¹ Petro na Yohana banaciba bali baganiz'olubaga, hayulubukira abagula, n'omwimangizi wa Kanamuzinda, n'abasandukayo, ² bagaya ebibakagiyigiriza olubaga, bulya bakagi yigiriza olubaga kugerera Yezu obufuke bw'abàfîre. ³ Honaho banabagwarha n'okubakwebab'omumpamikwa kuhika bwaca; bulya byalikola bijingo. ⁴ Cikwone, banji babalya baliyunvirhize eyo myanzi bayemera, n'omuganjo gw'abalume gwahika hofi bihumbi birhanu. ⁵ Erhi buca, abakulu b'olubaga, abagula n'abandisi, banaci shimanana eyeruzalemu, ⁶ na Ana, mudahwa mukulu, Kayafa, Yohane, Alexandre, nabandi Bali bomu buko bwaba kulu baba dahwa. ⁷ Bahirwa ekagarhi kabo Petro na Yohane, banacibadosa: Erhi oku buhashe buci, Erhi oku izino lyandi mwajiraga kulyalira? ⁸ Lero Petro, ayunjuzibwa na Mûka Mutagatifu, anaci babwira erhi: Mwe bakulu b'olubaga, na ninyu mwe bakulu b'Israeli, ⁹ bulya rhudosibwe ene oku minja rhwajiriraga omuntu wali mulwala, mpu lyo rhuderha okwafumaga mwo, ¹⁰ mukumanyage mweshi, ciru n'olubaga lw'Israeli lukumanyage! Kuli okw'izino lya Yezu we Nanzareti, olya mwa yirhaga, na Nnamahanga amufula kurhenga omu bafu, kugerera oyo kwokwarhumire oyula muntu abaneneka akola mugumana emalanga ginyu. ¹¹ Yezu lyo lir'ibuye lya kabuliragwa namwe nka bubasi,Lyo lyanayishiri hinduka ibuye lya kagonyero k'enyumpa. ¹² Nantawundi obucire bwankarhenga kwo; bulya enigulu erhali lind'izino lyahirw'abantu, lyankarhuciza. ¹³ Erhi banacibona oburhwali bwa Petro na Yohane, basomerwa, bamanya mpu Bali Bantu bomu mulala gurha yigirizibagwa; bamanya oku Bali haguma na Yezu. ¹⁴ Cikwone erhi babona hofi nabo omuntu wafumaga, barhacigwarhaga byakuderha. ¹⁵ Banacibadosa oku barhenge omweyo ngômbe, Banacibwirana bone na nene, ¹⁶ erhi: Gurhi rhajira bano bantu? Bulya byacilanguline oku bacikala boshi be Yerusalemu oku eci somerine cajirikanaga cajiragwa nabo, nirhu rhurhankacihashi cilahira. ¹⁷ Cikwone, lyo ecocijiro cirhalumire bwenene omulubaga, rhulahire n'obukali okulirhaciderhagwa elyo'izino ciru n'omuntu muguma. ¹⁸ Banabahamagala, bana balahirira n'obwalagale okurhaciderhe n'okuyigiza okw'izino lya Yezu. ¹⁹ Petro na Yohane, babashuza mpu: Mulutwe erhi bikwanine, emalanga ga Nnamahanga, abe mwerhukenga kulusha Nnamahanga; ²⁰ bulyalira rhurhankaleka okurhaderha ebirhwabwine n'ebirhwa yunvirhe. ²¹ Banacibakalihira, n'oku bashwekûla, babula Gurhi babahana, erhi lubaga lurhuma, bulya boshi bakagi kuza Nnamahanga oku byo byajirikine. ²² Bulya omuntu wajiriragwa eco cisomeza aligwerhe hofi myaka makumi gani na kulusha. ²³ Enyuma ly'okushwekulwa, bagenda emwabo, baja baderha ngasi byoshi abakulu b'olubaga n'abagula ebibakaderha. ²⁴ Erhi bayunva ntyo, banacishonya îzù emwa Nnamahanga boshi muguma, banaciderha erhi: Nahamwirhu, we walemaga amalunga, n'igulu, enyanja, na ngasi byoshi biba-mwo, ²⁵ Wene we waderhaga kuli Mûka Mutagatifu, oku kanwa ka Larha wirhu, omurhumisi wawe Daudi erhi: Bulya gurhi embaka omu karhi k'amashanja, n'entanya mbi omu lubaga? ²⁶ Abami b'igulu bayimuka, abarhwali bacihebire haguma mpu boshi balwisè Nnahamwirhu n'omugwa amavurha wage. ²⁷ Ciru, bashimbire n'omu Cesibwa mukozi wawe Yezu, olya washigaga, Herodi na Posio Pilato bacigushire boshi haguma muli omw'ogo murhundu n'embaga zoshi z'Israheli, ²⁸ lyo bajira byoshi okuboko kwawe n'ihano lyawe byarheganyize. ²⁹ Natya, Nnahamwirhu, ololage okula baja bacigenza, ohe n'abarhumisi bawe obuhashe bwokuyigiriza akanwa kawe buzira coba, ³⁰ olambule okuboko kwawe, kufumye abalwala, ebisomerine n'ebirhangazo, okw'izino ly'omurhumisi wawe mcesibwa Yezu. ³¹ Erhi baba bagwerhe bashenga, ahantu bali hagera mw'omusisi; n'abo boshi bayuzibwa Mûka Mutagatifu, banayalagaza omwanzi gwa Nnamahanga buzira bwoba. ³² Abo boshi bayimire Bali gwerhe murhima muguma na ntanya nguma. Ntaye wakagi derha oku ebyagwerhe biri byage yene, ci ngasi hyoshi hyali boshi. ³³ Entumwa zanaiyalagaza n'emisi minji obufuke bwa Nnahamwirhu Yezu. N'olukogo lunene lwaba kulibo boshi. ³⁴ Bulya mulibo murhali oli buzibe kantu: ngasi boshi baligwerhe amashwa erhi nyumpa bakabiguza, banacikalerha engulo y'ebi baguzize, ³⁵ n'okuka biheba aha magulu gw'entumwa; banagabirage ngasi muguma nk'oku amalagirire gage ganali. ³⁶ Yusufu, y'entumwa zayirikaga mpu ye Barnaba, kwokuli kuderha mwana w'oburhulirizi, Muleviti, muburhwa w'Ekipro, ³⁷ aguza ishwa aligwerhe, n'engulo ayilerha, ayihira ahamagulu g'entumwa.