¹ A evfumbu iyo, Yesu utavfana mabhuki ma ngano bhusi bha sabhato. Bhatende bhese bha bhubhia na egwa, bha andja ikola ngano ka na idhia. ² Bha Falisayo, bha ena eto bhan'sowa: ena, bhatende bhai bhakia iyo indyese élúúsiané ta bhaa kiü bhusi bha sabhato. ³ Nge Yesu abha manyula: nusome mwa anu iyo Davidi ukia, dyaa ubhia na egwa, idji ka na bha ubhia nabho; ⁴ Namuna ya nia ulumila á yavfulu ya Mbali ka á dhia mekati ma ivfanisia, miyo sabhiese na lúúsa la idhia, mbese ku anga bhaa bhu bhia nana, ka miyo nu bhia mi avfisiane dyulu la bhakoli bhakulu bhaao? ⁵ Ao, nubhia, anu bhasome selia iyo, masi ma sabhato, bha koli bhu luvfa an'bhongo wa selia á yavfulu ya Mbali, mbese i ukumiana? ⁶ Ngo, yanesowa nuwe, idyano na ema ya dhene iyeta yavfulu ya Mbali. ⁷ Ani nubha bha djibhe màána ma: ina kulu wa bhukuku ka mbese sadhaka, ambha nu okumu anu bhaa bha kuabho éma. ⁸ Ngo mona wa mushe ú Bhwáná wa sabhato. ⁹ Na iésa dyaa, Yesu á tangana á Sinagogi. ¹⁰ Ka enai, úgboka á semele na Sinagogi mushe undjo ubhia obho muome. bhu miya Yesu: i iluusiane ibhikisia bhushe masi ma sabhato? Ibhia dyulu la inesitaka. ¹¹ A bha kpetania: neni anganu, ani ú na mokoko tomoi ka úkúú asemele na litshiya bhusi bha sabhato, andje n'dunguese na inem'bhiya? ¹² Mingo imbani mushe ú miti mokoko na enu! Ivfele kotiyo i lúúsiane ikia ekima masi ma sabhato. ¹³ Ngo uvfia na mushe na mushe undjo: nanula obho wai á únanula ka wa owa toku ú womo. ¹⁴ Bha Falisayo bha vfunduwa, bha iya naka dyulu la namuna ya ine mula. ¹⁵ nge Yesu, na idjibha, á kena dhomu na egula eyo. Dyombo ta dhene la mika. A bhikisia bhushe bhatopa bha ndutu, ¹⁶ Ka ubha lúúsia ta mbese ibho idji bhisia na mushe, ¹⁷ Ambusa ta iakisiana iyo ibhia ekokoliane na Isaya, n'kanga: ¹⁸ Úno ú nkambia wami undjo iminula, muondusia wanu wan'kima undjo mupumatima wami ú munda. Iavfisie mpumatima wami angese, ka ú kokolie bhu endjini á bhikita. ¹⁹ Andje túúese nganyi, andje vfamiese, ka mushe andje okiese dyoi lese á paki. ²⁰ Andje bhunuese nyasi djio dji onana, na andje limiese lotambi luo lu bhieye n'nolio, mpaka dyaa bhu endjini bhu tokiye. ²¹ Ka bhikita bhi kpalie á linya lese. ²² Ngo bhun'disilia mushe wa mipumatima wa sulu na bhutiti ka moluma, ka am'bhikisia namuna taa moluma uvfia ka úéna. ²³ Dyombo litopa lio libhia lisangale ivfia; mbese undjo mona wa Dhawidi? ²⁴ Bha Falisayo, na iyoka eyo, bhuvfia: mushe uno ú sagie bhagu na ndumanga wa bhagu Bhelezebula, n'dumanga wa mipumatima ma sulu. ²⁵ Toku Yesu udjibha mawazo mabho, á bhasowa: bhukota bhutopa bhuo bhu bhukande iyokana bhundje gwaliese, ka ndei ya dhene ao yavfulu etopa iyo ikandi iyokana indje temiese. ²⁶ Ani mugu an'saga mugu, adji vfakania idji mukulu aao; bhukota bhese bhutemie kotiyo titani? ²⁷ Ka ani emi, ya saga bhagu na bheleze bhula, bhana bhanu bha sagi na neni? na dyito, bha gwalie bhatumba bhanu. Nge, ani i na mpumatima wa Mbali uwo ya saga bhagu, bhukota bha Mbali bhu kotiyo bhu idje anganu. ²⁸ Nge, ani i na mpumatima wa Mbali iyo ésagi nao bhagu bhukota bha Mbali bhu kotiyo bhu idje anganu. ²⁹ Ao, namuna yania mushe upasi ilumila á yavfulu ya mushe wa lokulu ka na iaga bhima bhese, mbese sa mune sangake mushe wa lokulu undjo? ngo aagi ese kubhio bhi á yavfulu ese. ³⁰ Undjo andjese nami andji indundu ese, ka undjo andjese mu sangane nami á esi anganu. ³¹ Na eto yanesowa nuwe: djambi djitopa ka na ise saka litopa igwali na bhukuku anga bhushe, nge isesaka mpumatima wa kengo indje gwaliese na bhukuku taa bhwa. ³² Undjo ú vfie ebhibhi ikulu la mona wa mushe, úgwali na bhukuku; nge undjo uvfie ebhibhi na mpumatima wa kengo, andji gwaliese na bhukuku á edjo ino na á bhidjo bhio bhi ekie. ³³ Ao djibhai eti ya ekima ka na lupuma lese la lukima; ao djibhai eti ya ebhibhi ka na lopuma lese la lubhibhi; ngo bha djibhi eti na lopuma lese. ³⁴ Nue libhoti la nyili, namuna ya nia nupasi ivfia bhima bha bhikima, bha kali toku nu eto? ngo inai djala la mpumatima lio anyuwa ú vfie. ³⁵ Mushe wan'kima úbhie bhima bha bhikima á lito lese, ka mushe wan'kali ubhie bhima bha bhibhi á lito lese la libhibhi. ³⁶ Yane sowa nuwe: bhusi bha ukumu, bhushe bha sumulu bhio mavfia ma mbese enu maa bhuvfia. ³⁷ Ngo na mavfia mai ogwali musambisiane, ka na mavfia mai ogwali mu okumuane. ³⁸ Ngo bhaamo bha kpalua ka na bha Falisayo bha geya livfia, ka bhuvfia: mweli, tu bhaonda tune eni ikia ekako. ³⁹ A bha manyula: ngei ya ekali ka na ya makanyi ya vfema ekako; bhandje patiabho ekako iyomo ku iyoku iyo ya n'kanga Yona. ⁴⁰ Ngo, namuna temoi iyo Yona ukia masi ta masaso ka matrio ta masaso á semele na lila la ntitiwa dhene, i namuna ku emoi mona wa mushe ugwali masi ta masaso ka matio ta masaso á semele na misia. ⁴¹ Bhushe bha Niniwe bhatemie bhusi bha okumu, na ngei iyo ka bha ukumuanie mungusa bha dji bhasie na itikila djambi áikokolia la Yona; ka enai, idyano na undjo ú mitiye Yona. ⁴² Ma kia ma kusini ú temie, á bhusi bha ukumu, na nge i iyo ka ú ukumuanie, mungusa ú idja á mibhongo ma kisi dyulu la ikooka bhutumba bha Salomono, ka enai, i iyano na undjo ú mitie Salomono. ⁴³ Dyaa mpumatima wa silu ú vfundua anga mushe, wa kena á bhigula bha mbese malivfa, ivfungala iyama, ka si patika mese. ⁴⁴ Ngo wa vfia: ekpudhue á semele na ya vfulu yami dyaa ivfunduwa; ka, dyaa ukiana, úgboka mbese ema á semele, iyoluluane ka epambane. ⁴⁵ A kena, ka ageya kaamo mipumatima sabha ma mikali inemita; bha tangana á yavfulu, bha djumana, ka hali ya mushe undjo ya bhitakala iyeta ya pikilie. Egwali namuna ku temoi á ngei iyo ya ekali. ⁴⁶ Toku Yesu ubha su ku nevfia kaamo na dyombo, ena, nyinya ese ka na bha monima ivfia nana. ⁴⁷ Mushe tomoi ansowa: ena, ano ka na bhawano bha abhovfo, ka bha vfungalie ivfia nai. ⁴⁸ Nge Yesu an'kpetania undjo úkon'sowa: aye neni, ka bhamonima bhaneni? ⁴⁹ Ambusa, ávfia: uno ú adye ka bhano bha bhamonima. ⁵⁰ Ngo, undjo úkúe bhu ondusia bha Tita undjo ú ikulu la nguvfa, undjo ú monima, ka ú n'sali wami, ka ú adye.