¹ Na iena dyombo, Yesu ú kpata n'tala; ka, ambusa na idje idjumana, bhatende bhese bhum'bhamba. ² Ka á egula anyuwa, ú bha gulusia, ka avfia: ³ Seeai bhabhoka á mpumatima, mungusa bhukota bha ikulu la nguvfa i bhwabho; ⁴ Seeai bhaa bha na mipuli, mungusa bha gwalie bha komulane! ⁵ Seeai bhaa bhudjidulusia, mungusa kisi igwalie yabho! ⁶ Seeai bhaa bha na egwa ka na yama ya bhu endjini, mungusa bha gwalie bha ogute! ⁷ Seeai bhaa bha na bhukuku, mungusa bha udhuwe bhukuku! ⁸ Seeai bhaa bha na mpumatima túú, mungusa bha meniye Mbali! ⁹ Seeai bhaa bha kiie bhuguwe, mungusa bha bhisianie bhana bha Mbali! ¹⁰ Seeai bhaa bha enie mpuli dyulu la bhu endjini, mungusa bhukota bha ikulu la nguvfa i labho! ¹¹ Nugwalie bha see, dyaa bhanesekaki nuwe, bhane enisie nuwe mpuli ka bhane vfilie ebhela tumba djitopa dja bhubhi, dyulu lami. ¹² Seeai ka gwalai na ifulaia, mungusa faidha yanu igwalie ta dhene á ikulu la nguvfa; ngo i namuna ku temoi bhu enisia bha kanga bhaa bhubhiya apele nanu mipuli. ¹³ Nu n'neli wa kisi. Ani n'neli wa bholisia bhundenge ndenge bhwese, ikiani titani ta i ou ndenge ndenge, i tese ku utuwana á bovfo ka ú letilana na makulu ma bhushe. ¹⁴ Nu mpena wa kisi. Ndei ya dhene iyo i á ikulu la n'tala li ndjese li kobhane; ¹⁵ Ka bhandje tshuanisakiabho lobela taa lu avfisia á itshi la ekemo, nge bhali avfisie á ikulu la yakuku, ka i angazie bhatopa bhaa bha á semele na yavfulu. ¹⁶ Kia mpena wanu lu ngali apele na bhushe, bha eni mekambo manu na nikima, ka bha bibi idja wanu undjo ú á ikulu la nguvfa. ¹⁷ Mbese nuwe i kpalia taa i idja i esisia selia ao bha kanga; i idja mbese i esisia, nge ili kambisia. ¹⁸ Mungusa, yanesowa nuwe angili, toku ikulu la nguvfa ka na musia mindjese mi ete, selia undje esisianiese ta emoi ao likpaluwa ta limoi, mpaka dyokaa bhitopa bhi kanie. ¹⁹ Undjo ú esisia bhushe taa bha kii dyokuto, ú bhisianie wa buwa sana á bhukota bha ikulu la nguvfa; nge undjo ú li esimie, ka ú gulusie bhushe taa bha esimiya, undjo ú bhisianie ndumanga á bhukota bha ikulu la nguvfa. ²⁰ Ngo, yanesowa nuwe, ani selia yanu si ete ese ya bha kpaluwa ka na ya bha Falisayo, nundje lumilieanu á bhukota bha ikulu la nguvfa. ²¹ Nu oka taa ivfiana na bha gagulu: undje oluwe ai; undjo ú oluwe ú pasie i ukumuwa na bhatumba. ²² Nge emi, yanesowa nuwe taa undjo ugwalie na bhusungu na wanya ese iwezekanie á ukumuana na bhatumbu; kia undjo un'sauwe wanya ese: iaka! upasie i ukumu á na bhalasa; ka kia undjo un'sauwe: edudu! upasie i ukumuana isala la Gehena. ²³ Ani wa owa sadhaka yai á n'tuwa, ka na dyaa wa dji djuwa taa ú na mungusa na wano; ²⁴ Tikila sadhaka lai dyaa á n'tuwa, ka kena pikilie kolonganai na wano ka uka kotiyo koowa sadhaka yai. ²⁵ Okanai mangbalangba na akudhu wai, dyikaa nuku neluvfa nana, na iyonduwa taa ane kone