¹ Benye wetchu, mutamenyire (kwa nendjire nateta n'ebamenyire e mateeko), kwa e mateeko mende matambul'e mundju nga atchisene? ² Kwa bushi e mukasi w'et'e mulume ahwekirwe n'e mateeko kw'oyo mulume e mango atchisene; si ilyi oyo mulume angafa, era abwoorwe kw'ely'eteeeko ly'e mulume. ³ Na e bishangi byoshi oyo mulume angaba atchisene, nga oyo mukasi angaba n'eundji mulume, abalangirwe tchihungu. Si nga ebawaye angafa, era abwookere, atatchihwekirwe n'ely'eteeko, na batcha atatchilyi tchihungu, ilyi angahwerwa n'eundji mulume. ⁴ Kunoko, benye wetchu, nenyu batcha, mwera mufilyir'emateeko, kwa ndjira y'e mubilyi wa Kristo, ilyi muba bikulo bya undji, oyo w'omwokaa ilyi afukaa kutenga mwa bafu, ilyi tchubutchira Ongo e maree. ⁵ Kwa bushi e mango tchwabaa mwa kuhonda kw'e mubilyi, e nyifindjo s'e byaa, sabaa silyi wo kwa bushi n'e mateeko, ese nyifindjo sibi sendee sayira e mikolo mwa kakatchi k'ebinga ilyi bitera byenyu, kuyika mwera kubutchira e lufu e maree. ⁶ Si batcha, tchwera tchubwoorwe kutenga mwa mateeko, mwera mwafilyire ebye byendee bya tchulwisa, ilyi tchuala kukola mwa kakatchi k'e bubuya bw'e mutchima, ata mwa kulyi kwa mira, kw'e maandjiko. ⁷ Tchwere tchwateta kute? Eteeko tchilyi tchaa? Nanga, tchiro n'ehitcha! Si kweyine, ndanga menyire e tchaa nga ata kw'eteeko; kwa bushi ndanga menyire e kutchaanyira, ng'eteeko lyitate taa kwa utatchaanyiraa. ⁸ Si e tchaa tchera kubwona e andju kwa bushi n'ely'eteeko, lyera kuyira mwanda sanyi ngasi lubero lwa kutchaanyira. Kwa bushi e tchaa busira eteeko etche tchaa tchifire. ⁹ Nanyi nabaa nyisene ilyi nabaa nyilamire butanzi busira eteeko; si e mango ely'eteeko lyeshire, etchaa tchera kufa, nanyi nera kufa alauma natche. ¹⁰ Nera kulola oko ely'eteeko lyiretchire e kalamwo, e mwanyi nyono lyaretchire e lufu. ¹¹ Kwa bushi, e byaa ilyi bibwona e andju kw'ely'eteeko, byera kunyiteba, na e ndonga s'oko byera kunyita. ¹² Na kwa batcha, eteeko lyilyi lyitchere, n'e maanure ma Ongo namwo malyi matchere, ma nalyi m'e kunalyi. ¹³ Na kute! Ebye bilyi bibuya byaretchire e lufu e mwanyi? Nanga, Tchiro n'e hitcha! Si e byaa ilyi bilorekana kuba binalyi byaa e kunalyi, byera kuyira ilyi kureta e lufu mwanda sanyi, kw'eye ndjira ilyi yibuya, kwa bushi n'ely'eteeko e byaa bibwonekane kuba bibi busibu ilyi kulusha. ¹⁴ Kwa bushi tchumenyire kwa eteeko e mutangiro walye alyi mwa mutchima; si nyono nyilyi mundju w'e mubilyi, naulyirwe e masina m'e byaa. ¹⁵ Kwa bushi ndamenyire tchiye nayilyire, kwa bushi ebye nyihondjire, ndabiyira; si ebye nyiayire, binyende nayira. ¹⁶ Si kweyine, ilyi nyingayira ebye ndahondjire e kuyira, nyemere oko ely'eteeko lyilyi ly'e kunalyi. ¹⁷ Na batcha, atatchilyi e mutchima wanyi yi wayir'ebye; si ebye byaa bilyi mwanda sanyi. ¹⁸ Kwa bushi nyimenyire oko mwanda sanyi, ku kuteta, mwanda s'e mubilyi wanyi, mut'ekere e mwasi mubuya; kwa bushi e kuhonda nyihondjire, si e kuyira e hilyi hibuya nda kubwona. ¹⁹ Kwa bushi ebye bibuya nyihonyire, ekuyira ndabiyira; si ebye bibi ndahondjire ilyi ndasimire e kuyira, bi nyende nayira. ²⁰ Na batcha, nga ata ebye ndahondjire e kuyira bi nendjire nayira, ata nyono nyinyi biyilyire, si ebye byaa bilyi mwanda sanyi. ²¹ Batcha, nyilolyire lyin'eteeko, kwa e mwanyi nyi nyihondjir'e kuyira e bilyi bibuya, kwanaba kundji kuuma kubi. ²² Kwa bushi nyishaalukilyire eteeko lya Ongo kwa mundju w'omwo mutchima ilyi w'omwo nda. ²³ Si kweyine mwa binga ilyi bitera byanyi, nyilolyir'eteeko lyilyi bure, lyendjire lyalwa e ndambala n'eteeko ly'e bwenge bwanyi, n'ekuhonda kunyisimba mbira kwa bushi n'elye eteeko ly'e byaa lyilyi mwa binga ilyi bitera byanyi. ²⁴ E bwanya bwanyi, nyono mukene! Nde ukanyifumya n'ono mubilyi w'e lufu? ²⁵ Nyimutongire Ongo, mu Yesu Kristo enawetchu. Na, nga batcha, nyono nyeyine kwa bwenge bwanyi, nyikorere e mateeko ma Ongo, si kwa mubilyi wanyi, nendjire nakorera e mateeko m'e byaa.