¹ Olusiku lwa Pentekoste, boshi bali bacigushire hantu haguma. ² Caligumiza kwayisha empingu ecihogero ciri nka ca mpusi ndarhi, cayunjuza enyumpa bali mwo. ³ Orhumole, rhushushire orhumole rhw'omuliro, rhwabayishira, rhugabikine ngasi hyo kwahyo, rhwaja oku ngasi muguma. ⁴ Boshi banayunjuzibwa na Mûka Mwimana, banarhangira okuderha oku nderho zindizindi, nkoku Mûka ali bahashisize. ⁵ N'obwo, e Yerusalemu erhi yali abantu bayoboha Nnamahanga, barhengaga omu mahango g'enigulu. ⁶ Erhi bayunva eco cihogero, eyo ngabo y'abantu yaciheba haguma, basomerwa erhi bayunva entumwa ziri zigwerhe za shambala ngasi muguma omu luderho lwage. ⁷ Bayoboha boshi bana somerwa, mpu: K'aba bantu bagwerhe baderha barhali b'e Galilaya boshi? ⁸ Gurhi rhugwerhage rhwabayunva ngasi muguma omu luderho lwirhu, luderho lw'eka? ⁹ Abaparti n'Abamedi n'Abalamiti, abantu, b'e Mezopotamiya, n'abe Yudea, abe Kapadosiya, n'abe Ponti n'abe Aziya, ¹⁰ abe Frijiya, n'abe Parifiliya, n'abe Misiri, n'ab'ebihugo bye Libiya biba omu lubibi ne sirene, n'aba rhengaga e Roma, Abayahudi n'abashimbulizi, ¹¹ Abakereti n'abarabu, rhweshi rhweshi rhugwerhe rhwayunva baderha ebirhangaza bya Nnamahanga omu nderho zirhu? ¹² Boshi bagwarhwa n'obwoba, barhangala banaka bwirizanya, mpu: lero kwo kurhi oku? ¹³ Chi n'abandi bakabashekera n'okuderha mpu: balalusire idivai ly'omurhobo. ¹⁴ Lero Petero, anayimanga na balya ikumi na muguma, asosa izû, ababwira erhi: Mwe bantu b'e Yudea na ninyu mwe b'e Yerusalemu, mumanye ntya, murhege okurhwiri muyunve bwinja ebinwa byani! ¹⁵ Aba bantu barha lalusiri, nkoku murhanyize, bulya ziciri ns'isharhu z'ecisezi. ¹⁶ Ci kuli kulya kwa derhagwa n'omulebi Yoweli, erhi: ¹⁷ Omu nsiku za buzida, akudesire Nnamahanga, nalumiza omuka gwani oku bantu boshi; bagala binyu n'abanyere binyu baishi leba, emisole yinyu yaishikabona amabonekezi, n'abashosi binyu bashikabon'ebilorho. ¹⁸ Neci, omwezo nsiku, nashi yunjuliza Mûka wani oku bambali bani na bambalikazi bani, bana yishi leba. ¹⁹ Naishi lerha ebirhangaza enyanya omu malunga n'ebisomerine edako omw'igulu; omukô, omuliro, n'omuhusi gw'omûgi; ²⁰ Izuba lyaishi hindamuka omu mwizizi, n'omwezi omu mukô, embere luhike olwo lusiku lwa Nnamahanga, lusiku lunene na lw'irenge. ²¹ Ngasi yeshi wana hamagale izino lya Nnamahanga ashi cizibwa. ²² Bene Izraeli, yunvirhizi eyi myanzi! Yezu w'e Nanzareti, oyo muntu Nnamahanga ahamirizagya emalanga ginyu n'ebisomerine, ebirhangaza n'ebimanyuso ajijire kumugerera omu kagarhi kinyu, nkoku munakumanyire mwe nanene; ²³ Oyo muntu, abantu babi balenganyagya nka kulya Nnamahanga ali arhegesire omu bulonza n'omu bumanye bwage, yoyo muzindi yirha, mwamu bamba oku musalaba. ²⁴ Nnamahanga amufula, n'oku mushwekula omu migozi