¹ Tchwere tchwteta kute? Tchulame mwa mabi ilyi e lukoo luba lunene? ² Nanga! Tchubano tchu tchwafiraa e byaa kute tchungaenderera tchwalama mwa byaa? ³ Mutamenyire kwa tchubwoshi tchu tchwabatisi bwe mwa kakatchi ka Kristo Yesu tchwabatisibwe mwa kakatchi k'e kufa kwaye? ⁴ Na batcha tchwabishirwe alauma naye mwa ndjira y'e bubatiso mwa kakatchi k'e kufa kwaye, ilyi ng'oko Kristo omwokaa kutenga mwa bafu kwa ndjira y'e bukuse bwa tata, na batcha netchu tchuende mwa buyaya bw'e mutchima. ⁵ Kwa bushi ng'oko mwabwere lushangi alauma naye mwa kakatchia k'e lufu lwaye, kunoko mukaba lushangi alauma naye kwa muanyi w'e kwomwoka kwaye. ⁶ Na ilyi mungaba mumenyire ono mwasi, kwa e bulamu bwetchu bwa mira bwalyibusibwe alauma naye, ilyi e mubilyi w'e byaa ualulwa, tchutatchikoreraa e byaa kandji. ⁷ Kwa bushi Yesu Kristo wafaa, aandjilyirwe e kunalyi bure n'e byaa. ⁸ Si kweyine, nga tchwafire alauma ne Kristo, tchwemere kwa tchukalama alauma naye, ⁹ mwa kumenya kwa Kristo, ilyi aba era afukaa ilyi kwomwoka kutenga mwa bafu, ataka tchifa kandji, tchiro n'e lufu lutaka tchimutambula kandji. ¹⁰ Kwa bushi, k'oko kufa kwaye, afiraa e byaa lyiuma yeyine; si oko kulama kwaye, alamire kwa bushi ne Ongo. ¹¹ Nabatcha nenyu, mutchiandje ilyi mutchilole kwa mulyi bafu kwa byaa, na basene e mwa Ongo mwa kakatchi ka Kristo Yesu. ¹² Batcha, e byaa bitatchitambulaa mwanda s'e mibilyi yenyu yende yabwona ilyi kusimbwa n'e lufu, na ekuyika kwa mungakenga e nyifindjo s'oyo mubilyi. ¹³ Na tchiro muta tchihubiraa kwana e binga ilyi bitera byenyu kuba mbenzi sekukorera e byaa; si mutchane mubeyine e mwa Ongo nga bala basene e nyuma s'e kufa, n'ebitera byenyu mubikorese e mwa Ongo nga mbenzi s'e kunalyi. ¹⁴ Kwa bushi e byaa bita tchibatambule mwabwo, kwa bushi mutalyi e masina m'e mateeko, si e masina m'e lukoo lwa Ongo. ¹⁵ Na kute tchushambalae? Tchulame mwa kuyira e byaa kwa bushi tchutalyi e masina m'e mateeko si e masina m'e lukoo? Nanga, tchiro n'e hitcha! ¹⁶ Mutamenyire kwa e mwaye oyo mwanyire e kalamwo kenyu kuba bakosi baye mwa kumukenga, mwera mulyi bakosi baye oyo mukengire, e kumenya kwa e bukosi bw'e byaa bu bwende bwareta e lufu, si ilyi mungakenga Ongo e kumenya kwa e bukosi bw'e bukenge bu bwende bwareta e kunalyi. ¹⁷ Kweyine, Ongo atongibwe, kwa bushi mwabaa bakobe ba byaa, si mwera kukenga kwa mitchima yenyu eye ndjira y'e bwenge mwabikwaa e masina maye. ¹⁸ Na ilyi mwaba mwera mwubwookere, mwera mulyi bure n'e byaa, mwera kuba bakobe ba Ongo b'e kunalyi. ¹⁹ Nyitetchire nga mwenye mundju kwa bushi n'e butambkare bw'e mibilyi yenyu. Kwa bushi, ng'oko mwanaa e binga ilyi bitera byenyu bikoresibwe n'e butambukare n'e buaye, ilyi muala e kuayisa, na batcha kunoko mweraa mwana e binga ilyi bitera byenyu bikoresibwe n'e kunalyi ilyi muala e kutchesibwa. ²⁰ Kwa bushi ilyi mwaba mulyi bakosi b'e byaa, mwabaa mubwookere, mulyi bure n'e kunalyi kwa Ongo. ²¹ Lwembo lutchiye mwabwonaa ilyi mwatolaa ese siku kw'ebye mwendjire mwa kukumanyira batcha? Kwa bushi e businda bw'ebye byoshi lulyi lufu. ²² Si kweyine, batcha kuno mwera mubwoorwe, n'ekuba bure n'e byaa, n'ekuyirwaa bakosi ba Ongo, mwera mwete e lwembo lwenyu, n'olo lwembo ku kutchesibwa, n'e businda bw'oko kutchesibwa kalyi kalamwo k'e myaka n'e myaka. ²³ Kwa bushi e lwembo lw'e byaa lulyi lufu; si e lwembo lwa Ongo kalyi kalamwo k'e myaka n'e myaka mwa kakatchi ka Kristo Yesu Enawetchu.