¹ E mwasi w'Enawetchu w'era kumwishira Zefania, mwana wa Kushi, mwana wa Gedalia, mwana wa Amaria, mwana wa Hezekia; mwa siku sa Yosia, mwana wa Amoni, mwami w'e Yuda. ² Nyinga mala e kunalyi e bindju byoshi, bita tchibwonekanaa e ndonga s'e tchiwo, kw'Enawetchu atetchire. ³ Nyinga mala mwenye mundju n'e nyama; nyinga mala e milonge y'omwo tchanya, n'efi s'omwo nyandja, n'e byende byasitasa n'e babi; nanyi nyinga kabulyira bure mwenye mundju, ata bwonekanaa e ndonga s'e buso bw'e tchiwo, kw'Enawetchu atetchire. ⁴ Nanyi nying'e musa e kubwoko kwanyi e ndonga sa Yuda, n'e ndonga s'e bandju bwoshi b'ekere e Yerusalemu; nanyi nyinga kabulyira bure e nyibaa soshi sa Baali, sita bwonekanaa anola, n'ely'e sina ly'e Bakemari alauma n'e badjindi, ⁵ na bala b'ende batchikumba e tchikembe tch'e mbingu e ndonga s'e burafe bw'e nyumba, n'abwo b'ende batchikumba, b'ende balapa e mw'Enawetchu n'e kuhuba kulapa e mwa Milkomu; ⁶ na bala baalukire e nyuma, n'e kureka e kushimba Enawetchu; na bala batashimba Enawetchu, ilyi kumwemera.'' ⁷ Usire e muhondo s'Enawetchu Ongo; kwa bushi e lusiku lw'Enawetchu lulyi ofi; kwa bushi Enawetchu akubur'e lwembo, na atchesise e baenyi baye. ⁸ Na bikaba, mwa kakatchi kw'olo lusiku e lwembo lw'Enawetchu, kukaba kulyibusa e bakulu, n'e bana ba mwami, n'e bandju bwoshi b'ember'e ndjimba s'e tchienyi. ⁹ Na mwa kakatchi kw'olo lusiku nyikasheresa bala bwoshi b'ende bauluka kwa tchisingiti, bala b'ende b'ehusa e nyumba y'enawabwo e bubi n'e butebanyi. ¹⁰ Na mwa kakatchi kw'olo lusiku, kw'Enawetchu atetchire, kukaba e murenge w'e kulyira kutenga mwa lunvi lw'efi, na e tchilyiro tchinene mwa musi wa kabilyi, n'e lusindo lunene kutenga mwa miruko. ¹¹ Batcha, Mulyire, mwabwo mu mwikere mwa Mekteshi, kwa bushi bwoshi e batchimbusi bwoshi basherere; abwo bwoshi b'ende bayira e luwero lw'e milyinga (Oro), baka bulyirwe bure. ¹² E nyuma, bikaba mw'oyo musi, nyika tangula e musi w'e Yerusalemu kw'e tara; nanyi nyika lyibusa e bandju b'ende bateta mwa mitchima yabwo, okwo Enawetchu atakayira e mabuya, ilyi atakayira e mabi. ¹³ Na batcha, e buare bwabwo bukasimbwa mbira, n'e nyumba sabwo sitakaba mu kandju; na batcha, bak'ebaka e nyumba si batak'ekala muse; nabwo bakayinga e mizabibu si bata kamwa kwa divai yase. ¹⁴ Olo lusiku lw'Enawetchu lulyi lukulu lwera lulyi ofi, Lulyi ofi, nalo lweshire fuba-fuba busibu; Kubinalyi, murenge lw'e lusiku lw'Enawetchu; E mundju w'e misi ende alyira kwa malumwa manene eyera. ¹⁵ Olo lusiku lulyi lusiku lwa butchindjibuse, Lusiku lwa kutch'anyisa na kulyibuka, Lusiku lww kusheresa na kutakaba kandju, Lusiku lwa mwisimya na kufufuftchira, Lusiku lwa lwakungu na mwisimya munene. ¹⁶ Lusiku lwa ngoma yinene e ndonga s'e misi y'omwo nyibanda, n'e ndonga s'e minara yirerere. ¹⁷ Nanyi nyikaretera benye mundju e malyibuse, na kuyika bakaenda nga miuta, kwa bayilyilyire Enawetchu e byaa; n'e mikira yabwo ikasheshibwa mwa mukungu, n'e nyama sabwo nga kinyesi. ¹⁸ E faranga sabwo ilyi e milyinga (Oro) sabwo sitakaa kubatchungula olo lusiku lw'e butchindjise bw'Enawetchu; si e tchiwo tchoshi tchika sirera kwa mulyiro kwa mufula waye; kwa bushi aka lyibusa e bandju bwoshi b'ekere mw'e tchine tchiwo, e kunalyi, businda bw'e kusomesa.