¹ Nyitetchire e kulyi mwa kakatchi ka Kristo; ndatetchire bisha; e mianyisa yanyi ika nyamilyisisa mwa kakatchi ka muka mweru. ² Oko nyet'e bute bunene n'e malumwa mala matangawa mwa mutchima wanyi. ³ Kwa bushi nyingemire nyeyine nyilayisibwe n'e kulyikanusibwa ne Kristo kwa bushi ne benye wetchu; e mulaa wanyi kwa bushi n'e mubilyi. ⁴ Abwola bu Baisraeli bala babikirwe nga bana b'e bukuse n'e malaano, bu bekweresibwa e mateeko n'e bukosi e mwa Ongo, n'etchiraane. ⁵ Netchi, ne beshe bu mwa kakatchi kabwo mu Kristo atengaa kwa ndjira y'e mubilyi. Yi ulyi e ndonga s'e myasi yoshi, Ongo, yi wekukusibwa e myaka n'e myaka. Amina. ⁶ Ata kwa e mwasi wa Ongo asherere, kwa bushi bwoshi batalyi ba Israeli, bu be tchibutchi tch'e Israeli. ⁷ Ata bwoshi bu balyi bana ba Ibrahimu; si kweyine mu Isaka e bana bakabalangirwa. ⁸ Kwa bushi ata e bana b'e mubilyi bu balyi bana ba Ongo, si e bana b'etche tchiraane, bu bende baandjibwa nga bana babutchirwe. ⁹ Kwa bushi e mwasi w'etchira ane yi yono, ebye bishangi nyingesha, ne sara angaba er'ete mwana. ¹⁰ Na ata batcha mbanga, si Rebeka naye, ilyi aba eret'esimi kwa mulume muuma, naye yi Isaka, tata wetchu, ¹¹ (kwa bushi e muhondo abwo bana babutchibwe, na tchiro batasa kuyira mwasi mubuya ilti mubi, ilyi e kuhombola kwa Ongo kwimanga, kutabaa kwa bushi n'e biyiro ilyi mikolo si kwa bushi n'e kuhonda kwaye e wabalangira), ¹² Rebeka era kubirwa batcha ne Ongo, "E mukulu akakorera e mwana ilyi e mulumuna." ¹³ Ng'oko byaandjikibwaa, "Nyimusimire Yakobo, si Esau nyimuhombire ilyi nyimulayire." ¹⁴ Na tchwere tchwateta kute? "Ilyi mwa Ongo ilyi e bubi?" Nanga! Tchiro n'ehitcha. ¹⁵ Kwa bushi Ongo abilyire Musa batcha, "Nyinga mugisha oyo nyigishire. ¹⁶ Na nga batcha, ata kwa buashe bwoyo uhondjire, ilyi kwa buashe bwoyo wabilyita busibu; si kwa buashe bwoyo wende wagisha, naye yi Ongo. ¹⁷ Kwa bushi e maandjiko matetchire batcha e ndonga sa Farao, kwa , "Nakwimanzaa kwa bushi nokuno, ilyi nyilosa e misi yanyi e mwawe, ilyi e sina lyanyi lyitongibwa mwa tchiwo tchoshi." ¹⁸ Na batcha, nga kubilyi batcha ilyi nga tchumenyire ebyera, ola Ongo ahondjire kugisha anamugisha, n'ola ahondjire e kuyira musibu ilyi mubi anamuyira musibu ilyi mubi, ng'oko ayiraa Farao. ¹⁹ Na batcha, unga nyibira, "Kute Ongo atchilyi alyibusa? Kwa bushi nde ola unga ala kuyimana n'e kuhonda kwaye?" ²⁰ Nanga! ata batcha, Ee mwenye mundju; woyo unde u wahusa Ongo? Kute! e kandju karemibwaa kanga bira e wakare maa, kute wanyiremaa ilyi wanyi bumbaa batcha? ²¹ Ilyi kute! Ewe kubumba, atet'e buashe kwa burongo, kw'obwo burongo buuma, kwa kandju kauma kabe ka lukengwa, n'e kandji kabe katet'e lukengwa? ²² Na yi nde, nga Ongo , mwa kuhonda kulosa ilyi kwerekana e bute bwaye, kwa kubabalyira kunene, era kuba lushangi nebira bikayi byayirwaa, byera bikuburwe kwa kusheresibwa; ²³ kandji, Ongo ilyi ayikilyisa e bwingi bw'e bukuse bwaye mwa kakatchi k'ebye bikayi kwa lukoo, abumbaa katengera mira, ilyi bibwona ilyi biba n'e bukuse. ²⁴ Tchubano abalangire, ata e bandju b'e Bayahudi beyine, si n'e bandju b'e lubaa nabwo. ²⁵ Ku kulyi ngokula Ongo atetaa mwa tchitabo tcha Hosea, "Nyinga balangira e bandju banyi, bala batabaa bandju banyi," N'emusimwa wanyi, ola utabaa musimwa wanyi. ²⁶ Kandji bingaba e andju ala babirwaa, "Mwabwo mutalyi bandju banyi, na mu mango baka balangirwa bana ba Ongo usene." ²⁷ Isaya naye anyire e murenge waye e ndonga s'e bana b'e Israeli, n'e kuteta, "E muandjo w'e bana b'e Israeli, tchiro angaba alyi nga mishee y'omwo nyandja, baeke mubwo bala bakashiba bu baka tchunguka ilyi kufumisibwa. ²⁸ Kwa bushi, Enawetchu akayikilyisa e mwasi waye e ndonga s'e butala, na yeyine akayiklyisa n'e kutchesa." ²⁹ Kandji ng'oko Isaya atangiraa e kuteta, "Nga Enawetchu w'e lubaa, nga atatchurekeraa e tchibutchi, tchunga bere nga Sodoma, tchunga shushanyisibwe n'e Gomora, byoshi bi basheresi bwaa." ³⁰ Tchwere tchwateta kute kasi? Oko e bandju b'e lubaa, bala btakulyikire e kunalyi, bera kubwona ilyi kuba n'ekunalyi; si kweyine, e kunalyi kulyi kw'e bwemere mwa kakatchi ka Kristo. ³¹ Si Israeli, bu bakulyikiraa e mateeko m'e kunalyi bata yikilyiraa amwo mateeko. ³² Kwa bushi ne tchiye? Kwa bushi bata makulyikiraa kwa ndjira y'e bwemere, si bera kuba nga kwa ndjira y'e biyiro ilyi y'e mikolo. Bera kusitala kw'ely'ekoyi ly'e kusitasa, lyi lyilyi Yesu Kristo. ³³ Ng'oko byaandjikirwe, "Lolaa, nabikire mwa Sayuni ekoyi ly'ekusitasa, n'e tchilyimbi tch'ekukumbaasa. Na ngasi ola uka mwemera ataka lyibuka ilyi kuhangayika."