¹ Ngo Yesu ubhia n'kenisiane na mpumatima á mpena wa iseke, dyulu agwali nutshutshane na mugu. ² Utikila idhia dyulu la ivfema masi makomo ta manai ma bhusi ka makomo tamanai ma bhotiyo, ka uóka egwa. ³ Atshutsha á m'bhamba ka an'sowa: ani ú mona wa Mbali, luusia taa mobhiyi mano bhane bhasia mekati. ⁴ Yesu akpetania: ikpaluana: mushe andje bhikiese kú na mokati, nge na livfia litopa liyo li vfunduwe á anyuwa wa Mbali. ⁵ Mugu an'vfevfa á ndei ya dhene ya kengo, an'mavfisia á ikulu la yavfulu ya Mbali. ⁶ Ka ansowa: ani owe ú mona wa Mbali, ú djikula á itshi, mungusa ikpaluana: ú ouwe lúúsa anga bha tambia bhese dyulu lai; ka bhane vfevfie á mabho mabho, na ionduwa taa okulu wai ine tutale á libhoi. ⁷ Yesu ansowa: kaamo ikpaluana: undje n'tshutshu á Bhwáná, Mbali wai. ⁸ Mugu anvfevfa kaamo á ikulu la n'tala wa ikongo wa ikoéta, anvfeisia makota matopa ma kisi ka na obibo laao; ⁹ Ka ansowa: ine ouwe bhitopa bhino, ani wi itshumila malu ka na ini abuduwa. ¹⁰ Yesu ansowa: ésa dyaa owe mugu! mungusa ikpaluana: omuabuduwe Bhwáná, Mbali wai, ka ku idje kalesi, ka un'kambila. ¹¹ Ngo mugu an'tikila. Ka éna bhatambia bhun'gboka Yesu dyulu la ine kambila. ¹² Dyaa ú oka taa Yoani úbhia mú owane, Yesu anéluta á Galilea. ¹⁴ Ambusa taa i á kisiana livfia la n'kanga Isaya: ¹⁵ Misia ma Zebhuloni ka misia ma Mafutali, á m'bhongo ú womo wa obhingi la dhene, iyeta Yolodhani, Galilaya ya bha pagano; ¹⁶ Bhushe bha djumane á livfuwe, bha ena mpena ta dhene, ka ikulu la bhaa bhubhia bha djumane á ékita ka á ligubhu la ligwa, mpena tomoi ú enikana. ¹⁷ Dyokaa Yesu ú tatika i gulusia ka ivfia: Tubhuai mungusa bhukota bha Mbali bha ouwa tshekedhe. ¹⁸ An'kpanga wa obhingi la dhene la Galilaya, á éna bha wanyinya ta bha vfili, Simono mbisiane ta Petelo, ka Andele, wanyinya wese bhaa bhubhi bhanga na bhokila á obhingi la dhene; na eyo, bhubhia bha bhangia bha titi. ¹⁹ Abha sowa: indikayi, ka enekiie nuwe bha bhangia bha bhushe. ²⁰ Dyokaa, bhatikila bhokila bhokila ka bha mika. ²¹ Na ikena dhomi, ena bha wanyinya bhamo ta bha vfili, Yakobho, mona wa Zebhudhayo ka Yoani wanya wese, bhaa bhubhia á semele na kuku wa dhene na Zebhedhayo, idje wabho, ka bhubhia bhane tukulia makila mabho. ²² Abha bhisia, ka dyokaa bhu tikila kuku wa dhene ka na idje wabho, ka bhu mika. ²³ Yesu ukpatula Galileya litopa, ú gulusia á bha Sinagogi, igulusia livfia la likima la bhukota bha Mbali; ka ibhikisia ndutu djitopa ka na mabhunga maa mubhia anga bhushe. ²⁴ Lokuku lese lu vfandjala á Sulia etopa. Bhun'disila bhatopa bhaa bhu bhiya ndutu ka na itula la mebhi namuna etopa, bhaa bhana ndutu, dja mipumatima ma sulu, bhaa bha na isu, bha itukulu, ka abha bhikisia. ²⁵ Dyombo ta dhene li mika, iyandja á Galilea, iyeta á Dekapoli, á Yelusalema, á Yudheya ka mpaka iyeta Yolodhani.