¹ Petro na Yohana banasokeraga bombi mu Kanamuzinda, akasanzi kamahuno: hali ahansa mwenda. ² Hali haba omulume wecirema kurhenga okuburhwa, bakagimuheka n'okumuheba ensiku zoshi aha muhango gwakanyamuzinda gwakagi hamagalwa muhango mwinja, lyakahuna enterekero oku boshi bakagija omu Kanamuzinda. ³ Oyo muntu, abona Petro na Yohana balikola badahamo, anabahuna enterekero. ⁴ Petro, naye Yohana, banacimurhulir'amasu, n'okuderha erhi: Rhulole-kwo. ⁵ Naye anabalolereza bwenene, analingirire okuyankirira ebi bamuha. ⁶ Lero Petro anacimubwira erhi: Ntagwerhi nfaranga, n'enoro; ci ebingwerhe, byonakuha: okw'izino lya Yezu-Kristo w'Enanzariti, oyimuke ona gende. ⁷ Anamugwarha n'okuboko kw'elulyo, anamuyimusa. Honaho, amagulu gage n'enshando zage byana gwarhana; ⁸ kwonakuhama anayimanga, anarhwangira agenda. Anadaha boshi omu Kanamuzinda, ajagenda, anajahama, n'okukuza Nnamahanga. ⁹ Abantu boshi banabona okwajagenda anajakuza Nnamahanga. ¹⁰ Bamanyirira oku alyulya wakagi baadahire aha muhango mwinja gwa Kanamuzinda ahunirahw'enterekero, bana cisomerwa n'okucidosa ahanyanya ly'ebya muhikirire. ¹¹ Nk'oku arhacirhengaga-ho Petro na Yohana, olubaga lwoshi lwarhangîre lwakunjukira emunda bali, omu kagombe kaderhwa ka Sulemani. ¹² Petro, erhi abona ntyo, Lero abwira olubaga: Mwebantu b'Israeli, bulya gurhi musomirwe n'ebi? Bulya gurhi murhuhenekîre, nkakuno buhashe bwirhu rhwene erhi bwonjo bwirhu rhwagendesagya mw'oyu muntu? ¹³ Nyamuzinda w'Abrahamu, w'Isaki nawa Yakobo, Nyamuzinda waba larha, anakuzize omukozi wage Yezu, olya mwaguzagya n'oku mulahira embere za Pilato, wali mpu amushwekûle. ¹⁴ Mwalahire Omucesibwa na w'Okuli, mwahuna aba omunizi ye mufalukogo. ¹⁵ Mwaisire omurhwali w'obulamu, ye Nyamuzinda afula omu bafu; rhuli bahamirizi. ¹⁶ Oku bwemere kugerer'izino lyage izino lyage lyamamuhiramw'emisi oyu mulimwabona muna mumanyire; n'omwobyo bwemere kuli ye bwo bwahire oyu muntu w'eriburha okufuma, embere zinyu mweshi. ¹⁷ Cikwone, bene-wirhu, mmanyire oku ebi mwabijijire omukurhamanya, ciru n'abarhambo binyu. ¹⁸ Ci Nnamahanga ahikiriza eby'alidesire oku kanwa kabalebi, oku Kristo wage ayishi libuzibwa. ¹⁹ Muciyunjuzagye munagokole, ly'ebyaha binyu birhenzibwa, lyo akasanzi k'omurhula kayisha emwa Nnahamwirhu, ²⁰ n'oku murhumira oyu mwalaganyibagwa, Yezu-Kristo, ²¹ ye y'olya wayankirirwa omu mpingu kuhika akasanzi k'okuyumanyanya kwa byoshi, bilya Nnamahanga aderhaga mira omu kanwa k'abalebi bacesibwa. ²² Musa adèsire erhi: Nnahamwirhu Nnamahanga winyu anàfûle muguma muli bene-winyu mulebi akâni; mwayishi muyunva oku byoshi anámubwire, ²³ na ngasi orhankuyunva oy'omulebi ayinirwa omu karhi k'olubaga. ²⁴ Abalebi boshi balishimbulirine baderha, kurhenga kuli Samweli, nabo bâdesire ago mango. ²⁵ Muli bana babalebi na bacirqgane cirya Nnamahanga alaganyanyagya na balarha, erhi abwira Abrahamu mpu: Emilala yoshi yen'igulu yanagishwe kugerera iburha lyawe. ²⁶ Emwinyu burhangiriza Nnamahanga, afuzire y'omukozi wage, anamurhuma mpu amugishe, anarhenze ngasi muguma omu bijiro byage bibi.