¹ Mukundamane, Batcha, mutchi kundamanye, mu lubaa lutet'e honyi; ² e muhondo ely'eteeko lyanyibwe, e muhondo olo lusiku lurenge nga tchihoo, e muhondo e bute bunene bw'Enawetchu bub'eshire, e muhondo lutasa kub'eshira e lusiku lw'e bute bw'Enawetchu. ³ Muhond'Enawetchu, mwabwo mubwoshi mulyi barenbu bw'omwo butala, mwabwo mu mwayilyire e kushingenene kwaye, muhonde e kunalyi; muhonde e burembu; ngaba munga bishibwa e lusku lw'e bute bw'Enawetchu. ⁴ Kwa bushi woyo Gaza ukarekibwa, na woyo Ashkeloni utakaba mwo kandju; ne Ashdodi aka kabulyirwa bure e bishangi by'e mushi, na, Ekroni ukatenzibwa. ⁵ E bwanya bwa bala b'ekere e butambi bw'e musike s'e nyandja, mulala w'e Bakerethi! E mwasi w'Enawetchu ulyi e ndonga senyu, Ee Kanaani, tchiwo tch'e Bafilistini; nyono nyinga kusheresa, kutatchibabaa e mundju ola washiba era ulyi. ⁶ N'etche tchiwo tch'e musike w'e nyanda tchikaba tcha kukesesa, tchikaba mw'e nyumba s'e bangere, n'e bikembe by'e bibusi. ⁷ N'etche tchiwo tch'e musike w'e nyandja tchikaba tchiwo tch'e bandju b'e nyumba ya Yuda bashibaa; eyera yi bakalangira e bikembe byabwo; bakawondjera mwa nyumba sa Ashkeloni e mango m'ewolowolo; kwa bushi Enawetchu, Ongo wabwo, aka b'eshira n'e kualula e bahwekwa babwo. ⁸ Nyono nonvire e ngambo s'e ba Moabu, n'e lupalyi w'e bana ba Amoni, kw'ese ngambo ku bakambir'e bandju banyi, n'e kutchitonga e ndonga s'e nyibibi sabwo. ⁹ Na, nga kubilyi batcha, kw'Enawetchu atetchire, Ongo w'e Israeli. E kunalyi, Moabu angaba nga Sodoma, n'e bana ba Amoni nga Gomora, kukuteta, ''E tchisiki tch'e upupu, n'e bitobo-tobo by'e munyu, bibe wo e siku soshi; e bandju banyi bakashiba baka simbwa mbira, n'e bandju b'e lubaa lwanyi lwashibaa baka batambula.'' ¹⁰ Binera bikabayikira kwa bushi n'e tchirume-rume tchabwo, kwa bushi bakambir'e bandju b'Enawetchu w'e lubaa, n'e kutchikusa e ndonga sabwo. ¹¹ Enawetchu angaba wa kusomesa busibu era balyi, kwa bushi Enawetchu ak'eta kwa businya eyindji myungu yoshi y'omwo butala; n'e bandju baka muamilyisa; ngasi mundju e andju aye, kunokwo, e biwo byoshi by'e lubaa. ¹² Nenyu mu bandju b'e Kushi, muk'etchibwa kwa bupanga bwanyi. ¹³ Ne Ongo ak'emusa e kubwoko kwaye e ndonga s'e lwande lw'e bushoshokero bw'e suba, n'e kusheresa Ashuru; naye akayira Ninawi kuba busha, n'e kuba andju akalyire ng'e rungu. ¹⁴ N'e bikembe by'e nyama bikaondjera mwo, e nyama soshi s'e lubaa, bundi n'e hungwe b'ak'ekala kwa matchwe m'e mgulyiro saye; e mirenge yabwo ik'onvibwa mwa madirisha maye; n'e nyunvi saye sitakaba mwo kandju; kwa bushi abihur'e mikolo y'e mirezi. ¹⁵ Onola yi oyo musi w'e bushaaluke, u musi walamaa n'e mutchula, u musi watetaa mwa mutchima waye, Nyono u nyilyi, Na tchiro kutalyi undji si nyeyine. Na kute wabere utatchilyi mwo kandju, Era andju e kuwondjera e nyama s'omw'e rungu, Na ngasi mundju ola warenga aka sheka, n'e kushaanya e kubwoko kwaye.