y'olufu, bulya birhali shinganine ashwekwe nâbo. ²⁵ Bulya Daudi amuderhire mpu: Nali nakabona Nnahamwirhu emalanga gani, bulya ali ekulyo kwani, lyo ntaki shebulwa. ²⁶ Kandi omurhima gwani guli omu mwishingwe, n'olulimi lwani omu busime, n'omurhima gwani gwayishi langalira omu bulangashane, ²⁷ Bulya orhaka lekerera omurhima gwani gwabera omu kuzimu, orhanaka yemera omucesibwa wawe abolera omu nshinda. ²⁸ We wamanyusagya enjira z'obulamu, wayishi nyunjuza obushagaluke hano nkubona. ²⁹ Bene wirhu, nyemererwe oku babwira n'obwalagale, enyanya lya larha Daudi, oku afîre, anabishwa, n'ecusho cage yo cinaciba eno mwirhu kuhika ene. ³⁰ Okuba ali mulebi, anali manyire oku Nnamahanga alimu laganyize n'olwalagale oku ayishi yimika muguma w'omu mulala gwabo oku ntebe y'obwami bwage, 31 Kufuka kwa Kristu alirheganyize n'oku bamanyusa, omu kuderha oku arhanka lesirwe omu bafu n'omubiri gwage gurhankabolire omu nshinda. ³² Ali oyo Yezu Nnamahanga afûlaga; rhweshi rhuli bahamirizi. ³³ Akuzîbwe omu kulyo kwa Nnamahanga, ahabirwe n'ishe Mûka Mwimana alaganyagya, anamurhuma, nkoku munabwine n'oku yunva. ³⁴ Bulya Daudi yehe arhashoneraga omu mpingu, ci adesire yene: Nnamahanga abwira Nnahamwirhu: Damala ekulyo kwani, ³⁵ Kuhika njire abashombanyi bawe obalabarhe kwo. ³⁶ Enyumpa ya Israeli yoshi emanyuse n'obwalagale oku Nnamahanga ajiire Nnahamwirhu na kandi Kristu ye Yezu olya mwa bambaga oku musalaba. ³⁷ Enyuma lyokuyunva eyo myanzi, yabaj'emurhima, banabwira Petero n'ezindi ntumwa erhi: Bene wirhu, kurhigi rhwajira? ³⁸ Petero ababwira erhi: Muci yunjuze, na ngasi muguma winyu abatizibwe okw'izino lya Yezu Kristo, enyanya ly'obu babalire bw'ebyaha binyu; munahabwe enshokano ya Mûka Mutakatifu. ³⁹ Bulya eciragane ciri emwinyu, emw'abana binyu, n'emwa bantu bali hali, n'abanji Nnahamwirhu Nnamahanga wirhu ayishi hamagala. ⁴⁰ Anagendekera ababwira ebindi birhali binyi, mpu: Mmucicize omw'ogu muburho gwani. ⁴¹ Abayemire akanwa kage bana batizibwa, n'olwo lusiku, entumwa zayushuka hofi bihumbi bisharhu. ⁴² Bashibirira omu nyigirizo z'entumwa, omu cinyabuguma, omu kubega omugati, n'omu kusalira. ⁴³ Abantu boshi basomerwa, kushimbana n'ebirhangazo n'ebisomerine binji byakagi jirikana n'entumwa. ⁴⁴ Boshi bali kayemera bali hantu haguma, banali gwerhe byoshi omu cinyabuguma. ⁴⁵ Baka gûza amashwa gabo n'ebirugu byabo, n'oku gabana engulo zabo boshi haguma, kushimbanana n'enyifinjo za ngasi muguma. ⁴⁶ Ngasi lusiku balihaguma n'obushibirizi omu ka Nnamahanga, n'oku ka bega omugati nyumpa oku nyumpa, n'okulya ebilyo byabo omu bushagaluke n'obulembu bw'omurhima, ⁴⁷ Baka kuza Nnamahanga, n'okuhabwa olukogo embere ly'olubaga lwoshi. Na Nnamahanga akayushula ngasi lusiku omu kagombe abakagi yemera.