¹ Dyaa Yesu uduluwa an'tala, dyombo ta dhene limika. ² Ka enai, mushe tomoi wa bhukoma un'bhamba na itshuma malu apele nana, ka ivfia: Bhwáná, ani uonduwe, ani opasie ini tuumanisia. ³ Yesu an'vfana obho, an'bukula ka avfia: ya li onda; gwala túú. Dyokaa idje i túúmana na bhukoma bhese. ⁴ Kaa Yesu ansowa: mbese inesowa mushe; nge kena kodji vfanisia anga n'koli ka owa sadhaka iyo Musa ukpaluwa, ambusa taa iyo igu ili toku bhusamboli. ⁵ A ilumila la Yesu á Kapelenauma, n'dumanga tomoi wa bhasudha un'gboka, ⁶ An'komula ka na ivfia, Bhwáná, mushe wami wamokambo ú mulale á yavfulu, na bhu etukulu ka na iteseka sana. ⁷ Yesu an'sowa: ekenie, ka em'bhikisie. ⁸ N'dumanga wa bhasudha undjo an'kpetania: Bhwáná, endje ami mu ake taa utangana á yavfulu yami; nge vfia ayi kulivfia ta limoi, ka mushe wami wa mokambo ubhikiye. ⁹ Mungusa, emi i esimiye bhaa bha indokiye; ka ani yansowa tomoi: kena! ka idje ikena; anga womo: uka! ka idje i eka, ka anga mushe wami wa mokambo: kiya iyo! ka idje i ikiya. ¹⁰ Ambusa na ine moka, Yesu á sangala, ka abha sowa bhaa bhu mika: yanesowa nuwe angili, imbi á Isalaeli, sieniami bhushe bha idjelia ligi tuko lino. ¹¹ Ngo, yanesowa nuwe taa bhagi bha idjie lopasika la kapindi ka na la idjakolo, ka bha gwaliye á mesa na Abhalayama, Isaaka ka Yakobho, á bhukota bha ikulu la nguvfa. ¹² Nge bhana bha bhukota bhagwalie bhakuliye á livfuwe la bovfo, dyaa igwalie na ilila ka na imata manyo. ¹³ Kaa Yesu ansowa n'dumanga wa bhasudha undjo: kena, kiya i kiyana nai iyekana na idjelia layi. ka na saa yoku iyo mushe wamokambo ú bhika. ¹⁴ Yesu akena kaamo á yavfulu ya Petelo, dyaa ú mena inya moto wa Petelo wa mwali n'lale ka na ndutu. ¹⁵ Abukula obho wese, ka ndutu dja iba; ka á tema, ka an'kambila. ¹⁶ Idjakolo, bhan'disila Yesu bhagi bhaa bhubhiya na mipumatima ma sulu. A saga mipumatima ma sulu miyo na livfia lese, ka abhikisiya bhatopa bhaa bubhiya na ndutu, ¹⁷ Ambusa taa ya akisiana iyo ibhiya ekokoliane na n'kanga: Isaya, úgeiya mabhunga masu, ka ubhikisia ndutu djasu djitopa. ¹⁸ Yesu, na iyena dyombo ta dhene linekulu ngile, á owa lúúsa la iyeta á obhongo úwomo. ¹⁹ N'kaluwa tomoi am'bhamba ka an'sowa Bhwáná, ene ekiye bhigula bhitopa dyaa úkeniye. ²⁰ Yesu ansowa: djanu dji na bha ebhu, ka manoli ma ikulu la nguvfa ma na mabho; nge mona wa mushe andjese na egula ya iamisiya n'tuwe. ²¹ Womo, wa bhatende, ansowa: Bhwáná, i lúúsia ikeni mba pikiliye ikone mona Tita. ²² Nge Yesu un'kpetaniya: in'ndika, ka tikila bhaa bhuogwa bha oni bhabho bhaa bhu ogwa. ²³ Ka bhu djamila á kuku wa dhene, ka bhatende bhese bhu mika. ²⁴ Ka enai, ka kesukuwa wa dhene ú tatika á obhingi la dhene undjo ú lumisiya malivfa á kuku wa dhene. Ka Yesu, ubha mulale. ²⁵ Bhatende bhun'bhambha ka bhan'susu muwa na ivfia: Bhwáná, útu bhikisiya, tutoli iogwa! ²⁶ Abha sowa: mungusa wa endje muna bhuwa, bhushe bha idjelia ta buwa? Ngo á tema, á vfamila mevfuvfu ka na obhingi la dhene, ka bhitopa bha katana. ²⁷ bhushe bhaa bhu sangala: uno ú neni, bhubhivfia, undjo imbi mevfuvfu ka obhingi la dhene bhi mesimiye? ²⁸ Dyaa bhu ouwa á moli uwomo wa obhingi la dhene á ekita ya Wagelasi, ta bhavfili bha mipumatima ma sulu, bhu vfunduwa á madjako, bhu idja apele nana. Bhubhiya bha kali taa mushe sane ete dyaa. ²⁹ Ka enai, bhubhi vfamaka: indje iyo i angasu djuwe nanu, mona wa Mbali? wa eka dyano itu enisia mpuli mbele ya wakati? ³⁰ Ibhiya dhomu nabho ekumbu ta dhene Ya kuluvfe ibhi eta. ³¹ Bhagu bhaa bhun'komula Yesu, na ivfia: ani watu saga, ú tuna á ekumbu á iyomo ya kuluvfe. ³² Abhasowa: Kenai! bha vfunduwa ka bhalumila á ekumbu ya kuluvfe. ka Enai; ekumbu etopa ya likiti ya makulu na kpangane á obhingi la dhene, ka bha ogwa á malivfa. ³³ Bhaa bhubhi dhisia ekumbu ya kuluvfe iyo bhakena mavfi, ka bha kena á ndei ya dhene iko súmula etopa iyo ibha mú été ka iyo ibhia ekiane anga bhaa bhubhiya na mipumatima ma sulu. ³⁴ Kaa bhushe bhatopa bha ndei ya dhene bha vfunduwa ikone mena Yesu ; dyaa bhu mena, bhun'komula taa á ési á ékita, yabho.