¹ Bhusi bhoku bhuo, Yesu avfundua á yavfulu, ka á djumana an'kpangba wa obhingi la dhene. ² A liga wadyombo á kumanila kalibho nana, á djamila á kuku wa dhene ka á djumana. Dyombo litopa libhia liteme an'kpangba wa obingi la dhene. ³ A bha sowa na mbendo akulu la bhima ta bhigi, ka avfia: ⁴ Muónusia tomoi á kena iko ona. Toku ubhi ona, puma djimo djakua apaki: manoli ma eka ka ma dhia. ⁵ Djimo puma dja kuwa á bhigula bha mabhoi, dyaa sibhiese na misia migi: dja tuwa mungusa sibhia ese á misia ma dhoú; ⁶ Nge, dyaa dyuvfa dji enikiana, bhya senga ka bhya oma, na ikanda milika. ⁷ Djimo puma dja kuwa á mabhio: mabhio makpatila, ka ma kubhusia puma djio. ⁸ Djimo dja kuwa á misia ma mikima: dja bhuta puma, lopuma talumoi la bhuta mia temoi, lumo makomo sita, lumo kaamo makomo ta masaso. ⁹ Kia undjo ú na matoyi ma iyoka aóki. ¹⁰ Bhatende bhan'bhamba, ka bhan'sowa: mungusa endje ubha sanwe na mbendo? ¹¹ Yesu abha kpetania: mungusa nubhia bha owane nudjibhi sili ya bhukota bha ikulu la nguvfa, ka iyo sibhaese mu owane angabho. ¹² Ngo bha ouwe anga undjo ú nao, ka ugwalie na egi, nge anga undjo andjese nao bha esisie iyo ú ano. ¹³ Na eyo ya bha sowa na mbendo mungusa na iyena bhandje emabho ka na iyoka bhandje okiabho ao ka idjibha. ¹⁴ Ka na angabho ya akisiana bhukanga bhuo bha isaya: nu okie na matoyi manu, ka nundje djibhi anu; nu bhonie na madjo manu, ka nundje enianu. ¹⁵ ngo mipumatima ma bhushe bhaa na ouwa dhüi; bha kpingbimaisia matoi mabho, ka bhusiga madjo mabho, na bhuwa bha mbese iena na madjo mabho, na mbese ioka na matoyi mabho, na mbese idji bha na mipumatima mabho, na mbese ibho idji bhasia, ka ta enebha bhikisie. ¹⁶ Nge madjo manu ma seea mungusa ma ena, ka matoi manu, mungusa ma oka! ¹⁷ Yanesowa nuwe angili, bha kanga bhagi, ka na bhaa bha endjini bhubhia na kulu ya iena iyo na ena; ka bha éné abho, iyoka iyo na oka ka bha okebho. ¹⁸ Nuwe kotiyo, okai iyo ivfeisie mbendo ya muonyusia. ¹⁹ Dyaa mushe uokie livfia la bhukota bha Mbali, ka mbese ili djibha á komba bhushe iidja ka á ésisia bhio ibhia ionane á mpumatima wese: mushe undjo ú misia mio puma ikuwa ikulu lese á paki. ²⁰ Undjo ú udha puma á bhigula bha mabho, i undjo ú óka livfia ka á lipokea dyokuto na isea; ²¹ Nge andjese na milika, andjese na lokulu, ka, dyaa meyeye ka mipuli mungusa ma livfia ma ingbokie, igwali angese makia ma ikuwa. ²² Undjo ú údha puma á mabhio, i undjo ú okie livfia, nge i undjo mawazo ma bhidjo ka na ikombana na bhugumia ija kubhusia livfia lio, ka yan'kianisia mbese ibhuta puma. ²³ Undjo ú udha puma á misia ma mikima, i undjo ú óka livfia ka alidjibha, ya bhuta puma, ka lupuma talumoi la bhuta puma miya ta emoi ilumo makomo sita, ulumo makomo ta masaso. ²⁴ Abha owa mbendo yomo ka avfia: bhukota bha ikulu la nguvfa bhu bhuvfilane na mushe undjo ú ona puma dja djikima á bhole bhese. ²⁵ Nge, dyaa bhushe bhubhia, tolo, akodhu úidja, áóna puma dja djibhibhi asemele na ngano, ka akena. ²⁶ Dyaa puma dja onda ka dja bhuta puma, puma dja djibhibhi dja enikiana dyokuto. ²⁷ Bhakambia bha mukulu wa yavfulu bhu idja ikonsowa: Bhwáná su one mono ai puma dja djikima á bhole bhwai? Dja koidja kotiyo niya puma dja djibhibhi? ²⁸ A bha manyula: iàkodhu undjo ákia iyo. Ka bhushe bha mokambo bhan'sowa: wa óndu taa tu kolikutula? ²⁹ Mbese, avfia, na bhuwa taa ani ta kutula puma dja djibhibhi nundji kutulanu ku na ngano dyokuto. ³⁰ Tikilai dji ondi egula ku emoi djitopa mpaka ku á ikuwa, ka á wakati