¹ Nera kuteta, ''Munyi babalyire munvilyise, mu matchwe ma Yakobo, mu mutambure e nyumba y'e Israeli. Kute! Bita shingenene mwabwo e kumeny'e butchindjibuke?'' ² Nenyu mu mwende mwa aya e mabuya, n'e kusima e mabi; nenyu mu mwende mwakula e bandju kw'e nyiwu sabwo, n'e nyama kwa makinya mabwo. ³ Na batcha, mwende mwala e nyama se bandju banyi, n'e kubakula kw'e nyiwu sabwo, n'e kufuna e makinya mabwo; na batcha, n'e kub'eshanga byande byande nga kuba bika mwa nyungu, na nga nyama mwa nyungu. ⁴ Mu mango bak'ema Enawetchu, naye ataka bw'onva; na batcha, aka babiha e buso bwaye amwo mango, ng'okwo bayiraa e mabi kwa biyiro byabwo. ⁵ Enawetchu atetchire batcha, ''Kwa barebi bala b'endjire boshisa e bandju banyi; nabwo b'endjire baluma kwa meno mabwo, n'e kulyira, 'E bwolo'; na ngasi mundju woshi ola uta bikaa kandju mwa bunu bwabwo, abwola baka muyilyira e ndambala. ⁶ Kwa bushi n'okwo, bukaba butchufu e mwenyu, ilyi muta bwonaa e burebi; kandji ukaba mwisimya e mwenyu, ilyi muta alaa kwana e burebi; n'e suba lyika sukira abwo barebi, n'e mushi ukaba mwerafulu e ndonga sabwo. ⁷ Nabwo b'ende bareba, bakatambukala; na batcha, abwo bwoshi baka bisha e mwonu mabwo; kwa bushi; ''Kutalyi e huso lya Ongo.'' ⁸ Si kweyine nyono, e kunalyi nyihur'e misi kwa Muka w'Enawetchu; nyihur'e butchindjibuse n'e buashe; ilyi nyiyilyisa Ykobo e bubi bwaye, ne Israeli e byaa byaye. ⁹ Munvilyise binera, Mu mulyi matchwe m'e nyumba ya Yakobo, mu mutambure e nyumba ya Israeli, mu muayir'e butchindjibuse, n'e kuteresa e mwanya wa mubuya wa mira. ¹⁰ B'ebakire Sayuni kwa mikira, ne Yerusalemu kwa bubi. ¹¹ E bakulu baye b'ende batchindjibusa ilyi b'eresibwa e bitalyi bibuya, n'e badjindji baye b'ende b'eyilyisa ilyi b'eresibwa kandju karebe, n'e barebi baye b'ende bareba ilyi b'eresibwa e faranga; si kweyine na batcha, banga langalyira Enawetchu, n'e kuteta, ''Kute! Enawetchu atalyi e kakatchi ketchu? kutaly'e mwasi mubi woshi woshi ola unga tchuyikira.'' ¹² Batcha, kwa bushi nenyu, Sayuni ika temibwa ng'okwo ehwa lyende lyatemibwa, ne Yerusalemu yikaba magofu; n'e ndjulungu y'e nyumba yikaba nga andju emukire mw'erungu.