¹ Si kweyine bikaba mwa siku sa businda, okwo e muruko w'e nyumba y'Enawetchu ukabikwa wimangire e ndonga s'e miruko, nao uk'emusibwa e ndonga s'e miruko; n'e bandju b'e lubaa baka uendera bikembe bikembe. ² N'e milala yingi bakaenda n'e kuteta, ''Mwishe, tchwende e ndonga s'e muruko w'Enawetchu, n'omwo nyumba ya Ongo wa Yakobo; naye anga tchuyilyisa e ndjira saye; netchu tchunga enda mwa myanda yaye; kwa bushi e teeko lyika tenga e Sayuni, n'e mwasi w'Enawetchu uka tenga e Yerusalemu.'' ³ Naye akayira e butchibuse e kakatchi k'e bandju b'e nyibaa sinene, naye aka kalyiyira e nyibaa s'et'e misi silyi bure; nabwo bakayira e mapanga mabwo mabe fuka, n'e mafumwo mabwo mabe ngerembe; e lubaa lutaka tchimusa e bupanga e ndonga s'e lundji lubaa, na tchiro bataka tchiyira e ndambala kandji tchiro n'e hitcha. ⁴ Si kweyine, bak'ekala ngasi mundju e masina s'e muzabibu waye, n'e masina s'e mtini waye; na kuta tchiba e mundju woshi ola uka bwobayisa; kwa bushi e bunu bw'Enawetchu w'e lubaa bu butetchire batcha. ⁵ Kwa bushi e nyibaa soshi sikaenda, ngasi muuma kw'e sina lya ongo waye, netchu tchuka enda kw'e sina ly'Enawetchu, Ongo wetchu, e myaka n'e myaka. ⁶ ''Mw'ese siku,'' kw'Enawetchu atetchire, ''Nyika kundamanya ola w'endjire wahukira, nanyi nyika alula ola wakolokanyisabwaa, n'ola nalyibusaa. ⁷ Nanyi nyikayira ola wahukiraa kuba yi ushibire, n'ola waka bulwaa bure kuba lubaa lwet'e misi, n'Enawetchu aka batambula mwa muruko w'e Sayuni, kutengera kulwarero kuyik'e myaka n'e myaka. ⁸ Nawe, u mnara w'e tchikembe, e muruko w'e banyere b'e Sayuni, uk'eshirwa; na batcha, e buashe butanzi buk'esha, e bwami bw'e munyere w'e Yerusalemu. ⁹ Batcha, kute w'endjire walakanga? Kute! Italyi mwami e mwawe? E mwanusi wawe aterekire? Kuyika w'onva e malumwa nga mukasi walumwa n'e simi e kashangi k'e kubuta? ¹⁰ Ube n'e malumwa, ulyibuke ilyi ubuta, U munyere w'e Sayuni, nga mukasi w'et'e malumwa; kwa bushi n'okwo, batcha, unga tenga mwa musi, nawe ung'ekala mwa mahwa. Ungayika e babeli, eyera yi unga fumisibwa; eyera yi Enawetchu anga kutchungula kutenga mwa mabwoko m'e bahombanyi bawe. ¹¹ Na batcha, e nyibaa sinene singa kundamana e ndonga sawe, n'e kuteta, 'Abikwe mwo e bubi; e meho metchu malole kwa buhunzi bwa Sayuni.' ¹² Si kweyine, beki batamenyire e ndanya s'Enawetchu, na bata menyire eyano lyaye; kwa bushi abakundamanyise nga mifumba mwa nguluba. ¹³ Batcha, wimange, ashebule u munyere w'e Sayuni; kwa bushi nyikayira embe lyawe kuba tchuma, n'e bishando byawe milyinga; nawe uka punda-punda milala yingi, n'e bunguke bwabwo uka bubika mwako e mw'Enawetchu, n'e bikulo byabwo, uka bibika e mw'Enawetchu w'e butala bwoshi,''