wa ikola ibha sauwe bhaa bha kuwe: esisiai pikilie pumadja djibhibhi, sangiai bhituto dyulu la ivfamba, nge bhosai ngano ka tuai á ekpangulu lami. ³¹ Abha owa yomo mbendo, ka avfia: bhukota bha ikulu la nguvfa bhu bhuvfilane na lopuma la Eladhali luo mushe ugeia ka á luona á bhoke bhese. ³² i puma luo lu bhuwa ieta puma djitopa; nge dyaa lu tuwa, lubhia dhene iyeta bhetembo ka yaouwa eto, iyo manoli ma ikulu la nguvfa mu idja ikokpela a mitavfi mèse. ³³ A bhasowa iyomo mbendo: bhukota bhwa ikulu la nguvfa bhu bhuvfilane na tivfo iyo mwali tomoi ugeia ka á avfisia á bhipimo ta bhisaso bha bhunga, mupaka dyaa libhonga ligwali livfuvfune. ³⁴ Yesu avfia na dyombo litopa bhima bhio na mbendo, ka sa bha vfiliese mbese mbendo. ³⁵ Ambusa taa ya akisiana iyo ibhia ekokoliane na nkanga: iyegulu anyua wami na mbendo, evfanisie bhima bhio bhi kobhana tangia itatika la kisi. ³⁶ Ngo aiganisia dyombo, ka atangana á yavfulu. Bhatend bhese bhan'bhamba ka bha vfia: utu djibhisia maana ma mbendo ya lopuma la lubhibhi á bhole. ³⁷ A manyula: undjo òòna lopuma la lukima, i mona wa mushe; ³⁸ Bhôle, i kisi; puma djadjikima i bhana bha bhukota bha Mbali; puma dja djibhibhi i bhana bha mugu. ³⁹ Akodhu undjo ú óna, i mugu; ikola, i tútútú wa kisi; ka bhaa bha kolie, ibhatambia. ⁴⁰ Ngo, toku bha esisie puma dja djibhibhi ka dji kuliana á isala, igwali namuna temoi á tútútú wa kisi. ⁴¹ Mona wa mushe útumue bhatambia bhese, bhaa bha esisie á bhukota bhese, bhubhi bhutopa ka na bhaa bha kie bhu mbese endjini: ⁴² Ka bha kulianie á litshia la isala la likali, dyaa igwali na ndila na i mata manyo. ⁴³ Ngo bhaa bha endjini bha ngalie toku dyuvfa á bhukota bha idje wa bho. Kia undjo ú na matoyi ma ioka á oki. ⁴⁴ Bhukota bha ikulu la nguvfa bhi kaamo evfilane na lito la likobhe á semele na bhole. Mushe undjo ú enie á alia ka á isea lese, ukulusie etopa iyo únao ka á kula bhôle bhuwo. ⁴⁵ Bhukota bha ikulu la nguvfa bhu bhuvfilane na á kulusia undjo uvfungalie faidha ya ekima. ⁴⁶ Ú udha faidha ta dhene á likoli; ka uko kulusia etopa iyo ubhia nao, ka ú likula. ⁴⁷ Bhukota bha ikulu la nguvfa bhu kaamo bhu vfilane na bhokila bhu bha tuwa á obingi la dhene ka bha bhosa tumba djitopa dja titi. ⁴⁸ Dyaa bhugwali bhuidjale na titi, bha bhangia bha bhulutuwe; ka na dyaa bhagwali bha djumane an'bhongo, bha avfisie á bhi kemo iyo iekima, ka bha túú iyo i ya ebhibhi. ⁴⁹ I gwali namuna tomoi á tútútú wa kisi: bhatambia bha idjie iko ka kanusia bhakali na bhaa bha endjini, ⁵⁰ Ka bhabha kulie á litshia la isala la likali, dyaa igwali na lilila ka na imata manyo. ⁵¹ Nu djibha bhima bhio bhitopa? tudjibha bha kpetania. ⁵² Ka abha sowa: na eyo, nkpaluwa ntopa undjo ú gulusiana na iyo i ebhone bhukota bha ikulu la nguvfa ú nvfilane na mukuwa yavfulu undjo ú bhie á lito lese bhima bha bhasi ka na bhima bha ngbe. ⁵³ Dyaa Yesu ú mala mbendo djio, á esa dyaa. ⁵⁴ Na ikena angese na etuko, ubha gulusia á Sinagogi namuna taa bhaa bhubha bhane moke bhu sangala ka bhuvfia: bhutumba ka bhikako bhino bha midjila nia? ⁵⁵ Indjese mona wa muselemala? koko Malia undjo ú nyinya wese? Yakobho, Yosefu, Simoni ka Yudha, bhandje abho bha wanyinya bhese? ⁵⁶ Ka bhasali bhese bhandje abho bhatopa angasu? bhima bhima bhitopa bhino bha midjila kotio niya? ⁵⁷ Ka ubhia angbho likia la ikuwa. Nge Yesu abhasowa: nkanga andjese na esima á etuko yese ka na á bhwandja bhese. ⁵⁸ Ka sa kiese bhakako bhigi á egula eyo, naisowa la ikanda labho la idjelia.