¹ Ci muntu muguma wakagi hamagalwa Anania, na Safira ye mukage, baguza ebi baligwerhe, ² Basigalana ecirholo c'ebi bali bahire, mukage naye alimanyire okwo; buzinda alerha ebyasigire babirherekeza aha magulu g'entumwa. ³ Petero amubwira: Anania, bulya gurhi Lyangombe anayunjuzize omurhima gwawe, kuhika oku shumira Muka Mucesibwa, n'obwo wafulisire ecirholo c'engulo y'er'ishwa? ⁴ Nka lirhanka guzibwe, ka lirhanka nayosire liri lyawe, aha nyuma ly'oku guzibwa kwalyo, k'eyo ngulo arhali we wali yigwerhe? gurhi wahashire okuhira akanwa kabi ntya oku murhima gwawe. Arhali bantu oshumire, ci Nyamuzinda. ⁵ Anania, omu kuyunva ebyo binwa, anacihirima, anafa. Ecoba cinene cagwarha abaligwerhe baba yunvirhiza. ⁶ Abo busole, bayimuka, bamuboha, bamuheka n'okuji mubisha. ⁷ Enyuma lya lugero lwa nsa zisharhu, mukage naye adaha buzira kumanya ebyahikirire. ⁸ Petero anamudosa: Erhi mbwira, kw'okuli eyi ngulo yo mwanaguzize kw'ishwa? Neci, kw'ashuzize, erhi kuli eyo ngulo. ⁹ Lero Petero amubwira erhi: Bulya gurhi mwalaganine okuyishi rhangula muka gwa Nnamahanga? Lola abarhengi bisha balo, babo bali omu luso, nawe bakuheka. ¹⁰ Hona halya, anahirima aha mmagulu g'entumwa, anafa. Ab'obusole, erhi bakola mpu badahe, bamushimana amafa; bana muheka n'oku mubisha aha burhambi bw'iba. ¹¹ Ecoba cinene cagwarha olubaga lwoshi na ngasi boshi bayunvirhe kuli ebyolalira. ¹² Binji bya kusomeza n'ebirhangaza byajijirwe omu karhi k'olubaga byajiragwa n'entumwa. Bakagi cigusha boshi haguma omu mbaraza ya Sulemani. ¹³ Na nta bandi bacigezire mpu b'abaja mwo; ci kwone olubaga lwaka bakunga bwenene. ¹⁴ Omuganjo gw'abayemire Nyamuzinda balume, n'abakazi gw'akagi yushuka bwenene bwenene. ¹⁵ Ciru bakalerha abalwala omu mihanda n'oku bagwasa oku ncingo n'oku mirhamba lyo hano Petero akola agera ecizungululu cage cone cihike kwo ciru muguma wabo. ¹⁶ Ngabo nyinji yaka libirhira yo, ciru n'abakagi rhenga omu bishagala bya hofi n'Eyerusalemu, bakalerha abalwala n'abantu bali bagwerhwe n'abazimu; boshi banaka fuma. ¹⁷ Ler'omudahwa mukulu haguma n'aba bali boshi, bamanya olunda lw'abasadukayo, banayimuka, bakola bayunjwire bwagalwa, ¹⁸ bagwarha entumwa n'okubahira omu mpamikwa. ¹⁹ Ci malaika wa Nyakasane ayigula omubudufu enyunvi z'empamikwa, aba hulusa, anababwira erhi: ²⁰ Gendi, muje omu ka Nyamuzinda, mumanyise olubaga emyanzi yoshi y'obulamu. ²¹ Erhi bayunva ntyo banacigenda sezi sezi omu ka Nyamuzinda n'oku rhangira ba yigiriza. Omudahwa mukulu naba bali boshi erhi bayisha bahamagala embaraza haguma n'abashosi, boshi b'abana b'omw'Israeli n'okurhuma mpu bajilonza entumwa omu mpamikwa. ²² Abakozi, omu kuhika kwabo, barha bashimanaga omu mpamikwa. Bana