¹ E bwanya bw'ola waayisise n'e kubikwa kw'e singa, musi w'e buayise! ² Ata kengaa e murenge; at'emeraa kualukirwa; at'emeraa Enawetchu; Ilyi e kusheerera Ongo waye. ³ E bakulu baye balyi mwanda saye, silyi ngoromora salumba, n'e beshi b'e mandja baye tchulyi tchubwa tch'omw'e rungu tch'e wolo; tchutareka kandju kwoshi kuyika mishangya-shangya. ⁴ E barebi baye balyi bandju babi, batebanyi, e badjindji baye babikir'e singa a andju atchere, bera kuyilyira e teeko e bubi. ⁵ Enawetchu alyi w'e kunalyi, atakayir'e bubi; ngasi mishangya-shangya end'erekana e butchibuse bwaye, tchiro ata tama; si kweyine e mundju ola utalyi w'e kunalyi ata menye e kuba n'e honyi. ⁶ Nakabulyire bure e lubaa, e minara yabwo yitchilyi mwo kandju, e ndjira sabwo sikulu nasisheresise, na kuyika kutctchilyi tchiro n'e mundju muuma wasirenga mwo; e misi yabwo nayisheresise; mutalyi mundju tchiro n'e muuma, na kutalyi e wiker'eye. ⁷ Natetaa, ''E kunalyi ukany'obaa, uk'emera e kualukirwa; ilyi ala en'e kala ata kabulyirwaa bure; ng'okwo bira byoshi nalaanyaa mwa myasi yaye; si kweyine bera kulamukira n'e kusheresa e biyiro byabwo byoshi. ⁸ Batcha, mwere mwanyilyindjira, kw'Enawetchu atetchire, kuyika olo lusiku nyik'emuka kusimba mbira; kwa bushi nalalyire e kukundamanya e lubaa, ilyi nyibuanyanya e mami, ilyi nyibasheshera kwo e butchindjibuse bwanyi; kunoko, e bukalyi bwoshi bw'e bute bwanyi; kwa bushi e butala bwoshi bunga sheresibwa kwa mulyiro w'e luyi lwanyi. ⁹ Kwa bushi, awola u nyika alulyira e lubaa e lubaa e luteto lutchere, ilyi baal'e kubalangira e sina ly'Enawetchu, bamukorere kwa nyifindjo siuma. ¹⁰ Kwa bushi kutenga e tchiwo tchilyi bure n'e nyishi s'e Kushi, bu b'ende banyema e bwondjo, bu balyi, banyere b'e bandju banyi bashandabanaa, bakare e nderekero sanyi. ¹¹ Olo lusiku utak'etchibwa honyi kwa bushi n'e biyiro byawe wanyi yilyiraa; nabushi, awola u nyika kula e bandju bawe b'ende batchitonga n'e kutch'unva, batatchikalaa e kakatchi kawe, tchiro utaka tchilyibuka mwa muruko wanyi utchere. ¹² Si kweyine, nyika reka e bandju banyayisibwaa n'e bakene, na bala balangalyiraa e sina ly'Enawetchu. ¹³ E baeke bashibire mwa Israeli bataka tchiyira mabi, ilyi kutet'ebisha; ilyi enyilyimi sitashingenene sitakatchiba mwa bunu bwabwo; kwa bushi bakalya n'e kuondjera, tchiro kutaba e mundju ola w'e kubashalyimya.'' ¹⁴ Wimbe, U munyere w'e Sayuni, Huta e lukemi u Israeli; Usahaaluke n'e kumwowa kwa mutchima wawe woshi, U munyere w'e Yerusalemu. ¹⁵ Enawetchu akulyire e butchindjibuse bwawe, Akabur'e muhombanyi waw'e mbuwa; Mwami w'e Israeli, kunoko, yi Enawetchu, alyi e kakatchi kawe; Utaka tch'obaa e bubi kandji. ¹⁶ Mw'olo lusiku, Israeli ukabirwa, ''Ut'obwowaa u Sayuni, e mabwoko mawe mata tambukalaa. ¹⁷ Enawetchu, Ongo wawe, alyi e kakatchi kawe, yi w'et'e misi y'e kutchungula; Anga kumwowera kwa bushaaluke bunene, Anga kwikasa ala e bwolo kwa busime bwaye, Anga kushaalukira kwa kwimba. ¹⁸ Nyika kundamanya bala b'ende basinanyira e mukundamano w'e kutchikumba nyono, bala babaa bawe; bu e musiwo wabaa e ndonga sabwo, w'era kuba honyi era balyi. ¹⁹ Lolaa, mwako kashangi nyika lyibusa e bandju bwoshi b'ende bakulyibusa; nanyi nyika fumya ola w'ende wahukumira, nanyi nyika kundamanya ola wakorokanyisibwaa; nayi nyika bayira muta menyekanaa, na bala e honyi sabwo sabaa mwa butala bwoshi. ²⁰ Mwako kashangi mu nyika b'engisa, na nyika bakundamanya; kwa bushi nyika bayira mutabaa bakumenyekana, e kakatchi k'e bandju bwoshi bw'omwo butala, e mango nyika alula e bahweke benyu e muhondo s'e meho menyu, kw'Enawetchu atetchire.