¹ Madzacha na mapema akulu amakuhani na azee na andishi na baraza zima ra Wayahudi wachishauriana hamwenga kisha wachimfunga Jesu na wachimlongoza na wachimhirika pkwa Pilato. ² Pilato achimza, “Wee umfalme wa Ayahudi?” Achimjibu, “Uwe ugomba gago.” ³ Akulu amakuhani wachielekeza mashitaka machi dzulu ya Jesu. ⁴ Pilato achimza kaheri, “Kujibu chochosi? Kona vyo wanavyokushitaki pkwa mambo manji?” ⁵ Lakini Jesu kamjibire Pilato na vivyo wemshangaza. ⁶ Pkwa kawaidi wakati wa sikukuu Pilato nikumfugurira mfungwa mmwenga, mfungwa wadziye mvoya. ⁷ Hekala na mtu ariyeehewa Baraba jela, yufungwa hamwenga na aovu wariokala wakati wa uovu. ⁸ Kundi richidza pkwa Pilato, na kumvoya kuwahendera here arivyohenda haho kapindi. ⁹ Pilato achiwajibu na kugomba, “Mnahenza niwarichire mfalme wa wayahudi?” ¹⁰ Pkwa kukala wemanya ni pkwa sababu ya wivu akulu amakuhani emgwira Jesu na kumreha pkwapkwe. ¹¹ Lakini akulu amakuhani echochea kundi kubiga kululu pkwa sauti kukala Baraba arichirwe badalaye. ¹² Pilato achiwaba kaheri na kugomba, “Nimhendedze mfalme wa Ayahudi?” ¹³ Wachibiga kululu kaheri, “Msulubishe!” ¹⁴ Pilato achiwaambira, “Yuhenda jambo riro baya?” Lakini wachizidi kubiga kululi zaidi na zaidi, “Msulubishe.” ¹⁵ Pilato achilamala kurihenzeza kundi, achiwafugurira Baraba. Achimubiga Jesu mijeledi kisha achimomboza ili asulubiwe. ¹⁶ Askari emlongoza mpaka ndani ya lua (urio makao mabomu ga serekali) na wachikusanya chikosi chizima cha asikari. ¹⁷ Wachimvika Jesu joho ya hanji ya zambarau na wachisokata taji ya miya wachimvika. ¹⁸ Wachanza kumdhihaki na kugomba, “Salam mfalme wa wayahudi.” ¹⁹ Ekala wachimubiga chitswani pkwa fimbo ya mwanzi kumtsitsira mahe, wachibiga magoti mbereye pkwa kumheshimu. ²⁰ Hata wachigonya kumdhihaki, wachimvula riro jobo ra rangi ya zambarau na kumvika mavazige, na wachimomboza konze pkwenda kumsulubisha. ²¹ Mtu Fulani, Simoni Mkirene ariyekala runenjira mdzini kombola mndani (Baba ye Aleksanda na Rufo) na wachimlazimisha kutsukula msalaba wa Jesu. ²² Asikari wachimhirika Jesu hatu hehewaho Goligotha (Maana na tafsiri ii ni, sehemu fuvu ra chitswa) ²³ Wachimpa uchi uriotsanganywa na manemane lakini kanwire. ²⁴ Wachimsulubisha na wachigavia nguoze, wachibigira kura kuamua chipande andichopata chira asikari. ²⁵ Inapata saa tahu madzacha warihomsulubisha. ²⁶ wachika dzuluye chibao chirichoandipkwa shitaka, “Mfalme wa Wayahudi.” ²⁷ Emsulubisha hamwenga na majambazi airi, mmwenga upandewe wa kuria na mnjine kumotso pkwe. ²⁸ Na maandiko gachitimis garigonenwa kukala wehesabiwa hamwenga na aovu. ²⁹ Nao wariokala wachitsupa emhukana wachitikisa vitswa viao wachigomba, “Aha! Uwe undiyerivunza hekalu na kuridzenga pkwa siku tahu, ³⁰ dzokole mwenye na utime hotsi kombola msalabani!” ³¹ Pkwa namna iyo iyo akulu a makuhani emdhihaki na kugomba, “Wewokola anjine, lakini kaweza kudzokola mwenye. ³² Mriche masihi, mfalme wa Israeli teremka hotsi vino kombola msalabani ili huweze kona na pkwamini.” Na ao wariosulubiwa hamwenga naye pia wachimhukana. ³³ Irihofika saa sita, chiza richiza dzulu yya itsi yosi mpaka saa chenda, ³⁴ Jesu webiga kululu pkwa sauti bomu, “Eloi! Eloi! Lama sabaktani!” Ichika kala na maana, “Mlungu wangu, Mlungu wangu, pkwa onni udziniricha?” ³⁵ Baadhi ya ao warioema warihosikira wachigomba, “Lola yunamweha Eliya.” ³⁶ Mtu mmwenga achichimbira aike uchi wa sira kahiza godoro na kuhiza dzulu ya mhi wa mwanzi achimpa ili anwe, mtummwenga achigomba, “Ngoja hulale chikala Eliya yundadza kumtimisha hotsi.” ³⁷ Kisha Jesu achirira pkwa sauti bomu na achifa. ³⁸ Pazia za hekalu zichigavika vipande viri kombola dzulu mpaka hotsi. ³⁹ Wakati jemedari mmwenga ariyekala yudzema achimwekeza Jesu arihoona yudzefa pkwa jinsi iyo achigomba, “Jeri yuyu mtu wekala mwana wa Mlungu.” ⁴⁰ Ekalaho pia anaache wariokala wachilola pkwa kuhe, miongoni mwao wekalaho Mariamu Magdalena, Mariamu (Mame Yakobo ndogowe Yese) na Salome. ⁴¹ Wakati arihokala Galilaya emtua na kumhumikiha, na anaache anjine anji pia epkwenda naye mpaka Yerusalemu. ⁴² Kurehokala dziloni na pkwa kukala yekala siku maandalizi siku kabla ya sabato. ⁴³ Yusufu wa Arimathaya wekudza haho wekala ni mhumwa wa baraza aheshimiwaye mtu anayeutarajia ufalme wa Mlungu pkwa ujasiri achenda pkwa Pilato na kuuvoya mwihi wa Jesu. ⁴⁴ Pilato achishangazwa kukala Jesu tayari yudzefa. ⁴⁵ Arihopata uhakika wa jemedari kukala yudzefa, wemruhusu Yusufu kuuhala mwiri. ⁴⁶ Yusufu wekala yugula sanzu, achimtimisha dzulu msalabani achimfunga pkwa sanzu na achimwira ndani ya mbira ririrotsimbwa kahiza dziwe kishi achihika dziwe mriangoni mwa kaburi. ⁴⁷ Mariamu Magdalena na Mariamu mameye Yose eona sehemu arihozipkwa Jesu.