¹ Enyuma ly'aho,N'nakasane achiri chishoga bandi baganda makumi gal'inda,anabarhuma babirhi babirhi bamushokoler'omu biahagala byoshi na ngasi hoshi yen'aligwasirw'aje. ² Ababwir'erhi:Emwaka yokuyimbul'eri minji, ch'abakozi bali batya.Intyo muhunag'omukulu w'emiaka arhum'abakozi omu miaka yage. ³ Gendi;alaga,nmurhumire nka banabuzi omu kagarhi k'ensimba. ⁴ Murhahekaga bivumba,erhi nshoho,erhi birato,murhanalamusagya muntu yesh'omu njira. ⁵ Ngasi nyumpa mwanaje mwo,munarhangi derha ntya:Omurhula gub'okweyi nyumpa! ⁶ Nank'omwo mwakaba muli omwana w'o murhula,omurhula gwinyu gunadekerer'enjanja lyage;nabuzira ntyo,gwanamugaka kwo. ⁷ Munaber'omweyo nyumpa,muka lya,munaka nyw'ebi bakabaha;buly'omukozi ashinganin'okukamarha.Murhajaga nyump'oku yindi. ⁸ Omu ngasi chishagala mwanaje mwo,bakamuyankirira,munaly'ebi bamurheganyize, ⁹ munafumy'abalwala bamuli,munababwire:Obwami bwa N'namahanga bumuyegerire. ¹⁰ Ch'omu ngasi chishagala mwanaje mwo,nka barhamuyankiriri,munaj'omu njira za cho,munaderhe ntya: ¹¹ Rhugukumwire chir'oluvu lw'echigala chinyu lw'ali nanir'oku nshando zirhu rhumusigire lwo;chikoki muna manyag'ok'obwami bwa N'namahanga buyegerire. ¹² Nmubwizire ok'olwo lusiku Sodoma ayishi babalirwa kulush'echo chishagala. ¹³ Obuhanya e'mwawe,Chorozani!obuhany'emwawe,Betisayida!bulya,e'bisomerine byajirikanag'emwinyu bichijirikanag'e Tiri n'e Sidonia,rhinga mira bagokolaga,banarhol'ama saki n'oluvu. ¹⁴ Cho chirhumire,olusiku lw'okutw'olubanja,Tira na Sidonia bayishi babalirwa kubalusha. ¹⁵ Nawe,kapernaumu,wayinamulagwa kuhik'omumalunga,wayishi honolwa kuhik'omu nshinda y'abafwire. ¹⁶ Nasi obayunva erhi ny'ayunvirhe,na ngasi obakabulir'erhi ny'akabulire;na ngasi onkabulira erh'akabulir'owantumaga. ¹⁷ Balya makumi gal'inda bagaluka n'omushingwe,baderha mpu:N'nahamwirhu,chiru n'abazimu barhukenzire erh'izino lyawe lirhuma. ¹⁸ Yesu ababwir'erhi:Nalanguzize shetani ahon'emalunga nka mulazo. ¹⁹ Lolagi,nabahir'obuhashe bwokulabarh'enjoka n'empirhi;n'enyanya ly'obuhashe bwoshi bw'omushombanyi;na ntacho chanachi balibuze. ²⁰ Chikwoki,murhashagaluke buly'abazimu bamukenzire;chi mushagaluke buly'amazino ginyu gayandisirw'omu mpingu. ²¹ Honaho,Yesu ayunjuzibw'obushagaluke kugerera Muka Ochire,anaderha ntya:Nkukuzize ,Larha,Muchiza w'empingu n'igulu,bulya kub'ebi wabifulisir'abirhonzi n'abobwenge bwinji,n'okuba wabifulwire oku bana.Nechi,Larha,nkukuzize bulya kwo walonzize ntyo. ²² E'bintu byoshinabihabagwa na Larha,na ntay'oyishi omugala yendi,nkab'ishe,erh'ishe yendi,nkab'omugala n'oy'omugala alonziz'oku mufululira. ²³ Anahindukir'abaganda bage,ababwira bufunda erhi:Iragi ly'amasu gabwin'ebi mugwerhe mwabona! ²⁴ Bulya mubwizir'oku balebi banji na bami bachifinjir'okubon'ebi,barhana bibonaga,bayunvw'ebi mugwerhe mwayunva,barhana biyunvagya. ²⁵ Mulenga muguma w'amarhegeko ayimuka,anabwira Yesu ebwa kumurhangula mpu:Mwalimu,gurhi nakajira lyo nyima akalamu k'ensiku n''amango? ²⁶ Yesu amubwira mpu:Bichi biyandisirw'omu marhegeko?Bichi oka soma mwo? ²⁷ Amushu mpu:oka zigira o'Muchiza,N'namahanga wawe,n'omurhima gwawe gwoshi,n'emisi yawe yoshi,n'entanya zawe zoshi;n'omulungu wawe nkoku ochizira wene. ²⁸ Yesu amubwira,washuzize bwinja;jira ntyo,wabon'akalamu. ²⁹ Chi yehe,okulonz'achikule shonyi,abwira Yesu erhi:N'omulungu wani yendi? ³⁰ Yesu achiri rhol'akanwa,ashuz'erhi:Muntu mugum'arhengag'e Yerusalemu ahonoker'e Yeriko.Arhoger'omu kagarhi k'ebishumusi,byamunyaga ngasi byosh'ali gwerhe,byamushurha,byanachigendera,byamusig'ali obufa. ³¹ Mudahwa muguma,okwiragi ahonok'omweyo njira,erh'abon'oyo muntu ager'olwindi lunda. ³² Mulawi muguma,nay'erh'ahika aho,erh'amubona,achigerera. ³³ Chi Musamaria muguma,abalamaga,erh'aja ho,ayunjula bwonjo erh'amubona. ³⁴ Ayegera,anamushwek'ebironda byage,anabibulagira kw'amavurha n'idivayi;agali mushonez'oku ndogomi yage,amuhek'omu mw'ebigolo,anamuhanda kwo. ³⁵ Erhi bucha,arhenza mafundo gabirhi,agaha n'ebigolo,aderha erhi:Omulange bwinja,na ngasi byoshi wakolesa kulush'ebyo,nakulyula hano ngaluka. ³⁶ Omwabo basharhu ind'obwine nka ye mulungu w'oyo warhogerag'omu kagarhi k'ebishumusi? ³⁷ Olya wamu fwaga bwonjo,kw'oyo mulenga w'amarhegeko ashuzize.NaYesu amubwira mpu:Genda naw'oji jira ntyo. ³⁸ Erhi Yesu ab'ali omunjira b'ona baganda bage,aj'omu lugo luguma,n'omukazi muguma,ye Marta,amuyegerez'omu mwage. ³⁹ Aligwerhe mulumuna wage,ye Mariya,yehe,achitamalir'okumagulu go Muchiza,akayunvirhiz'omwanzi gwage. ⁴⁰ Marta,erh'emikolo minji minji y'omu nyump'emuzonzire,ayegera anaderha erhi:Muchiza,k'ebyo birhakubwiziri gurh'obu mulumuna wani andekir'emikolo niene?Mubwirag'antabale. ⁴¹ O'Muchiza amushuza mpu:Marta,Marta,ogwerhe wachilibuza wanakoyakoya oku bintu binji. ⁴² Chiguma chone chiri cha bulagirire.Mariya anachishozire akantu kinja,arhaka kanyagwa.