¹ Omwaka gwakabirhi gw'oburhegesi bwa Nebukadeneza, Nebukadeneza alorha ebilorho. Omurhima gwage gwa lugurha, arhacihuniraga. ² Mwami alalika abalaguzi bage boshi, abasagasi, abokuhamula n'abakalidayo, mpulyo bamubwira ebyobilorho. Bakayisha, n'oku ciyeyrekana embere za mwami. ³ Mwami ababwira: nalosire ebilorho; omurhima gwani gulugusire, nalisimire manye ebyo bilorho. ⁴ Abakalidayo bashuza mwami omu luderho lw'e eciharamea: Mashi mwami, olame ensku zoshi! bwira bambali bawe ebilorho, n'irhu rhwa kuhugulirabyo. ⁵ Mwami arhol'obuderhe ashuza abakalidayo: ebintu byampezire; erhi akaba murhamanyisizi ebilorho n'amahugulo, mwasherezibwa, n'enyumpa zinyu zijirwe nka cirhumbi ca nyangara. ⁶ Cikwone erhi mwakambwira endorho n'amahugulo gayo, mwakamarha kulinie oluhembo, n'ishungwe, na lukengwa lunene. Byobirhumire mumbwire ebilorho n'amahugulo gabyo. ⁷ Bacirishuza bwakabirhi: Mwami abwire bambali bage ebilorho, nirhu rhwabihanira amahugulo. ⁸ Mwami acirirhola obuderhe anaderha: Mbwine, okunali, oku mulonzize mugeze akasanzi, bulya mubwine oku byampezire. ⁹ Erhi akaba murhamanyisizi ebilorho, irhegeko liguma lyamushweka mweshi,bulya mulonzize mucirheganye oku mbwira obunywesi n'ebirhahali, omukulinda akasangi kahinduke. Byobirhumire mumbwire ebilorho, na manye oku mwanamanya mwampa amahugulo. ¹⁰ Abakalidayo bashuza mwami: ntaye muntu ahigulu wakahasiderha ebi mwami ahunyire; na ciru mwami, mukulu erhi ntwali akabire, ntaye okola ohunyire ebyantyo oku mulaguzi, musagasi erhi mukalidayo. ¹¹ Ebi mwami ahunyire biri biziu; ntaye muntu wakahashi bibwira mwami, erhali myungu, erhalama haguma n'abantu. ¹² Kulibyo mwami aba burhe, anagaya bwenene. Arhegeka oku bahererekeze banabwenge boshi b'e Babeli. ¹³ Irhegeko lya yalagazibwa, abanyabwenge boshi bali hanyirwe okufà, na balonza Danieli n'ababo oku banigwe. ¹⁴ Lero Danieli abwira Arjoki oku bwirhonzi na burhimanya, mukulu wa balanzi ba mwami, ye waliyishire okuniga banyabwenge b'e Babeli. ¹⁵ Arhola obuderhe na okubwira Arjoki, murhegesi wa mwami: bulyagurhi irhegeko lya mwami liri lidarhi ntya? Arjoki ahugulira Danieli emyanzi. ¹⁶ Na Danieli aja emwa mwami, amusengera oku amuhe akasangi lyo aha mwami amahugulo. ¹⁷ Buzinda Danieli ashubira omunyumpa yage, anabwira Hanania, Mishaeli na Azaria eyomyanzi, ¹⁸ Ababwira oku bayinginge obwonjo bwa Nnamahanga w'amalunga, lyo barhaki yirha Danieli n'ababo na abandi banyabwenge b'e Babeli. ¹⁹ Lero ihwe lyafululirwa Danieli omu mabonekezi budufu. Na Danieli akuza Nnamahanga w'amalunga. ²⁰ Danieli arhola akanwa aderha: likuzibwe izino lya Nnamahanga, w'amango goshi! Emwage yo eri obumanyi n'emisi. ²¹ Ye kahindula akasangi n'amango, ye yimula na okuyimika abami, ye hana obumanyi oku banyabwenge na obukengukwe oku bagwerhe obwenge. ²² Anafulule ebiri emuhengere na bifulike, amanyise ebiri omu mwizizi, ,na obulangale haguma balama. ²³ Nnamahanga wa ba larha, nkuir'irenge na nkukuzize bulya wampire obumanyi n'emisi, na oku wamanyisize ebi rhwakuhunaga, oku warhufululire ihwe lya mwami. ²⁴ Enyuma zaho, Danieli aja emwa Arjoki, olya mwami alirhumire okuyirha abanyabwenge b'omu Babeli; agenda, anamubwira ntya: orhyirhe abanyabwenge b'e Babeli! Ompeke emwa mwami, na naha mwami amahugulo. ²⁵ Arjoki aheka Danieli dubaduba embere za mwami, anamubwira ntya: nabwine omu mpira z'e yudea muntu muguma waha mwami amahugulo. ²⁶ Mwami arhola obuderhe abwira Danieli, bakagi hamagala Belshazari: kawahasha oku manyisa ebilorho nalosire n'okumpa amahugulo? ²⁷ Danieli ashuza embere za mwami aderha: ebi mwami adosize liri ihwe