¹ Buhanya okubarhulirire omu sioni, na buzira coba omuntondo y'e Samariya, okuwabo bakulu b'ishanja lirhanzi, eryamunda enyumpa y'israeli bakajà!... ² Mugere e Kalne mulole, kugendekera kuhika e Hamati nkulu, muyandagalire e Gati emw'abafilisti: k'eyomirhundu y'egendekire kulush'amami ginyu gombi? k'enciga zabo zo ngali kulusha ezinyu?... ³ Murhanywe mpu muli hali n'olusiku lw'obuhanya, na mulimwayegereza oburhegesi bw'obulyalya. ⁴ Banacigwesheze oku nshingo z'amahembe ga Tembo, n'okucigalika oku bibwikwa byabo; balibalya ebyanabuzi by'ebishwekwa, n'amanina mashushagize. ⁵ Banacigalanganze okw'izu ly'olulanga oku buhwinja, n'okumanya mpu bali balenga nka Daudi oku nzihwa. ⁶ Banaywere amanvu omu bikombe bigali, n'okucishiga amavurha minja, na barhabera burhe amaligo ga Yusufu. ⁷ Byobirhumire bayishihekwa barhanali omu mpira; na ecihogero c'obushagaluke bwabo cihulike. ⁸ Nnahamwirhu, Nnamubaho acigashire kuli yene, Nnamubaho, Nnamahanga w'emirhwe, adesire: ngayire obwibone bwa Yusufu. Ngayire n'enyumpa zage; nayishihana omurhundu na ngasi ebirimwo. ⁹ Na erhi hakasigala Bantu ikumi Omunyumpa, banigwa. ¹⁰ Amang'omubushi arhola ecirunda c'omwana oku cisiiza, n'oku kula ebivuha omunyumpa, ayishibwira ociri ebwinini omunyumpa: kahali oyu mucirimweshi? na ly'omuntu ashuze: ntaye...n'owabo amubwire: hulika! garhali mango ga guhubula izino lya Nnamubaho gano. ¹¹ Bulya lolaga: Nnamubaho alikwire; na ahirimiza enyumpa nene kw'obuhanya, na enyumpa nsungunu eshabulwe. ¹² K'ebiterusi binalibirhe okw'ibuye linene, kabanahingakwon'empanzi, mpulyo muhindula obushinganya bwoge, n'amalehe g'obushinganya masira? ¹³ Mwe mulimwacishingira ebirhahali, n'okuderha: kerhalimisi yirhu rhwahabagwa oku burhwali? ¹⁴ Byobirhumire lolagi, nayishi kuhindukira, nyumpa y'israeli, Nnamubaho adesire, Nnamahanga w'emirhwe; ishanja lyayishi murhindibuza kurhangira e Hamati kuhika oku mugezi gw'irungu.