¹ Mbese nuwe i ukumuwa, ambusa taa bhane ne okunuwe dyokuto. ² Mungusa bane okumuwe na selia iyo ú okumu mono nao, ka bhane pimiye na kepimo undjo opimi mono nao. ³ Mungusa wa endje ú eniye londakalaka á lidjo la wano, ka na mbese iena iyo i á lidjo lai? ⁴ Ao namuna yaniya upasie ivfia na wano: itikila ine esisia londakalaka luwo lu á lidjo lai; ka na owe su nao á lidjo lai dyokuto? ⁵ Ú avfetaka, esisia pikiliye londakalaka luwo lu á lidjo lai, ka ú eniye toku ú esisiye iyo i á lidjo la wano. ⁶ Mbese iowa bha ambusa bhima bha kengo, ka mbese nuwe ituwa bhikaya bha yakuku apele na bhana bha kuluvfe, na ionduwa taa bhane letile, na makulu, taa ineko ne iganile nuwe ka na ine otalisia. ⁷ Vfemai, ka bhane ouwe; vfungalai, ka nu patiye; kokulai mulango, ka bhane eguluwe. ⁸ Ngo undjo uvfemie ú udhuwe, undjo uvfungalie upatie, ka bhan'meguluwe undjo ú kokuwe. ⁹ Neni wanu undjo umuuwe mona wese libhoi, ani an'vfema mokati? ¹⁰ Ao, ani avfema b'titi, ú muuwe nyili? ¹¹ Ani nuwe nu bha bhibhi, nu djibhie ibha owa bhana bhanu zawadi ya ekima, mingo imbani idja wanu undjo ú á ikulu la nguvfa ú ouwe bhima bha bhikima anga bhaa bha n'vfemie. ¹² Mitopa miyo bhu onduwe taa bhushe bhaa ku djulu lanu, kiai dyokuto dyulu labho, ngo iselia ka bha kanga. ¹³ Tanganai á mulango wa buwa. Mungusa iyo ya dhene, gbali i paki iyo, ikenie á ibhunga, ka i na bhagi bhaa bha lumilie dyaa. ¹⁴ Ngo i wa buwa mulango uwo, ú vfulumanisie paki ya ikena á ibhika; ka bha ta buwa bhaa bha lieniye. ¹⁵ Udji ngbelai na bha kanga bha ebhela. Bhaidjie anganu bha sale ewa ya mekoko, nge á semele bha bha ambusa bha bhakali bha aga. ¹⁶ Nubha djibhie na puma djabho. bha kola kiye zabhibhu á semele na mabhiyo, ao puma á bhiti bha mabhiyo? ¹⁷ Eti etopa ya ekima ibhu takiye puma dja djikima, nge ya ebhibhi ibhutakiye puma dja djibhibhi. ¹⁸ Eti ya ekima indje bhutiese puma dja djibhibhi, ka ya ebhibhi indje bhutuese puma dja djikima. ¹⁹ Eti etopa iyo indje bhutu ese puma dja djikima i etinane ka n'tuwe á isala. ²⁰ I á puma djese iyo nudji djibhie. ²¹ Bhaa bhisuuwe: Bhwáná, Bhwáná! bhandje lumiliabho bhatopa á bhukota bha ikulu la nguvfa; nge ku tomoi undjo ú kiie i onda la Tita undjo ú á ikulu la nguvfa. ²² Bhagi bhi souwe á bhusi bhuwo: Bhwáná, Bhwáná, tu enge mono asu na linya lai? tu sage mono asu bhagu na linya lai? ka tu kie mono asu bhikako bhigi na linya lai? ²³ Ngo ibhasouwe ta fomu: sine djibhe mono ani nuwe, esai angamu, nuwe bhaa nukiie bhubhi. ²⁴ I na dyito, undjo ú okie mavfia mano miyo ivfie ka á mikambisia, ugwalie muvfilane na mushe undjo ú na otinga undjo ú kpelie yavfulu yese á ikulu la libhoi. ²⁵ Mbula i koowa, malivfa mu idja, movfuvfu ú vfumba ka mi ovfula á yavfulu iyo: si kuwe ese, mungusa ibhia mukpelane á ikulu la libhoi. ²⁶ Nge undjo ú oka mavfia maa ivfia, ka na ima kambisia, ugwalie muvfilane na edudu undjo ú kpela yavfulu yese á ikulu la iseke. ²⁷ Mbula ikowa, malivfa mu idja, mevfuvfu mi vfumba ka na ovfula yavfulu iyo: ya bhunguwa, ka ibhunguwa liyo libhia ta dhene. ²⁸ Ambusa na Yesu i mala mavfia mese, dyombo bhu sangala igulusia lese; ²⁹ Ngo ú gulusia toku undjo udjibhie selia ka mbese toku bha kpaluwa bhabho.