¹ Batcha, munvilyise okwo Enawetchu atetchire, utchitetere e muhondo s'e ndjulungu, n'e tchu tchulungu tchunvilyise e murenge wawe. ² Munvilyise, mu ndjulungu, e malyibukwo m'Enawetchu, nenyu, mu bibandja by'e butala bimangire; kwa bushi Enawetchu et'e mwasi n'e bandju baye, naye aka anyira n'e Israeli. ³ ''Mu bandju banyi, tchiye naba yilyilyire? Nanyi nabatabamise na mwasi mutchiye? mwamilyise e ndonga sanyi. ⁴ Kwa bushi nakwirusaa kutenga mwa tchiwo tch'e Misri, n'e kukutchungula utenge mwa nyumba y'e bukwobe, nanyi nera kweka Musa, ne Haruni, ne Miriamu, bareng'e muhondo sawe. ⁵ Mu bandju banyi, mukengere kula Balaki mwami w'e Moabu abusaa, n'okwo Balaamu mwana wa Beori ahusaa; mukengere kutengera e Shitimu kuyika e Gilgali, ilyi mumenya e biyiro by'e kunalyi by'Enawetchu.'' ⁶ Tchiye nyimu sheererae Enawetchu natche, n'e kutchikumba e muhondo sa Ongo uly'e ndonga? Kute! Nyimu heerere n'e ndjulo y'e kusiresa, n'e bana b'e ngafu by'a mwaka muuma? ⁷ Kute! Enawetchu anga simisibwa n'e byumbi by'e nganada-busi, ilyi n'e byumbi ekumi by'e nyishi s'e mafuta? Kute! Nyan'e mwana wanyi mubutchwa mutanzi kwa tchaa tchanyi, e mutchwa w'e mubilyi wanyi kwa byaa by'e mutchima wanyi? ⁸ Ee mwenye mundju, akulosise e bilyi bibuya; n'Enawetchu tchiye ahondjire era ulyi, nga e kuyira e kunalyi, n'e kusima e bwondjo, n'e kuenda e kushingenene e muhondo sa Ongo wawe. ⁹ E murenge w'Enawetchu w'endjire walyilyir'e musi, n'e mundju w'e bwenge anga lola kw'e sina lyawe; munvilyise akwo kahunya-hunya n'oyo w'endjire wamulaanya. ¹⁰ Kute! Kuyika batcha e mwakwo w'e bubi utchilyi mwa nyumba s'e bandju babi, n'e luero lwandaasibwe, lu lulyi lw'e kuayisa. ¹¹ Kute! Nanaala kuba nyitchere na nyet'e e luero lw'e bwisi, n'e shawo y'e makoyi m'e busito bw'e butebanyi? ¹² Kwa bushi e baare baye b'ehur'e tchirume-rume, na besh'etchiwo b'ehur'e bisha, n'e lulyimi lwabwo lwet'e butebanyi mwa buno bwabwo. ¹³ Batcha, kwa bushi n'okwo, nyono nanyi nakuhutchire kwa tchifundo tchaluma busibu; na kuyilyire kuba busira kandju, kwa bushi n'e byaa byawe. ¹⁴ Ungalya, si kweyine ut'eute; n'e honyi sawe singaba e kakatchi kawe; nawe unga bunga, si kweyine ut'eke kandju kwaoshi n'e bwolo; na ngasi kandju kala uk'eka, nyika katola kwa bupanga. Unga yinga si kweyine utaumbule kandju; ukabirata e mizeituni, si utaka y'akaba e mafuta; n'e mizabibu, si kweyine utamwe kwa divai. ¹⁶ Kwa bushi e mateeko ma Omri mu makengirwe, n'e biyiro byoshi by'e nyumba ya Ahabu, nenyu mwendjire mwaenda mwa mano mabwo; ilyi nyikuyira kutaba na kandju, na besha mwo bangaba ba kushekerwa; nenyu muk'eka e ngambo sira e bandju banyi bakambibwaa.''