¹ Nnahamwirhu, Nnamubaho, Antumira aga mabonekezi. Lolaga, lurhanda lwa malehe ga canda. ² Anaderha: bici obwine, Amosi? Nashuza: lurhanda lwa malehe. Na Nnamubaho ambwira: obuzinda buyishire oku lubaga lwani Israeli, ntanakaci lubabalira. ³ Omwagomango, enyimbo z'omubwami zayishire ndulu, kwo Nnahamwirhu, Nnamubaho adesire; bayishikweba hoshi bwifulikwa birunda binji. ⁴ Yunvirhiza bino, mwemulimwalibuza orhagwerhi buhashe, na okubonera omugalaganda omucihugo! ⁵ Mwemuderha: mangaci omwibalukwe gwagera, lyorhuguza engano? Mangaci esabato yagera, lyorhuyigula enguli? rhwanyihya olugero, rhuyushule n'ecishingo, na omunzani rhuguturube lyo rhunywerha; ⁶ nakandi rhwayishigula abagalaganda oku nfaranga, na omukenyi oku kugulu muguma kwa birato, na rhwayishi guza ensheke z'engano. ⁷ Nnamubaho acigashire okw'irenge lya Yaobo; ntakayibagira emikolo yabo yoshi. ⁸ Ecihugo, enyanya z'amaligo ka cirha sherere; na karhwe nka bacikala bamwo karhurhaje omu mishibo? Ecihugo cayinamuka coshi nka lwishi lw'e Misiri. ⁹ Omwagomango, Nnahamwirhu, Nnamubaho adesiren nayishi zikiriza izuba mulegerege, na igulu libemwo omwizizi kalengerere. ¹⁰ Nayishi hindula amadinye ginyu mishibo, n'enanga zinyu zoshi ndulu, na enziha zinyu zibwikwe ba busunzu, n'amarhale ginyu gabe ga luhala, nayishiheba ecihugo omu mishibo nk'ohezize omwana muguma, na obuzinda bwage buyorhe nka lusiku lwa malibuko. ¹¹ Lolaga ensiku ziyishire, kwo Nnahamwirhu, Nnamubaho adesire, amango nalerha ecizombo omucihugo, arhali kubulirwa mugati erhi nyorha, cikwone ishali na nyorha yakuyunva omwanzi gwa Nnamubaho. ¹² Bayishibà bakulabira nyanja oku yindi, kurhenga enyana kuja ebushoshokero, bayishi ngasi hoshi okulonza omwanzi gwa Nnamubaho, ci barhaka gubona. ¹³ Omwagomango, abanyere binjà n'emisole bayishifà n'enyorha. ¹⁴ Bali bacigasha oku byaha by'e Samariya, naokuderha: Nnamahanga wawe alame, Dani! Enjira y'e Beri Sheba elame! Cikwone bahirima, barhakacizuka.