango goshi, na oburhegesi bwage buyimanzire muburho oku gundi. ⁴ Nie, Nebukadeneza, nali rhulwire omumwani, nali munyiragi omu kanabwami kani. ⁵ Nalorha ebilorho byanyobohya; entanya nalikulikire omunshingo yani, n'amabonekezi g'omurhima gwani gansomera. ⁶ Narhegeka oku banderhere banyabwenge boshi b'e Babeli, mpulyo bamanyisa amahugulo g'ebilorho. ⁷ Lero abalaguzi bayisha, abasagasi, abakalidayo n'abahamuzi. Nababwira ebilorho, barhanambwiraga amahugulo. ⁸ Oku buzinda, Danieli ayisha embere zani, ahamagirwe Belshazari kushimbana amazino ga mungu wani, na ogwerhe muliye muka gwa mungu ozine. Namubwira ebilorho: ⁹ Belshazari, murhambo w'abalaguzi, ogwerhe muliwe, nkumanyire,muka gwa myungu ecire, na kuliye ntalyo ihwe liri lizibu, ompe amahugulo g'amabonekezi nabwine omu bilorho. ¹⁰ Lolaga amabonekezi g'omurhima gwani, amango nali oku nshingo yani, nakagisinza, na lolaga, hali omwigulu murhi muli bwenene. ¹¹ Ogwomurhi gwamahinduka munene na muzibu, gwamakula kuhika emalunga, na gwakagiboneka oku buzinda bw'igulu lyoshi. ¹² ebyasi byagwo byali binjà, n'amalehe gagwo manji; gwakagilerha ebiryo oku boshi; na ensimba z'ebweru zakagi yegema omu cihoho cagwo; na orhunyunyi rhw'emalunga rhwakagi yubakira omu marhami gagwo, nangasi bizine byakagi gurhenzakwo akalyo. ¹³ Omu mabonekezi g'omurhima gwani, nabonaga oku nshingo yani, nakagisinza, na lolaga, muguma w'omubalya balalira banali bacesibwa ahonoka kurhenga empingu. ¹⁴ Ayakuza oku burhwali na aderha ntya: Mukube omurhi, na mutwe amarhami gagwo; mushaganye ebyasi byagwo, mushandaze n'amalehe, ensimba zilibirhe idaku, na orhunyunyi omu mashami gagwo. ¹⁵ Cikwone mulekere ecigundu cirikw'emizi omw'idaho, munagushweke n'obwonjogoro bw'ecuma n'amarhale, omu byasi byomwishwa. Gujome oku lumè lw'emalunga, na gushangire ebyasi by'omwigulu, n'ensimba. ¹⁶ Omurhima gwagwo gw'omuntu gwarhenzibwa, na gwahabwa omurhima gw'ensimba; na mango nda gagugerakwo. ¹⁷ Obwobuhane lir'irhegeko ly'abalanzi, na eyo myanzi lir'irhegeko lya bacesibwa, lyo ngasi abazine bamanya oku Olengerire agwerhe obuhashe oku ngasi burhegesi bw'abantu, na anabuhe oyu alonzize, na anakuyinamulire omuzamba omu bantu. ¹⁸ Ebyo byo billorho nalosire, nie, mwami Nebukadeneza. We Belshazari, ahanage amahugulo gabyo, bulya abanyabwenge boshi b'omubwami bwani barhaka gampa, we, wanahasha, bulya ogwerhe muliwe muka gw'emyungu ecesibwe. ¹⁹ Lero Danieli, wahamagalagwa Belshazari, arhangala kasangi kasungunu, na entanya zage zalugurha. Mwami ashubirira aderha: Belshazari, ebilorho n'amahugulo birha ku luguse! Belshazari ashuza: Nahamwirhu, mashi ebi billorho bibe bya bashombanyi bawe n'amahugulo gabyo gabe g'abakushomba! ²⁰ Omurhi wabonaga, gwahindukaga munene na muzibu, gulya obulibwagwo bwahika emalunga, na gwakagiboneka hoshi omw'igulu; ²¹ Ogwomurhi, gugwerhe ebyasi binjà n'amalehe manji, gwakagiha boshi akalyo, na muligwo byakagi cifulika ensimba z'ebweru, na omu marhami gagwo orhunyunyi rhw'emalinga