¹ Dyaa Yesu umala mavfia mese, abhasowa bhatende bhese: ² Nudjibhi taa Pasaka igwali ambusa na masi ta mavfili; ka taa mona wa mushe ugwalie muowane dyulu agwali n'gogilane. ³ Ngo bhadumanga bha bhakoli ka na bha gagulu bha bhushe bhu kumanila á mbanda ya Kayafa, n'dumanga wa bhakoli; ⁴ Ka bha kia ikumbe mungusa bhan'dungu Yesu na bhuswele, ka bha mulusia. ⁵ Nge bhuvfia: sigwali ese á wakati wa evfaya, ambusa nata inegwale na moyéyé anga bhushe. ⁶ Toku Yesu úbha á Bethania, á yavfulu ya Simoni undjo ubha na bhukoma, ⁷ Mwali tomoi am'bhamba, n'dunge tshupa ya malasi, iyo ibhia malasi ma likoli likali; ka dyaa bhu bhia á meza, am'bhungula malasi á n'tuwe wese. ⁸ Bhatende, na iena iyo, bhasuma, ka bhavfia: indje iekima ibholisia ino? ⁹ Mungusa malasi mano mibhia ma ikulusiana na likoli ta likali ka, bhilinge bhaao ibha owa bhabhoka. ¹⁰ Yesu, na iena iyo, á bhasowa: mungusa wa endje nune menisie mwali úno mpuli? mungusa ikilia mokambo wa n'kima; ¹¹ Ngo nuna bhabhoka masi matopa, nu ndje anú nami masi matopa. ¹² Na ivfandjulia malasi maa á mobhi wami, ukia na itayalisia iyonana lami. ¹³ Yanesowa nuwe angili, egula etopa eyo livfia lino la likima ligwali likokoliane, á kisi n'topa, bha sumulu bhie dyokuto na inedjuwa mwali uno na éyo ukia. ¹⁴ Ngo tomoi wa tabhuu na bhaamo ta bhavfili, m'bhisiane taa Yudha Esikalioti, ukena anga bha dumanga bha bhakoli, ¹⁵ Ka avfia: nuóndue ininduwa imbani ka éné ouwe nuwe nabho? Ka bhun'vfinda bhisulu makoma ta masaso ma bhilinge. ¹⁶ Ku áwakati úwo, uvfungala paki ya ine muwa Yesu á mabho mábhó. ¹⁷ Bhusi bha pikilie bha mekati ma mbese tivfo, bhatende bha miya Yesu, dyulu la inesowa: úonduwe tu ta yalisia nai égula ya idhia pasaka niya? ¹⁸ Ukpetania: kenai á ndei ya dhene anga mushe, ka nu n'sowe: Mweli avfia: evfumbu yami itshekedhe; edhi oasaka angai na bhatende bhami. ¹⁹ Bhatende bhukia iyo Yesu ubhasowa, ka bhu tayalisia Pasaka, ²⁰ Dyaa ikiana idjakolo, á djumana á mesa na bhaa ta bhúú na bhamo ta bhavfili. ²¹ Dyaa bhubhi dhia, avfia: yanesowa nuwe angili, tomoi wanu úikulusie. ²² Bhubhia bha kukumane sana, ka kila mushe ú miya: iémi, Bhwáná? ²³ Á manyula: undjo ukinga obho nami á sááni, i undjo úilusie. ²⁴ Mona wa mushe akena iyekana na iyo ikpaluana ikulu lésé. Nge bhukuku na mushe undjo un'kulusia mona wa mushe! Ibhia ekima taa mushe undjo sa bhutale èse. ²⁵ Yuda, undjo un'kulusia, ugia livfia ka avfia: iemii, Labhi? Yesu an'kpetania: wa livfia. ²⁶ Dyaa bhubhi dhia, Yesu ageya mokati, ka ambusa na igbudhusia lokowa, á úbhuna, ka á úowa anga bhatende, na ivfia: geiai dhiai, ino i mobhi wami. ²⁷ Ugeia kaamo lungu; ka, ambusa na ikpudhusia lokowa, á bhaowa na ivfia: nyuai bhatopa; ²⁸ Mungusa ino i manyika mami, manyika ma ilongana ma mú idhia dyulu la bhagi na iesisiana la djambi. ²⁹ Yanesowa nuwe, indje nyuwe taami kaamo ma puma dja mizabibu, mpaka dyaa ikonyuwe nanu kaamo á bhukota bha Tita. ³⁰ Ambusa na ibhela djumbo dja obibo, úkena á n'tala wa mizaituni. ³¹ Ngo Yesu abhasowa: egwalie anganu bhatopa, bhotiyo bhuno, egwalie likia la inekosia nuwe; mungusa ikpaluana: inemovfulu mungbeli mekoko, ka mekoko ma ekumbu migwalie mivfandjale. ³² Nge, ambusa na émi iumuwa, ikeni apele nanu á Galilaya. ³³ Petelo, na igeya livfia, ansowa: dyaa ogwalie anga bhatopa likia la ikuwa, undje gwaliai ta bhuwa angami. ³⁴ Yesu ansowa: yanesowa angili, bhotio bhokubhuno, ápele taa eki á kokolia, owe úilambuluwe mingo ta misaso. ³⁵ Petelo an'kpetania: ani ekpie ta iúgúnai, indjene lambuluami. Ka bhatende bhatopa bhavfia namuna ku temoi. ³⁶ Dyaa ikulu, Yesu á kena nabho á égula eyo iebhisiané taa Getesemani, ka asowa bhatende: djumanai dyano, wakati uwo ikenie dhomu dyulu la ivfema. ³⁷ An'geya Petelo ka na bhana ta bhavfili bha Zebhedayo, ka á andja i ouwá na bhukuku ka na idyena. ³⁸ A bhasowa kaamo: mpumatima wami ú na bhukuku mpaka ku á ligwa; djumanai dyano, ka na ibhona nami mulungo. ³⁹ Kaamo, na ituwa makulu ta bhuwa apele, á kuwa á bhosio bhese, ka avfema dyitano: Tita, ani iwezekanie, kia lungu luno lugwali dhomu ami! mungusa mbese na iyonda lami, nge na iyonda lai. ⁴⁰ Ka úidja anga bhatende, ubha gboka bha lale, ka ansowa Petelo: nubhie anu bha giishie nami ata saa temoi! ⁴¹ Uisiai ka vfemai, ambusa ta nuneko kuwe á itshutshana; mpumatima ú tayari, nge mobhi ú na bholelu. ⁴² Akana kaamo dhomu, ka avfema dyitano: Tita, ani iwezekanie taa lungu luno lugwali dhomu nani taa mbese emi inyuwa, kia iyonda lai likiana! ⁴³ Ukpudha, ka ubhagboka kaamo bhalale; mungusa madjo mabho ma lituwa na tolo. ⁴⁴ Ubhatika, ka, ukena dhomu, uvfema mungo wa masaso, na iiganila mavfia mokumaa. ⁴⁵ Kaamo, ukena anga bhatende bhese, ka ubhasowa: nu bhalale, mpaka saa ino ka na ama! Enai, saa i tshekedhe, ka mona wa mushe ú muowane á mabho ma bhushe bha djambi. ⁴⁶ Temai, tukenai, enai, undjo ú ikulusie óúwa tshekedhe. ⁴⁷ Toku ubhivfia kaamo, énai, yuda tomoi wa bha bhuu na bhamo tabha vfili ouwa, ka na idje dyombo la bhushé, bha agabhile ba kpuluma ka na bhiti, bhatumané na bhadumanga bha bhakoli ka na bha gagulu bha bhushé. ⁴⁸ undjo u n'kulusia Yesu ubha vfanisia évfaniko ino: undjo ém'busuwe, i idje; un'dungai. ⁴⁹ Na dyokaa am'bhamba Yesu, avfia: isamba, Labhi! ka an'busula. ⁵⁰ Yesu ansowa: mbéni wami, iyo waidja iko kiya, kiya. Na éyo bhushé bhaa bham'bhamba; bhan'dunga Yesu, ka bha kena nana. ⁵¹ Ka éna, tomoi wa bhaa bhushia na Yesu avfana obho, ka aluta kpuma yese a égbotolo; a mkpeta mushé wamokamo tomoi wa n'dumanga wa bha koli, ka an'tina otoi. ⁵² Ngo Yesu ansowa: iganisia kpuma yai a égula ese, ngo bhatopa bhaa bha