¹ isandaku lya Nnamubaho lyarhenzire omu cihugo c'abafilisti myezi nda. ² N'abafilisti bahamagala abadahwa n'abalaguzi, banaderha: gurhi rhwajira isandaku lya Nnamubaho? Murhumanyise bulyo buci rhwagalulamwo eri isandaku ahaliyorha libà. ³ Bashuza: nkaba mwagalula isandaku lya Nnamahanga w'israeli, murhaligalulebushà, cikwone mujirire Nnamahanga enterekero y'oku ciyaza, ntyo mwafuma na mwayishimanya bulyagurhi okuboko kwage kurhamulisiri. ⁴ Abafilisti badosa: ntulonci rhwamujirira? Bashuza: mahurhe garhanu ga masholo, kushimbana omubale gw'abarhwali b'abafilisti, bulya bwonobwo buhane bwabalikwo n'abarhwali binyu. ⁵ Mujire enshushano z'amahurhe ginyu n'enshushano y'amalindye ginyu gali gayona ecihugo, na munahè Nnamahanga w'israeli irenge: bulya ankaba akalembya okuboko kwage kulimwe, oku miungu yinyu n'oku cihugo cinyu. ⁶ Bulyagurhi muli mwazibuhya omurhima gwinyu, nkoku abamisiri na Farao bazibuhagya emirhima yabo? Karhabahaga obuhane bagali leka okulikula abana b'israeli okugenda? ⁷ Bwonobuno mulerhe endogomi mpyahya, murhole na nkafu zibiri ziri za kamwa zirhana sagi hinga, muhebe Enzo nkafu oku ndogomi n'amanina gazo mugagalule emararo. ⁸ Mugaligi rhola isandaku lya Nnamubaho, munalihebe oku ndogomi, munahebe ahaburhambi lyalyo, omunshoho, ezo nshushano z'amasholo mwarhulira Nnamubaho nka nterekero ya byaha, munagalulage isandaku, lyagenda. ⁹ Mulij'ebulabi, likayinamuka omunjira y'elubibi olunda lw'e bete shemeshi, erhi na Nnamubaho warhujiriraga aga mabi goshi; nkaba nanga, rhwamanya oku arhali kuboko kwage kwa rhushurhaga, erhi n'ebyo byarhuyishire kwone. ¹⁰ Abobantu banajira ntyo. Barhola nkafu zibiri zakamwa banaziheba oku ndogomi, banashweka amanina omunyumpa. ¹¹ Bagali heba isandaku oku ndogomi, n'enshoho n'amalindye g'amasholo n'enshushano y'amahurhe gabo. ¹² Enkafu zanayerekera honaho e bete shemeshi, zanakulikira yoneyo njira, zirhana jaga eburhambi, ekulyo erhi ekumosho. Abarhwali b'abafilisti baziyish'enyuma kuhika oku lubibi lw'e bete shemeshi. ¹³ Ba cikala b'e bete shemeshi bakagi sarhula engano omu lubanda bayinamula amalanga, balangira isandaku, bashagaluka omukulibona. ¹⁴ Endogomi yahika omw'ishwa lya Yoshua ly'e bete shemeshi, lyanayimangamwo. Aho Hali ibuye linene. Babeza emihi Hali oku ndogomi, banarherekera Nnamubaho ezo nkafu nka nterekero ya kusiriza. ¹⁵ Abakazi banahonola isandaku lya Nnamubaho, n'enshoho Hali aha burhambi yalimwo enshushano z'amasholo, bana birherekera byoshi okwer'ibuye linene. Abantu b'e bete shemeshi barhulira Nnamubaho entulo n'enterekero z'oku siriza. ¹⁶ Abarhwali b'abafilisti, erhi baba bamabon'ebyo, bashubira e ekroni lwonolwo lusiku. ¹⁷ Lolaga ago mahurhe g'amasholo abafilisti barhuliraga Nnamubaho oku byaha: liguma enyanya lya Asdodi, liguma lya Gaza, liguma lya Askaloni, liguma lya Gati na liguma lya Ekroni. ¹⁸ Hali malindye garhanu kushimbana omubale gw'emirhundu b'abafilisti yanali oku barhambo barhanu, oku emirhundu yanali mizibirire , kwo n'enciga z'amashwa zirhagwerhe lugurhu zanali. Kwo lihamirize eryo ibuye linene barherekezagya kwo isandaku lya Nnamubaho, holinacibà kuhik'ene omw'ishwa lya Yoshwa e bete shemeshi. ¹⁹ Nnamubaho ashurha abantu b'e bete shemeshi erhi bahenguza omu isandaku lya Nnamubaho; ashurha bihumbi makumi garhanu omu kagarhi k'olubaga. K'olubaga lwaja omu malibuko manene, bulya Nnamubaho alibashusire oku buhane bunene. ²⁰ Abantu b'e bete shemeshi baderha, ndi wanka similar embere za Nnamubaho, g'oyo Nnamahanga ocesibwe? N'emund'ali liyinamulirwe yo isandaku, rhuciyegule kalyo. ²¹ Barhumira bacikala b'ekiryati yemiri entumwa, mpu babawire: abafilisti badwirhe isandaku lya Nnamubaho; muhonoke, muliyinamulire emunda muli.