² Kwa bushi eteeko y'e muka w'e bulamu ulyi mu Kristo Yesu lyinyibikire kuba nyibwookere, n'ekuba bure n'eteeko ly'ebyaa n'e lufu. ³ Kwa bushi, ebye bitangaalyikana kw'eteeko, kwa bushi eteeko lyabaa lyitambukare kwa bushi n'e mubilyi, Ongo, kwa kumutchuma e mwana waye yeyine kwa muanyi ilyi kwa shushanyo y'e mubilyi w'e byaa, na kwa bushi n'e byaa, era kutchindjibusa e byaa mwa mubilyi. ⁴ Ilyi ebyatetchibwaa mwa ma teeko biyikilyira e mwetchu, tchuta tchiendaa mwa kukulyikira e by'e mubilyi, si tchukulyikire e by'e mutchima. ⁵ Kwa bushi bala bende bakulyikira e mubilyi, bende batanya e by'e mubilyi; si bala bende bakulyikira e mutchima bende batanya e by'e mutchima. ⁶ Kwa bushi e kuhonda kw'e mubilyi lulyi lufu; si e nyifindjo s'e mutchima bulyi bwolo. ⁷ Kwa bushi ese nyifindjo s'e mubilyi bulyi buhombanyi e ndonga sa Ongo, kwa bushi sitakengire e mateeko ma Ongo, tchiro sitanga ala kumakenga. ⁸ Abwo bende bashimb'e mubilyi batanga ala kumusimisa Ongo. ⁹ Si kweyine nga e mutchima wa Ongo alyi ilyi ekere mwanda senyu, mwabwo mutatchishimbire e mubilyi; si mukulyikire e mutchima. Si ola mundju woshi ungaba atete e mutchima wa Kristo, oyo mundju ata wa Kristo. ¹⁰ Na e mango Kristo alyi mwanda senyu, e mubilyi wenyu er'afire kwa bushi n'e byaa; si e mitchima yenyu yisene, kwa bushi n'e kunalyi (kwa Ongo). ¹¹ Si kweyine, nga e muka (mweru) w'ola wamwolaa ilyi wakulaa Yesu mwa bafu, ekere mwanda senyu, oyo wakulaa Kristo Yesu mwa kakatchi k'e bafu, angalamya ilyi kutchisa e mibilyi yenyu ilyi mwa shushanyo y'e kufa, kwa muka (mweru) waye ulyi mwa nda senyu. ¹² Na nga, kubilyi batcha, benye wetchu tchulyi mwa mwenda, ata kwa mubilyi, kwa kulama e kukulyikira e by'e mubilyi. ¹³ Kwa bushi, nga tchungalama kwa kukulyikira e by'e mubilyi, muhondjir'e kufa; si ilyi mungetchisa e mikola y'e mubilyi kwa mutchima, mungalama. ¹⁴ Kwa bushi bala bwoshi balongorenwe n'e muka wa Ongo, abwola bu bana ba Ongo. ¹⁵ Kwa bushi mutaangilyiraa e mutchima ilyi muka w'e bukobe, w'ekuret'e bwoba; si mwaangilyire e muka w'e kuyirwa bana, na kw'oyo ku tchwende tchwalyira, 'Aba' ku kuteta 'Tata'. ¹⁶ E muka yeyine ende aamilyisa alauma n'e mitchima yetchu, oko tchubano tchulyi bana ba Ongo. ¹⁷ Na nga tchulyi bana; batcha; tchulyi ba mwimwo; wa Ongo; bala bakema alauma ne Kristo; na batcha, kulyibusibwa alauma naye; ilyi tchuala kweresibwa e ngulu alauma naye. ¹⁸ Kwa bushi nyiandjire e malyibuko ma kano kashangi kwa matalyi kandju, ng'oko obwo bukuse buka funulyibwa ilyi kwerekanyibwa e mwetchu. ¹⁹ Kwa bushi e biremwa byoshi nabye bilanga lyire kwa mulangalyiro munene, e kwerekanyibwa kw'e bana ba Ongo. ²⁰ Kwa bushi e biremwa byoshi nabye, bya bikwaa e masina m'e bitashingenene; ata kwa kuhonda kwabye, si kwa bushi n'ola wabibikaa e masina m'e mulangalyiro; ²¹ kwa bushi ebye biremwa byeyine nabye bikaba bibwoorwe, n'e kukulwa mwa bukobe bw'e busheresi, na ilyi biya ilyi bingira mwa kubwoolwa kw'e bukuse b'e bana ba