¹ Yunvirhiza guno mwanzi, guno mwidudumo ndesire kulimwe, nyumpa y'israeli! ² Anahirimire, arhakanacizuka, omubikira w'israeli, Agweshire okw'idaho na ntaye wamuzusa. ³ Bulya ntya kwo Nnahamwirhu, Nnamubaho adesire: omurhundu gwakaheba balume cihumbi omunciga, gwaberana igana, na ogwakagi heba igana omunciga gwaberana ikumi lyone, okunyumpa y'israeli. ⁴ Bulya ntya kwo Nnamubaho adesire okunyumpa y'israeli: munonze, na mwalama! ⁵ Murhalonze Beteli, murhaje n'e Gilgali, murhagere n'e Bere Sheba. bulya Gilgali aba mpira, na Beteli asherere. ⁶ Mulongereze Nnamubaho, na mwalama! muyobohe oku arhagwarhe nka muliro enyumpa ya Yusufu, na okugwo muliro gurha yoce, buzira omuntu e Beteli okuguzimya. ⁷ Mashi mwemukahindula obushinganya bubu, n'okuli mukulabarhe okw'idaho! ⁸ Ye walemaga entonde na Orioni,anahindule ecihoho c'olufu, muceracera, omushi anaguhindule budufu, anahamagale amishi omunyanja, anagashandaze omw'igulu: Nnamubaho ly'izino lyage. ⁹ Anazukize obuhanya oku ntwali, na obuhanya buyishe oku bwakiro. ¹⁰ Banagaye oliwabahanula omu lugo, n'okuyoboha oliwaderha okuli. ¹¹ Nakandi, bulya mwabonire engonyo, na mwayankirira engano now cituliro kuliye, mwayubaka n'enyumpa z'amabuye mashongole, ci murhazihandemwo; mwarhwezire emizabibu minja, ci murhanywe oku cinywebwa cago. ¹² Bulya, nkumanyire; amahushe ginyu talk manji, ebyaha binyu biyushusire; munabonere omushinganya, munayankirire ebituliro, n'okubonera omukenyi ahamwage. ¹³ Byobirhuma, amango gantya, omunyabwenge anahulike, bulya gali mango mabi. ¹⁴ mulongereze aminja ci barhali mabi, lyo mulama, na lyo Nnamubaho, Nnamahanga w'emirhwe, aba haguma ninyu, nkoku mukudesire. ¹⁵ Mugaye amabi musime aminja, muhebe obushinganya omumwabinywe; na ankabà Nnamubaho, Nnamahanga w'emirhwe, ababalira emisigala ya Yusufu. ¹⁶ Byobirhumire, ntya kwo Nnamubaho, Nnamahanga w'emirhwe, Nnahamwirhu adesire; ngasihoshi balibaciduduma, omu mirimbwa yoshi bayisiderha: mashi! mashi! bayishihamagala omuhinzi oku mishibo, na abayishi yama okulaka. ¹⁷ Omumpingiro zoshi bayishi yama, amango nagera emwawe, kwo Nnamubaho adesire. ¹⁸ Buhanya okubalibacifinja olusiku lwa Nnamubaho! Bici muliwalindirira olusiku lwa Nnamubaho? lwayishiba lwa mwizimya cilurhali lya bulangashane. ¹⁹ Mwayishiyorha nka muntu wayaka entale arhimane namugunga, ajira mpu agwarhe oku lukuta, enjoka emulume. ²⁰ k'olusiku lwa Nnamubaho lurhali lwa mwizimya c'arhali bulangashane? kalurhali lwa mwizizi carhali kamole? ²¹ Ntasimiri, nangayire amadinye ginyu, ntankayunva n'entimanano zinyu. ²² Erhi mukanderhera entulo n'enterekero, zirhaka nsimisa, n'amanina gashushagire mwayishi ntulira oku kukuza, ntayishi zisinzekwo. ²³ Muntenzeho olubi lw'enyimbo zinyu; ntankayunva izu ly'enanga zinyu. ²⁴ Cikwone obushinganyanya buyorhe nka nshalalo ya mishi, na okuli nka lwishi lurhakagana. ²⁵ Kamwantulire enterekero, amango g'emyaka makumi gani omw'irungu, nyumpa y'israeli?... ²⁶ Muntengeze ihema lya mwami winyu, na ebikomero by'enshushano zinyu, entonde ya mungu winyu mwacijiriraga mwene. ²⁷ Na nayishimuheka mpira kurhaluka e Dameske, kwo Nnamubaho, ye izino lyage ali Nnamahanga w'emirhwe.