abanyabwenge, abasagasi, abalaguzi, abokuhamula barhahashire oku bimanyisa mwami. ²⁸ Cikwone omu malunga muli Nnamahanga okafulula amahwe, na ye manyisize mwami Nebukadeneza ebwayishibà omu mango ganayishe. Alaga ebilorho byawe n'amabonekezi wabwine ene ogweshire. ²⁹ Oku nshingo yawe, we mwami, entanya zakuyishire okucidosa bici byayishibà enyuma za gano mango, na olya okafulula amahwe anakumanyisize ebyayishibà. ³⁰ Erhi akaba eryo ihwe lyanfululirwe, kurhalikuderha mpu mulinie muli obumanyi burhalusire obw'abantu boshi balamire; ci lyo amahugulo gahabwa mwami, na lyomanya entanya z'omurhima gwawe. ³¹ We mwami, wakagisinza, na wanabona enshushano nene; eyo nshushano yali nene, na ya kulangala okusomerine; yali yimanzire emalanga gawe, na okuboneka kwayo kwali kwa kuyobohya. ³² Irhwe ly'eyo nshushano lyali lya masholo gacire, n'ecifuba n'amaboko byali bya nfaranga, enda n'entege zali za marhale. ³³ Amagulu gayo gali ga cuma, na ebisenyi, luhande luguma cuma n'olundi luhande ibumba. ³⁴ Wakagisinza, ene ibuye lyatwikaga buzira okuboko okuciza, lyashurha ebisenyi by'ecuma n'ibumba by'eyo nshushano, na lyama ishambula. ³⁵ Lero ecuma, ibumba, amarhale, enfaranga n'amasholo, bya vungunyuka haguma, na byayorha nka kabumbu karhezire omu cihwanja omu canda; empusi yama biyehula, na ntabyo byacibonesire. Cikwone ibuye lyahirimiraga enshushano lyahinduka ntondo nene, lyayunjuza igulu lyoshi. ³⁶ Ebilorho ebyo. Rhwahana amahugulo embere za mwami. ³⁷ We mwami, oli mwami w'abami, bulya Nnamahanga w'amalunga okuhire oburhegesi, obuhashe, emisi n'irenge; ³⁸ Ahebire omu maboko gawe, ngasi hoshi, bene bantu, ensimba z'emuzirhu, orhunyunyi rhw'emalunga, oku jijire obirhegeke byoshi: we oli irhwe lya masholo. ³⁹ Enyuma zawe, hayishi yinuka obundi bwami, bwangu kulusha obwawe; nakandi obundi bw'akasharhu, bwobwayishiba bwa marhale, na bwayishi rhegeka igulu lyoshi. ⁴⁰ Hayishibà obwami bwa kani, buzibu nka cuma, nkakulya ecuma civuna n'okutwa byoshi, cayishivuna n'okutwa byoshi, nkoku ecuma civungunyula byoshi. ⁴¹ Na nkoku wabwine ebisenyi n'amano luhande lw'ibumba lya mubumbi, na oluhande cuma, obwo bwami bwayishi berulukana, cikwone hayishiboneka mulibwo oburhwali bw'ecuma, bulya wabwine ecuma cgushe omu ibumba. ⁴² Na nkoku amano g'amagulu gali luhande cuma na luhande ibumba, obwo bwami bwayishiba n'oburhwali luhande n'obuzamba luhande. ⁴³ Wabwine ecuma cigushe n'ibumba, bulya byayishi cigusha oku ndagano z'abantu, ci birhaka gwarhana muguma oku wabo, nkoku ecuma cirhakagwarhana n'ibumba. ⁴⁴ Omumango g'abo bami, Nnamahanga w'amalunga ayishi zusa obwami burhaka shabuka, burhakana gera oku burhwali bw'olundi lubaga; byayishi vuna n'oku hererekeza ago mami goshi, na bwone bwayishi rhegeka amango goshi. ⁴⁵ Byobiyerekine ibuye wabonaga lyatwika oku ntondo buzira burhabale bwa kuboko, na okuvuna ecuma, amarhale, ibumba, enfaranga n'amasholo. Nnamahanga mukulu amanyisize mwami ebikwanine oku yisha enyuma zage. Ebilorho biri bw'okuli, n'amahugulo gabyo gali g'okunali. ⁴⁶ Lero mwami Nebukadeneza ahirima emalanga gage ana sengera embere za Danieli, anarhegeka oku bamujirire enterekero n'amarashi. ⁴⁷ Mwami abwira Danieli anaderha: okunali, Nnamahanga winyu ye Nnamahanga wa ba mungu, na Nawabo w'abami, anafulule amahwe, bulya wahashire okufulula er'ihwe. ⁴⁸ Na buzinda mwami ashonya Danieli, na amuha luhembo lunene na lwa cishingo; amuha n'eri irhegeko oku cihugo coshi c'e babeli, ana muyimika murhegesi wa banyabwenge boshi b'e Babeli. ⁴⁹ Danieli ahuna mwami ahebe oburhegesi bw'ebabeli kuli Shadraki, Meshaki na Abed Nego. Na Danieli ali ahabwami.