¹ Mwami Nebukadeneza ajira enshushano y'amasholo, ya bipimo makumi galindarhu oku buli na bugali bwa bipimo ndarhu. Ayiheba omu lubanda lw'e Dura omu murhundu gwe babeli. ² Mwami Nebukadeneza ahamagala abakulu b'abasirika, abaganda, abarhegesi, abazuzi bakulu, ba mushoho, abatwi b'olubanja, abazuzi, n'abarhegesi b'emirhundu, mpulyo bacikumba enshushano mwami Nebukadeneza ayimanzize. ³ Lero abakulu b'abasirika, abaganda n'abarhegesi,abazuzi bakulu, ba mushoho, abatwi b'olubanja, abazuzi na ngasi bimangizi b'emirhundu, bashimanana okujirira eyo nshushano mwamwi Nebukadeneza ayimanzagya, olusiku lukulu. Bayimanga embere ly'enshushano ayimanzize Nebukadeneza. ⁴ Omulalisi ayakuza okw'izu linene: mulolage ebi bamurhegesire, mbaga, mashanja, bantu bangasi luderho! ⁵ Hano munayunva izu ly'omushekera, n'ensirimbi, ecidari, engoma, empanda, olulanga na izu lyangasi lubero lya nzihwa, muna yunamirize na munacikumbe enshushano y'amasholo mwami Nebukadeneza ayimanzize. ⁶ Orhonayishi yuname n'okucikumba ayishikwebwa honaho omw'iberekana ly'omuliro. ⁷ Byobyarhumire, amango abantu boshi bayunva omushekera, ensirimbi, ecidari, engoma, empanda, olulanga na ngasi cirugu cakuziha nzihwa, embaga zoshi, amashanja,n'abantu bangasi luderho bayunama bacikumba enshushano mwami Nebukadeneza ayimanzagya. ⁸ Okwebyo, na omwako kasangi, bakalidayo baguma bayegera n'oku songera abayahudi. ⁹ Barhol'obuderhe na okubwira mwami Nebukadeneza: mashi mwami, olame ensiku zoshi! ¹⁰ Wahanyire irhegeko lidesire oku ngasi yeshi wayunva izu ly'omushekera, n'ensirimbi, ecidari, engoma, empanda, olulanga na ngasi izu, agwasirwe ayuname n'oku cikumba enshushano y'amasholo. ¹¹ Na oku ngasiyeshi orhayunamiri n'okucikumba ayishikwebwa omw'iberekana ly'omuliro. ¹² Nobwo, hali abayahudi wahire obuganda bwa omurhundu gw'e Babeli, Shadraki, Meshaki na Abed Nego, bantu barhacigonza we, mashi mwami; barhakolera ba mungu wawe, na barhacikumbire enshushano y'amasholo wayimanzagya. ¹³ Lero Nebukadeneza, agaya anaba burhe, arhegeka oku balerhe Shadraki, Meshaki na Abedi Nego. N'abobantu balerhwa embere za mwami. ¹⁴ Nebukadeneza arhola obuderhe ababwira: K'oku bulonza bwinyu, Shadraki, Meshaki na Abedi Nego, murhali mwakolera ba mungu wani, na murhali mwacikumba enshushano y'amasholo nayimazagya? ¹⁵ Mucirheganyagye bwonobuno, na hano munayunva izu ly'omushekera,n'ensirimbi, ecidari, engoma, empanda, olulanga na ngasi izu lya nzihwa, mwayishi yunama n'okucikumba enshushano najiraga; na nkaba murhacikumbiriyo, mwayishikwebwa honaho omukarhi k'iberekana ly'omuliro. Na ndigi oyo mungu wamulikuza omu kuboko kwani? ¹⁶ Shadraki, Meshaki na Abedi Nego bashuza mwami Nebukadeneza: rhurhacifinjiri oku kushuza kulibyo. ¹⁷ Alaga, Nnamahanga wirhu rhukolera anarhurhesa omw'iberekana ly'omuliro, na anayishirhulikuza omu kuboko kwawe, mashi mwami. ¹⁸ Ciru akaba arhalintyo, omanye, mashi mwami, oku rhurhakolere emyungu yawe, na oku rhurhacikumbe enshushano y'amasholo wayimanzagya. ¹⁹ Byarhuma Nebukadeneza ayunjula mutula, n'amalanga gahinduka anahindamukira Shadraki, Meshaki na Abedi Nego. Acirishubirira anarhegeka baguse omuliro omw'iberekana kalinda kulusha okubyalikwanine liyake. ²⁰ Na anarhegeka bagumabaguma ba cirimisi omu basirika bage oku bashweke Shadraki, Meshaki na Abedi Nego, na oku bakweba omw'iberekana ly'omuliro. ²¹ Abobalume bashwekwa n'emishangi yabo, n'ebishuli byabo, n'amagoti gabo na ngasi myambalo baliyambirhe, na bakwebwa omukarhi k'iberekana ly'omuliro. ²² Bulya irhegeko lya mwami lyali likali, na bulya iberekana lyalidurhubire bwenene, engulumira yayirha abantu bakwebagamwo Shadraki, Meshaki na Abedi Nego. ²³ Na abo balume basharhu, Shadraki, Meshaki na Abedi Nego, bahirima omukarhi k'iberekana ly'omuliro. ²⁴ Lero mwami Nebukadeneza ayoboha, na azuka dubaduba. Arhol'obuderhe, anabwira abahanuzi bage: karhurhakwebire omukarhi k'omuliro bantu basharhu bashweke? Bashuza mwami: ntyo kwobinali, mashi mwami! ²⁵ Acirishubirira aderha: mashi, mbwine bantu bani barhali bashweke balibalambagira omukarhi k'omuliro, na barhalikwo luga; na enshusho y'owakani eshure omwana w'emyungu. ²⁶ Buzinda Nebukadeneza ashegera oku muhango gw'iberekana ly'omuliro, anarhola akanwa aderha: Shadraki, Meshaki na Abedi Nego, bakozi ba Nnamahanga mukulu, muhuluke munayishe! Na Shadraki, Meshaki na Abedi Nego bahuluka omu muliro. ²⁷ Abakulu b'abasirika, abaganda, abarhegesi n'abahanuzi ba mwami barhimanana; babona oku omuliro gurhagwerhe buhashe oku mibiri y'abo bantu, oku enviri z'ebirhwe byabo zirhahire, na oku emyambalo yabo erhasherire, na oku ibaya ly'omuliro lirha bahisirekwo. ²⁸ Nebukadeneza arhola obuderhe aderha: Nnamahanga wa Shadraki, Meshaki na Abedi Nego aj'irenge, yewarhumire malaika wage n'okurhesa abakozi bali mw'ikubagire, na bahemukiraga irhegeko lya mwami n'okuhana emibiri yabo ahalih'okucikumba owundi mungu orhali Nnamahanga wabo. ²⁹ Lolaga irhegeko mpanyire buno: ngasi muntu, wa ngasi lubaga, ishanja erhi luderho oli, wayishiderha kubi kuli Nnamahanga wa Shadraki, Meshaki na Abedi Nego, ayishi vungunyulwa, na enyumpa yage ehindulwe ntumbi ya nyangara, bulya ntaye undi mungu wankaciza nkayè. ³⁰ Enyuma ly'ebyo, mwami ayimika Shadraki, Meshaki na Abedi Nego omu murhundu gw'e Babeli.