¹ A evfumbu iyo, Helodhe n'kota, na, iyoka mosimo wa Yesu, avfia na bhakambia bhese: i Yowani adjinisia! ² Aúmua anga bhaa bhuugwa, ka i na iyo ú küe bhikako. ³ Ngo Helodhe, undjo un'dungusia Yoani, un'sangaka ka na ine mavfisia á mudyalolo, dyulu la Helodhiasa, madya Filipo, wanya we Helodha; ⁴ Mungusa Yoani un'sowa: indjese á élúúsiane nayi ta on'dungu Helodhiase toku mwali wai. ⁵ Ubhi onda á mulusia, nge ú ondua dyombo, mungusa ú mena Yoani toku n'kanga. ⁶ Ngo, dyaa bhukia likayi la idjuwa ibhutala la Helodhe, nseke wa Helodhiasi ubhi ekima apele na bhaa bhu bhisiana á likayi, ka bhobhina bhan'bhongela Helodhe, ⁷ Nata un'laka na ilapa inemuwa iyo uvfemie. ⁸ Na isusuliana la nyinya wese, avfia: Induwa ketetino, ikulu la saani, n'tuwe wa Yoani adjinisia. ⁹ Nkota ukuku nana; nge mungusa wa ilapa lese ka na bhaa bhubhia bha bhisiane á likayi, úowa lúúsa ta bha muwa n'tuwe wa Yoani, ¹⁰ Ka ú lúúsia bha tini n'tuwe wa Yoani á mudyalolo. ¹¹ Bhudisia n'tuwe wa Yoani á saani, ka bha muwa n'seke undjo á komuwa nyinya wese, ¹² Bhatende bha Yoani bhu eka iko geiya molio wese, ka bha úóna. Ka bhakena ikon'sowa Yesu. ¹³ Na iyoka abhali undjo, Yesu á esa dyaa na kuku wa dhene, ikulu la idjiluta á egula temoi wa mpena wa iseke; ka dyombo, na inemena, bhu vfunduwa á ndei ya dhene ka bhamika na makulu. ¹⁴ Dyaa úduluwa á kuku wa dhene, ena dyombo ta dhene, ka ubha na bhukuku, dyulu lese, ka á bhikisia bhaa bhubha na ndutu. ¹⁵ A ikiana la idjakolo, bhatende bha m'bhamba, ka bhuvfia: egula eno i mpena wa iseke, ka wakati wa eta; iganisiya dyombo, ambusa taa bha keni na ndei ya bhuwa ikokula bha idhia. ¹⁶ Yesu abha manyula: bhandje abho na kulu ya ikena; ubha owai nuwe bhakulu bhaao bha idhia. ¹⁷ Nge bhansowa: tuasu dyano ku mekati ta efu ka na titi ta epili. ¹⁸ Ka avfia: idisilai. ¹⁹ Adjumanisia dyombo á bhibisi, á geia mekati miyo ta efu ka na titi ta epili, ka atubhula madjo á ikulu la nguvfa á kpudhusia lokowa. kaamo, abhuna mekati ka á bhaowa bhatende, bhavfakania á dyombo. ²⁰ Bhatopa bhudhia ka bhu ogula, ka bhandisila bhikemo ta bhúú na djimo ta bhivfili bhudjale na bhisulu bhio bhitikala. ²¹ Bhaa bhudhia bhubhiya iyekeka bhalume elefu ta efu, mbese ibhanda bhali ka bhana. ²² Ambusa na dyaa, asusulia bhatende bha djamila á kuku wa dhene ka bha eti apele nana á lopasika dyombo. ²³ Dyaa ú mala ikpudhusia dyombo á kpata n'tala, ikovfema an'bhongo; ka toku ibha idjakolo la ouwa, ubhia dyaa ku kalesi. ²⁴ Kuku wa dhene, á katikati wa obhingi la dhene, ikumana na kesukwa; mungusa movfuvfu ubhi vfumba opasika ilumo. ²⁵ A saa ya manai ya igiya la bhusi, Yesu á bha eka, na iluvfa á ikulu la obhingi. ²⁶ Dyaa bhatende bhu m'mena iluvfa á ikulu la malivfa la obhingi la dhene, bhu sangala sana, ka bhavfia: i elimongo! ka, na bhuwa bhabho, bhu dyoma. ²⁷ Yesu abhasowa dyokaa: gwalai na idjibha, i emi; mbese nuwe iyondhuwa! ²⁸ Petelo an'manyula; Bhwáná, ani iowe, i lúúsia idji angai ikulu la malivfa. ²⁹ Ka avfia: uka! Petelo avfunduwa á kuku wa dhene ka á luvfa ikulu la malivfa, dyulu la ikena anga Yesu. ³⁰ Nge, na iéna taa movfuvfu ubhia kpingbi, óuwa na bhuwa, ka, toku ubha andja o linda, avfama: Bhwáná, ibhikisia! ³¹ Dyokaa Yesu an'vfana obho, an'dunga, ka an'sowa: owe mushe wa idjelia ta bhuwa, na endje wa tuwa nganyi? ³² Ka bha djamila akuku wa dhene, ka movfuvfu ú ibaa. ³³ Bhaa bhubhaa á semele ma kuku wa dhene bhu idja iko tshuma malu apele na Yesu, ka na ivfia: owe mona Mbali menemene. ³⁴ Ambusa na ikalia obhingi la dhene, bhu idja á etuko ya Genezaleti. ³⁵ Bhushe bha egula eyo, bhun'djibha Yesu, bha tuma bhatambia bhabho á ndei dja mibhongo, ka bhan'disila bhushe bhatopa bha ndutu. ³⁶ Bhan'komula taa bha bukula mbiabho tshiya yese ya ngombe. Ka bhatopa bhaa bhu bhukula bhubhika.