sitake, taa n'tumba anekone kenisie á n'dumanga wa bhutumba, ka taa uneko tuwane á mudyalolo. ²⁶ Yanesowa angili, undje winduwe ai owa ku owe sa vfinda elinge. ²⁷ Nuoka taa ibha nuvfie: mbese owe ikiya ma vfanyi. ²⁸ Nge emi, yanesowa nuwe undjo un'bhonie mwali na kulu akiya á mpumatima wese mavfanyi nana. ²⁹ Ani lidjo lai la ilume i angai likiya ya ine kosiya, ú li esisiya ka ú li tuwa dhomu nai, mungusa i faidha angayi taa lingo talimoi li bhitakala, ka mobhi wai n'topa su gwali n'tuwane á Gehena. ³⁰ Ka ani obho wai wa ilume i angai likiya la inekosia, ú li tina ka ú li kuliya dhomu nai; mungusa i faidha angayi taa lingo lai ta limoyi li bhitakala, ka taa mobhi wai n'topa su gwali n'tuwane á Gehena. ³¹ Ivfiana taa: undjo ú n'sagie mwali wese á muwa bhaluwa bha ine n'sika. ³² Nge emi, yanesowa nuwe taa undjo un'sagie mwali wese, ani ku dyulu la mbese idje igwala nu kame anga mulume wese, á mavfisia á bhugwalia bha mavfanyi, ka undjo ú songie mwali undjo bhan'saga á kiya mavfanyi. ³³ Nu oka dyokuto iyo ivfiana dyulu la bhagagulu: mbese ilapa mya ebhela, nge umuwa Bhwáná iyo ú lapa. ³⁴ Nge emi, yanesowa taa mbese ilapa, imbi á ikulu la nguvfa, mungusa i agima wa bhukota bha Mbali, ³⁵ Imbi á kisi, mungusa i agima wa i avfisia makulu mese; imbi á Yelusalema; mungusa i ndei ya dhene ya n'kota wa dhene. ³⁶ Mbese ilapa na n'tuwe wai, mungusa undje tokiai ta ibasia ngbúú ao bisi longbili ta lumoi. ³⁷ Kia livfia lai ligwali yadjeliya, yadjeliya, yasika, yasika; mungusa liyo li gbu kumanie la eka anga mugu. ³⁸ nu oka taa ivfiana: lidjo na lidjo, ka linyo na linyo. ³⁹ Nge emi, yanesowa nuwe taa mbese ikangana na undjo ú m'bhibhi. Ani mushe ane ovfula ebhaga á lopanga la ilume, ú muwa ú lumo. ⁴⁰ Ani mushe ú onduwe inesitaka, mungusa á geiya kandjo yayi, ú n'tikiliya dyokuto Koti yai. ⁴¹ Ani mushe anesowa taa kon'tiki á kilometele temoyi, kena nana mpaka á kolimetele ta epili. ⁴² Umuwa undjo unevfemie, ka mbese ine sikila undjo ú onduwe ikopisa angai. ⁴³ Nu oka toku ivfiana taa: ú munduwe mangenai, ka un'bhiliye akodhu wai. ⁴⁴ Nge emi, yanesowa nuwe: ondai bhakodhu bhanu, bhalikiai bhaa bha netunakie, kiai bhukima anga bhaa bhane bhliye nuwe, ka vfemai anga Mbali dyulu la bhaa bhane eni nuwe mbulembule, ka bhaa bhane enisie nuwe mpuli, ⁴⁵ Ambusa taa nugwali bhana bha idja wasu undjo ú á ikulu la nguvfa; mungusa ú vfundusakiye dyuvfa dyulu la bha bhibhi ka na bha bhakima, ka ú koisakie mbula ikulu la bhaa bha endjini ka bhaa bhandje abho endjini. ⁴⁶ Ani nu onduwe bhaa bhane onduwe nuwe, indje faidha iyo nu patie? Bha Pubhilika dyokuto bandje kiie ku namuna ku emoi? ⁴⁷ Ka ani nusalimiye ku bha wanyinya bhanu, indje nu kiie ya mushangazo? i dyokuto namuna temoi bha pagano bha kakie. ⁴⁸ Gwalai bha kame, toku idje wami wa ikulu la nguvfa ú mukame.