¹ Batcha, unga tchikundamanya bikembe bikembe, u munyere w'e bikembe; yi unga mushibilyira; banga huta e mwishi w'e mandja w'e Israeli mw'e tama lyaye kwa katchi. ² Batcha woyo, Betlehemu Efrata, u ulyi muweke mwa kakatchi k'e byumbi by'e yuda; kutenga e mwawe woyo yikanyilukira muuma ukaba mutambusi mwa Israeli; yi e misi yaye yabaa kutengera mira, na mira mira. ³ Kwa bushi n'okwo, akabakula, kuyika e bishangi byaye by'e ulyi n'e malumwa m'e kubuta; amwo mango benye wabwo bakashiba baka alukira e bana b'e Israeli. ⁴ Naye ak'emuka, n'e kulyisa e buso bwaye kwa misi y'Enawetchu, kwa bwami ly'e sina ly'Enawetchu, Ongo waye; nabwo bak'ekala; kwa bushi n'okwo akaba mukulu kyika e businda bw'e butala. ⁵ N'ono mundju akaba mutchula wetchu, e. mango e Mwashuri akaya mwa tchiwo tchetchu, n'e kubirata e nyumba setchu, awola u muka kula balanzi balyinda e ndonga saye, na bakulu bane. ⁶ Nabwo bakasheresa e tchiwo tch'e Ashuru kwa bupanga, n'e tchiwo tch'e Nimrodi mwa nyunvi saye; naye akatchufumya n'e Mwashuri, e mango akaya mwa tchiwo tchetchu, n'e kubirata mwa nyibibi setchu. ⁷ N'e bakashiba ba Yakobo, bakaba e kakatchi ka milala yinene muanyi wa tchime kutenga emw'Enawetchu, muanyi wa mimata mwa bitchi; yi yitalyindjira mundju, ilyi kwilyisisa benye Mundju. ⁸ N'abwo bakashiba ba Yakobo, bakaba e kakatchi ka milala, n'e kakatchi ka nyibaa sinene, muanyi wa ngoromora e kakatchi k'e nyama s'omw'erungu, nga mwana w'e ngoromora, e kakatchi k'e bikembe by'e bibusi, yi, nga arenga e kakatchi kabwo, ende abirata-birata n'e kuberenga-berenga, na tchiro kutalyi ew'e kufuma. ⁹ E kuboko kwawe kwimusibwe e ndonga s'e bahombanyi bawe, n'e bahombanyi bawe bwoshi b'etchibwe bure. ¹⁰ Businda bikaba mw'ese siku, kw'Enawetchu atetchire, nyika kabulyira bure e byesi byawe biteng'e kakatchi kawe, nanyi nyikasheresa e mitchukalyi yawe y'e ndambala. ¹¹ Nanyi nyika kabulyira bure e misi y'e tchiwo tchawe, n'ebisiki byawe byoshi nyika bikumbaasa. ¹² Nanyi nyika kabulyira bure e bulosi, butabaa mwa mabwoko mawe; na tchiro utaka tchiba n'e bandju b'e kulausa. ¹³ Nanyi nyika kabulyira bure e shushanyo sawe n'e ngulyiro sawe, sitenge e kakatchi kawe; na tchiro utaka tchi tchikumba e mikolo y'e mabwoko mawe. ¹⁴ Nanyi nyika kula e maashera menyu, matabaa e kakatchi kenyu; nanyi nyikasheresa e misi yawe. ¹⁵ Nanyi nyika tchiwoola mwa kakatchi k'e bute n'e buthindjibuse e ndonga s'e milala yitonvilyisa.