rhwakagi cijijira ahokulama, ²² ali we, mashi mwami, wewabire munene na muzibu, na obunene bwagandaza n'okuyinamuka guhika emalunga, na oburhwali bwalumire kuhika ebuzinda bw'igulu. ²³ Mwami anabwine muguma w'abo balanzi banali bacesibwa ahonoka emalunga n'okuderha: mukube omurhi, na mugushereze; cikwone muleke ecigundu omw'idaho kwokuli emizi, na mucishweke n'obwonjogoro bw'ecuma n'amarhale, omu byasi by'embuga, na cikaloba oku lumè lw'emalunga, na bakashangira olubala haguma n'ensimba z'ebweru, kuhika mango nda gagugerakwo. ²⁴ Alaga amahugulo, mashi mwami, Lola omuhigo gw'Olengerire, gwayishi hikirira oku nawirhu mwami. ²⁵ Bayishi guhinva omu bantu, wayishilama haguma n'ensimba z'ebweru, na bayishi kaguha olubala okulya nka mpanzi; wayishi kabombera oku lumè lw'emalunga, na mango nda gakugerakwo, kuhika omanye oku Olengerire agwerhe obuhashe oku burhegesi bw'abantu na oku anabuhe oyu alonzize. ²⁶ Irhegeko ly'okuleka ecigundu cirikw'emizi y'omurhi kulikuderha oku obwami bwawe bwakushubirira han'omanya oku ogwerhe obuhashe ali omu mpingu. ²⁷ byobirhumire, mashi mwami, ihano lyani likusimise! olekere haho ebyaha byawe omukujira obushinganyanya, na obulyalya omukuba n'olukogo oku babonirwe, na omurhula gwawe gwanagendekera. ²⁸ Ebyo byoshi byahikirire kuli mwami Nebukadeneza. ²⁹ Enyuma lya miezi ikumi n'ibirhi, nkoku akagi lambagira omu bwani bw'e Babeli, ³⁰ mwami arhola akanwa aderha: Karhali hano Babeli mukulu, ho nayubasire, nka kanyabwami, oku burhwali bw'emisi yani na okw'irenge ly'oburhambuzi bwani? ³¹ Omwanzi gwaciri omukanwa ka mwami, erhi izu lihonoka kurhenga emalunga: omanye, mwami Nebukadeneza, oku bakukula oku bwami. ³² Bakuhinva omu bantu, walama haguma n'ensimba z'ebweru, bakaguha nka nkafu, olubala nka byakulya; na mango nda gakugerakwo, kuhika omanye oku Olengerire agwerhe obuhashe oku burhegesi bw'abantu na oku anabuhe oyu alonzize. ³³ Honaho Omwanzi gwahikirira kuli Nebukadeneza. Ahinvwa omu bantu, akalya olubala nka nkafu, omubiri gwage gwakajoma oku lumè lw'emalunga, guhika enviri zage zakula nka shala za nyunda, na enyunu zage nka za rhunyunyi. ³⁴ Enyuma ly'akasanzi kalirhegesirwe, nie, Nebukadeneza, nagalamira emalunga, na obwenge bwagaluka. Nakuza Olengerire, na gashaniza n'okuhana irenge okulya olamire emwakula, na olya oburhwali buli burhwali bwansiku n'amango, na olya obwami bulama iburha okw'iburha. ³⁵ Abantu boshi b'omwigulu barhali kantu embere zage: anajire oku alonzize n'omurhwe gw'emalunga na abikala b'omwigulu, na ntaye wankasimika oku kuboko kwage na wakaderha: bici ojijire? ³⁶ Omwagomango, obukenggere bwangaluka; irenge ly'obwami bwani, olukengwa n'oburhwali bwani byangalulirwa, abahanuzi bani n'abarhegesi bani bacirimpuna; nayimikwa omu bwami bwani, na oburhwali bwani bwayushuka. ³⁷ Bunola, nie, Nebukadeneza, ncikumbire, mparamize, na mpanyire irenge oku mwami w'amahanga, olya ebijiro byage biri by'okuli n'enjira zage nshinganya, na wakahonola ngasi bagenda oku bwibone.