kambie na kpuma bha uguwe na kpuma. ⁵³ Owazi taa sibha pase ami iyenga anga Tita, undjo upasie ininduwa ketetino bhi kumbu ta bhuu na bhimo ta bhivfili bha bhatambia? ⁵⁴ Namuna yania kotiyo ibha akisiana na kpaluwa, maa ebha taa égwali dyito? ⁵⁵ A wakati uwo, Yesu uvfia na dyombo: na idja, toku bha aga bhushé, na bha kpaluma ka na bhiti, mungusa wa ini dunga. Ibha masi matopa undjomane nanu, na igulusia ayavfulu ya Mbali, ka nu idungé mono anu. ⁵⁶ Ngé étopa iyo ikiana ambusa taa makpalua ma bha kanga magwali ma akisiané! ngo bhatende bhatopa bhan'tikila, ka bha kena mavfi. ⁵⁷ Bhaa bhun'dunga Yesu bhun'kenisia anga n'dumanga wa bhakoli Kayafa, dyaa bha kpaluwa ka na bhagagulu bhu bhia bhakumanile. ⁵⁸ Petelo a mika ta dhomu mpaka a banda ya n'dumanga wa bhakoli u lumila, ka a djumana na bhushé bha mokambo, dyulu la iyena namuna yaniya i ibhie. ⁵⁹ Bhadumanga bha bhakoli ka na bhadumanga bha bha sudha bhuvfungala bhusamboli bha ébhéla anga Yesu, bha bhuwaké dyulu la inemula. ⁶⁰ Nge bha pate abho, imbi toku a bhugi wa bha samboli bha ébhela bhu kiana dyaa. A tutulu, bhu idja tabha vfili bhaa bhuvfia. ⁶¹ Uno avfia: épasie ibhukula ya vfulu ya Mbali ino, ka eikpelie á masi ta masaso. ⁶² N'dumanga wa bhakoli a tema, ka an'sowa: undjé manyulu ai ata éma? iyo bhushé bhano bha vfie dyulu lai? ⁶³ Yesu a katana. Ka nidumanga , wa bhzkoli, ageya livfia, ansowa: ya nelapila, na Mbali wan'bhike, na itusowa ani owe klisto, mona wa Mbali. ⁶⁴ Yesu ankpetania: wa mala ivfia: kaamo, yanesowa, u énié bhiyo mona wa mushé n'djumané a ilume la lokulu la Mbali, ka muidjé na lobhundji bhundji la ikulu la nguvfa. ⁶⁵ Ngo n'dumanga wa bhakoli avfunda ngombé dyese na ivfia: a sesaka! tukaamo na kulu ya bhasamboli? Enai, na oka isesaka lese. Nuwazie titani? ⁶⁶ Bha manyula : ya faa aogu. ⁶⁷ A ikulu, bhun'vfulia makanda a bhosio, ka bhum'movfula mangumi, ka bhan'tunakula bhia bhaga na ivfia. ⁶⁸ klisto, énga, utusoowa néni undjo ané ovfula. ⁶⁹ Awakati uwo kuuwo, Petelo ubhia n'djumané a bhovfo a semele na mbanda. Mushé tomoi wa mokambo wa mwali am'bhamba, ka avfia: owé dyokuto, ubha na Yesu mugalilaya. ⁷⁰ Nge an'lambu la a pele na bhatopa na ivfia: indjé djibhiami iyo ototi ivfia. ⁷¹ Toku bhia mukéné a mulango, mushé womo wamokambo wa mwali an'mena, ka avfia anga bhaa bhu bhia dyaa; uno ubha dyokuito na Yesu wa Nazareti. ⁷² An'lambulá kaamo na ilapa: indje n'djibhiami uno mushé. ⁷³ A evfumbu ta buwa, bhaa bhu bhia dyaa, na inen'bhamba, bhuvfia na Petelo: angili owe udyokuito a bhushé bhaa, mavfia mai manévfanisia. ⁷⁴ Ngo áandja itunaka ka na ilapa: indje djibhiami undjo mushé. Dyokaa mulume wa éki ikokolia. ⁷⁵ Ka Petelo udjidjulia na livfia lio Yesu unsowa: apele taa éki akokolia, u ilambuluwe mingo ta misaso. Ka na evfunduwa, á lila na bhukali.