hindamuka, n'oku hisa emyanzi, ²³ baderha mpu rhwashimanyire empamikwa eyigirwe bwinjinja, n'abalanzi bali embere z'emihango; cikwone , ene rhuyigula, rhurha buganire omuntu yeshi yeshi endalala. ²⁴ Erhi bayunva ebi binwa, omukulu w'aka Nyamuzinda n'abagula b'olubaga barhaci rhanyagya kundi gurhi, okurhali kurhanya aha nyanya ly'entumwa n'oku gendekera kw'olo lubanja. ²⁵ Muntu muguma ayisha ababwira erhi: Alagi, abantu mwahebaga omu mpamikwa bakola bali omu ka Nyamuzinda, banali bayigiriza olubaga. ²⁶ Lero omukulu agenda n'abakozi, banayisha babadwirhe buzira kadali, bulya bali yobohire olubaga mpu lwaba banda amabuye. ²⁷ Erhi bama bahisa embere z'embaraza omudahwa mukulu abadosa kwa mene oku: ²⁸ Karhurha mulahizagya kuzibu kuzibu okuyigiriza okwer'izino? Ci lolagi, mwayunjuzize Yerusalemu yeshi enyigirizo zinyu, n'okulonza oku rhuberhuza omuko gw'oyo muntu! ²⁹ Petero n'entumwa bashuza: Kushinganine oku kenga Nnamahanga kulusha abantu. ³⁰ Nnamahanga wa ba larha afuzire Yesu, oyu mwayirhaga, mwamu manika oku murhi. ³¹ Nnamahanga amukuzize n'okulyo kwage nka murhwali na muciza, lyo aha Israeli oku ciyunjuza n'oku babalirwa ebyaha. ³² Rhuli bahamirizi b'ebyola, ciru naye Muka Mwimana, olya Nnamahanga ahaga balya bamukenga. ³³ Bagaya, ahanyanya z'ebyo binwa, balonza mpu bakola babayirha. ³⁴ Cikwone mufarisayo muguma wahamagalagwa Gamalieli, mwigiriza w'amarhegeko, akagi kengwa n'olubaga lwoshi, ayimuka omw'ihano, ana cirhegeka oku barhengi hulusa entumwa. ³⁵ Lero ababwira erhi: Bantu b'Izraeli, mucirhonde mumanye bwinja ebi mwajirira aba bantu. ³⁶ Bulya liciri duba lirya ayishaga Teuda, anaciderha mpu ali muntu muzibu bana cishwekera kuli ye bantu hofi magana gani: oyola ayirhwa na ngasi boshi bali mushimbulire bashandala n'oku rhamira busha. ³⁷ Aha nyuma lyage hana ciyisha Yuda mu Galilaya, kali kasanzi k'okujira omuganjo, naye anakulula lubaga lurhali lunyi omu cigamba cage: oyo naye anahera, na ngasi boshi bamushimbire bashandabana. ³⁸ Nantyo, mmubwizire murha cicirhege abano bantu, muna baleke bagende. Nkaba guno mulungano erhi guno mukolo gurhenzire emwa bantu, gwayishi shabuka; ³⁹ cikwone nkaba gurhenzire emwa Nnamahanga murhanka hasha oku gushabula. Omu kurha manya mwaba mukola muli mwalwisa Nnamahanga. ⁴⁰ Banayunva elihano lyage. N'oku hamagala entumwa, babashurha emikoba, bana bakomereza oku barha ciderhaga okw'izino lya Yesu, lero bana bashwekulaga. ⁴¹ Entumwa zarhenga embere z'akagombe n'obu shagaluke okubona bali bahanire obushinganyanya erhi kuhamiriza izino lya Yesu kurhumire. ⁴² Na ngasi lusiku, omu ka Nyamuzinda n'omu nyumpa nyinji barha lekaga okuyigiriza n'oku yalagaza emyanzi y'akalembe ya Yesu Kristu.