¹ Benye wetchu, ebye nyihondjire busibu mwa mutchima wanyi, n'e memi manyi, mala nendjire nema Ongo, malyi kwa bushi n'e Bayahudi (ba Israeli), batchunguke. ² Kwa bushi nyibaamilyisise kwa bet'e bushibilyisi e ndonga sa Ongo, si kweyine ata mwa kakatchi k'e lubaa. ³ Kwa bushi, nga bangaba batamenyire e kunalyi kwa Ongo, n'ekuhonda ekuyikilyisa e kunalyi kwabwo beyine, batcha,ilyi bata tchibikire e masina s'e kunalyi kwa O ngo. ⁴ Kwa bushi Kristo yi businda bw'e mateeko, ilyi ngasi ola w'emere aandjirwe e kunalyi. ⁵ Kwa bushi Msa aandjikaa e ndonga s'e kunalyi, kula kutengire oko mateeko, oko, "E mundju woshi ola w'ende wayira batcha, akalama kw'oko." ⁶ Si kweyine oko kunalyi kubwonekene kwa bwemere kutetchire batcha, "Utatetaa mwa mutchima wawe, Nde ola ukeruka kuya e mbingu? (Ilyi, kulyi kumureta Kristo e masina). ⁷ Ilyi, Nde ola ukandaala kuya e kuzimu? (Ilyi, kulyi kumureta Kristo e ndonga kutenga mwa bafu)." ⁸ Si kasi , kute bitetchirwe? "Oyo mwasi alyi ofi nawe, mwa kakatchi k'e bunu bwawe, n'omwo kakatchi k'e mutchima wawe; ku kuteta, ulyi mwasi w'e bwemere u tchweyilyisa ilyi kuhubanganya. ⁹ Kwa bushi, nga ungemera Yesu Kristo mwa bunu bwawe, oko alyi Enawetchwu, n'ekwemera mwa mutchima wawe, oko Ongo amufufulaa mwa bafu, unga fumisibwa ilyi unge chunguka. ¹⁰ Kwa bushi, kwa mutchima wa mundju, kw'e mundju end'emera, kuyika e kuba n'ekunalyi, n'oko bunu kw'e mundju end'emera kuyika abwone e butchunguke. ¹¹ Kwa bushi, e maandjiko matetchire batcha, "Ngasi ola ukemera atakalyibusibwa." ¹² Kwa bushi kutalyi e lubero e kakatchi k'e Muyahudi n'e Muyunani; kwa bushi Ongo alyi enawetchu wa bwoshi, alyi muare e mwa bala bwoshi bende bamubalangira. ¹³ Kwa bushi, ngasi mundju ola uk'emera ilyi kubalangira esins ly'enawetchu, akatchunguka." ¹⁴ Na batcha, kute bende bamubalangira oyo bat'emere? Na kandji, kute banga mwemera oyo batonvire? Kandji kute kute banga munva busirae mwiyilyisa? ¹⁵ Na kandji kute bang'eyilyisa, nga bat'ekererwe e mwiyilyisa? Ng'oko byaandjikirwe, "Kute malyi mabuya e maulu ma bala bende beyilyisa e mwasi w'e mabuya!" ¹⁶ Si kweyine ata bwoshi bu bakengaa e mwasi mubuya. Kwa bushi Isaya atetchire batca, "Enawetchu, nde ola w'emeraa e myasi yetchu? ¹⁷ Na batcha, e bwemere, e mutangiro wabwo kuba kunva; n'e kunva kwende kwesha kwa mwasi wa Kristo! ¹⁸ Si kweyine, nyitetchire batcha, "Kute! Abwola bat'onvaa? Netchi ilyi kubinalyi, bw'onvire. E murenge wabwo beyilyisa walumilyire mwa butala bwoshi. N'e myasi yabwo y'era kuyika e businda bw'e butala." ¹⁹ Si kweyine, nyihubire kuteta, "Kute! e ba Israeli batamenyaa? E butanzi Musa atetchire, "Nyinga babika mw'emufula kwa bandju bala batalyi b'e lubaa, ku Ongo atetchire." Oko kwa lubaa lula lutet'ebwenge, nyinga baayisa. ²⁰ Ne Isaya abaa alyi mw'e bwenge bunene, atetchire batcha, "Nabwonekene nabwo bata nyihondaa, Nera kutchibwonekeresa e mwa bala batanyibusaa." ²¹ Si kweyine, e mwe ba Israeli atetchire batcha, "Kutengera e mushi woshi, nabalambulyire e maboko bano bandjub'ekutonva na batengu."