¹ Yesu, ni djamila á kuku wa dhene, a'kaliya obhingi la dhene ka ákena á ndei yese ya dhene. ² Ka enai, bhundisila etukulu mulale á ndalo. Yesu, na iyena idjelia idjelia labho, avfia na etukulu: gwala na n'vfevfene, mona wami, djambi djai dja esisiana. ³ Ikulu la iyo, bhamo bha kpaluwa bhusowana: mushe uno an'sesaka Mbali. ⁴ Ka Yesu, na idjibha mawazo mabho, avfia: mungusa wa endje muna mawazo mabhibhi á mipumatima manu? ⁵ Ngo, yaniya iyo i ekima, na ivfia: djambi djai dja sameana, ao na ivfia: tema, ka luvfa? ⁶ Ngo, mungusa nu djibhi taa mona wa mushe ú á kisi na lokulu la isamea djambi: tema. ansowa etukulu, geiya ndalo yai, ka kena á yavfulu yai. ⁷ Ka atema, ka akena á yavfulu yese. ⁸ Dyaa dyombo liena iyo, ka louwa na bhuwa ka la biba Mbali, undjo ú owa anga bhushe lokulu toku luwo. ⁹ Na dyaa na ikena ta dhomu, Yesu á mena mushe tomoi á egula ya ilipisia kodhi, undjo ubhisiana ta Matayo. Ansowa: indika. mushe undjo atema, ka á mika. ¹⁰ Toku Yesu ubha á mesa sunedhia. á yavfulu, ena bha Pibilika bhagi, ka na bhushe bhaa bhu bhibhika ebhibhi, bhundja iko djumana nana á mesa na idhia na bhatende bhese. ¹¹ Bha Falisayo bhu ena eyo, ka bhuvfia na bhatende bhese: mungusa wa endje Bhwáná bhanu adhia na bha Bibilika ka na bhushe bha ibhika ebhibhi? ¹² Iyo Yesu ú oka avfia: endjese bhaa bha na mebhi ta mikima bhaa bha na kulu ya munganga; nge bhaa bha na ndutu. ¹³ Kenai, ka djibhai iyo ivfie taa: iyonduwe bhukuku, ka mbese sadhaka. Mungusa si idjiami dyulu la bhaa bha endjini, nge dyulu la bhaa bha na djambi. ¹⁴ Ngo bhatende bha Yoani bhu idja anga Yesu, ka bhavfia: mungusa wa endje, djuwe ka bha Falisayo tu tikilie idhia mungusa wa ivfema anga Mbali, ka bhatende bhai bhandje tikiliabho idhia? ¹⁵ Yesu abha kpetania: bha mbeni bha mulume wa dyambia bha pasie itikila idhia ani mulume wa dyambia uku nabho? igwali na masimaa mulume wa dyambia ugwali mu geiyane, ka dyaa bha tikie idhia dyulu la inevfema Mbali. ¹⁶ Mushe andje avfisie ese etati ya ngombe ya bhasi a ngombe ya ngbe; mungusa ilutuwe ngombe ya ngbe, ka bhigula bhiyo bhibhia bhi vfundakale, bhi vfundie kotiyo angili. ¹⁷ Bhandje avfisakia abho engoka ya bhasi á mabhombe ma ngbe, namuna yomo, mabhombe ma vndiye, engoka i idye, ka mabhombe ma bholiye; nge bha avfisakiye engoka ya bhasi á mabhombe ma bhasi; ka engoka ka na ma bhombe ma ngbelaniye. ¹⁸ Dyokaa ubhibhasowa mavfia maa, ena, n'kota tomoi i óuwa, na itshuma malu apele nana, ka avfia: N'seke wami ogwa ketetino ano; nge uka, um'mavfisia mabho, ka ubhikiye. ¹⁹ Yesu á tema, ka á mika na bhatende bhese. ²⁰ Ka ena, mwali tomoi ubha ena manyika meli ta bhuu na djimo ta bhivfili, am'bhamba ámbusa nana, ka á bhukula mituwe mya ngombe ese. ²¹ Ngo ubhivfia idje mukulu aao: ani yabhula ami ku ngombe yese, ebhikiye. ²² Yesu ane ani basia, ka avfia, na inemena: gwala na iseea, n'seke wami, idjelia layi la nebhikisia. Ka mwali undjo á bhika á evfumbu a iyoku iyo. ²³ DyaaYesu ukiana á yavfulu ya n'kota, ka á ena bha ovfula panda, ka dyombo libhi dyuma na ndila, ²⁴ Abha sowa: udjilutai, mungusa n'seke andjese mu ogwe, nge ú tolo. Ka bham'bhelakaka. ²⁵ Ambusa na dyombo idji luta, Yesu á tangana, á dunga obho wa n'seke undjo, ka na n'seke undjo itema. ²⁶ Mosimo uwo wa lagatana á etuko iyo ku etubhu. ²⁷ A iesa lese dyaa, bhushe ta bhavfili bha bhutiti bhu mik Yesu, bhaa bhubhi vfama: utu ogulia bhukuku, mona wa Daudhi! ²⁸ Dyaa ukiana á yavfulu, bhushe bha bhutiti bhaa bham'bhamba, ka Yesu abhasowa: Nudjelie taa epasie inebhikisia nuwe? Tadjelia, Bhwáná, bhumanyula. ²⁹ Ngo á bha bukula á madjo, na ivfia: ikiana anganu iyekana na idjelia lanu. ³⁰ Ka madjo mabho ma egulana. Yesu abha owa makoko mano: mbese mushe idjibha munguso uno. ³¹ Nge na ivfunduwa labho, bhu la gatanisia mosimo wese á ekita ku etubhu. ³² Toku bhubhikena, enai, bhun'disila Yesu moluma undjo ubhia na ndutu dja bhagu. ³³ Ambusa na Yesu ine saga mungu, moluma avfia. Ka dyombo la sangala na ivfia: tundje mo asu bha ene tano á Isalaeli. ³⁴ Nge bha Falisayo bhavfia: iesa ku n'kota wa bhagu undjo ú sagasagie bhagu. ³⁵ Yesu ukpatula á ndei ka á ndei dja dhene djitopa, na igulusia á bhasinagogi, na ikokolia livfia la bhukota bha Mbali, ka na ibhikisia ndutu djitopa ka na mabhunga matopa. ³⁶ Na iena dyombo, Yesu abha okila bhukuku mungusa bhubhia bha doge ka bha vfandjale toku mekoko miyo mindjese na n'gbeli. ³⁷ Ngo avfia na bhatende bhese: bhima bhikola bhi bhigi, nge bha kambia bha buwa. ³⁸ Vfemai anga mukulu wa bhole á tumu bhakambia bhagi ikokola.