Ongo. ²² Kwa bushi tchumenyire kwa e biremwa byoshi nabye byende byalyibuka alauma, na byet'e malumwa alauma kuyika batcha. ²³ Ata n'ebye biremwa byeyine, si netchu tchu tchulyi biumbulwa bitanzi by'e mutchima, netchu kunoko tchulyibukire mwa kakatchi k'e bulamu bwetchu, e mango tchwendjire tchwalangalyira e kuyirwa bana, bu bulyi, butchunguke bw'e mubilyi wetchu. ²⁴ Kwa bushi, tchwangukire kwa kulangalyira; si kweyine e kandju kala kabaa kalangalyirwe, ilyi kangabwonekana, kutatchilyi mulangalyiro kandji, nde ola wende walangalyira e kandju kal'ete? ²⁵ Si nga tchungalangalyira e kandju kala tchutalolyire kwo; tchwana kalyindjira kwa bushibilyisi ilyi kwa kulyindjira. ²⁶ Kunoko e muka (wa Ongo) yi wende watchutabala kwa butambukare bwetchu; kwa bushi tchuteshi kwema ng'oko bishingenene; si e muka (wa Ongo) yeyine yi wende watchwemera kwa kulyibuka kutanga ala kutetchibwa. ²⁷ Ne Ongo, yi wende watangula e mitchima, amenyire e nyifindjo y'e mutchima oko alyi; kwa bushi ende emera e batchesibwa baye ng'oko Ongo ahondjire ilyi ng'oko asimire. ²⁸ Netchu, tchumenyire oko mwa kakatchi k'e myasi yoshi Ongo ende ayira e mukolo alauma na bala bamusimire mwa kakatchi k'e kubawa e mabuya; bu balyi; bala babalangirwe kwa kuhonda kwaye. ²⁹ Kwa bushi abwo abaa eshi kutengera mira, era kubahombola kutengera mira bashushane n'e muanyi w'e mwana waye; ilyi yeyine abe mubutchwa wa butanzi mwa kakatchi ka banene. ³⁰ Na bwo ahombolaa kutengera mira; abwola era kuba balangira; na bwo abalangiraa era kuba andjira e kunalyi; na bwo aandjiraa e kunalyi, abwola era kubatonga ilyi kuba kusa. ³¹ Batcha, tchwere tchwateta tchiye a ndonga s'oko? Ongo akaba e lwande lwetchu, nde ola ungaba e ndonga setchu? ³² Ongo atanga ala e kurekerera e mwana waye yeyine; si era kumwana kwa bushi netchu tchubwoshi, kute angayina e kuyikilyisisa e myasi yoshi alauma naye? ³³ Nde ola unga tchitonganya e bahombolwa ba Ongo? Ongo yi wekubaandjira e kunalyi. ³⁴ Nde ola ungabeshira e lubandja lwe butchindjibuse? Kristo Yesu yi wafaa; na batcha; n'e ndonga s'oko; omwokire ilyi afukire mwa kakatchi k'e bafu; naye alyi mwa kuboko kw'e kulyo kwa Ongo; kandji yi wendjire watchwemera. ³⁵ Nde ola unga ala ekutchuberula n'e busime bwa Kristo? kute! ilyi malyibuko, ilyi adha, ilyi businya, ilyi buhunzi (kut'embala), ilyi bisibu, ilyi bupanga? ³⁶ Ng'oko byaandjikirwe; oko; kwa bushi nawe ku tchwendjire tchwetchibwa e mushi woshi; tchwera kuandjibwa nga bibusi bya kunyiyibwa ilyi kushindjibwa. ³⁷ Si kweyine, mw'eye myasi yoshi tchwer'e masibu; n'e ndonga s'e kuyima; e mw'ola wa tchusimaa. ³⁸ Kwa bushi nera nyimenyire e kunalyi oko; tchiro n'e lufu; ilyi e kalamwo; ilyi malaika; ilyi e bet'e buashe; ilyi ebilyi wo; ilyi e bikesha; ilyi e bet'e misi; ³⁹ ilyi e bilyi e ndonga; ilyi e bilyi e masina; ilyi tchindji tchiremwa tchoshi tchitanga ala e kutchuberula ilyi kutchulyikanusa n'e masimane ma Ongo, malyi mwa kakatchi ka Kristo Yesu enawetchu.