¹ E bwanya bwabwo bala b'ende batchifindja e kuyira e bibi, n'e kuyir'e bibi kwa ndjingo sabwo! Na b'ende babiyira kuyika mishangya shangya, kwa bushi bet'e buashe mwa mabwoko mabwo. ² Nabwo b'ende batch'anyira e mahwa, n'e kumatola; n'e nyumba nase, b'ene sasitola, nabwo b'ende babwonerera e mundju n'e nyumba yaye; n'e kwek'e mundju n'e mwimwo waye. ³ Batcha, kw'Enawetchu atetchire, ''Lolaa, nyihondjir'e kyira bine e ndjonga s'ene ngumwo, yi muta kul'e wosi lyenyu, tchiro mutaende kwa tchirume-rume; kwa bushi kalyi kashangi kabi. ⁴ Olo lusiku baka ana e ngano e ndunga senyun'e kuyir'e mishibwo kwa bute bunene, n'e kuteta, ''Tchubano tchwalyibukire busibu; oyola aalur'e tchitchwe tch'e bandju banyi, ng'okwo anyikulyilyir'ebye! Yi waabilyir'e babi e mahwa metchu. ⁵ Kwa bushi n'okwo, mutakaba n'e mundju ola uka kabule e mulyisi kwa buhonga mwa mukundamano w'Enawetchu. ⁶ Mutayiraa e burebi, ng'okwo b'ende babuyira; bata rebaa binera, e kutetchibwa kutawere. ⁷ Kute! Ono mwasi anga tetchibwa, mu nyumba ya Yakobo, e Muka wa Ongo andaasibwe? Kute! Binera bilyi biyiro byaye? Kute! E myasi yanyi ataba yishinganene e mw'e mundju murembu? ⁸ Si kweyine sine siku mwemukire nga bahombanyi b'e bandju banyi; mwende mwakul'e kotchi lyilyi e ndonga s'e ndjimba s'e bandju barenga kwa bwolo busira kulangalyira e ndambala. ⁹ E bakasi b'e bandju banyi mwaba kabure e mbuwa s'e nyumba sabwo sibuya; e bana babwo batoto mwabanyayir'e bukuse bwanyi e myaka n'e myaka. ¹⁰ Mutenge, mwende, kwa bushi anola ata u e bwolo bwenyu; kwa bushi n'e singa, muka sheresibwa, kwa busheresi bunene busibu. ¹¹ Ilyi e mundju anga enda kwa mutchima w'e bisha, n'e kuteta ebye bisha, e kuteta, ''Nyinga reba e ndonga sawe e myasi y'e mafu n'e bulalwe;'' Oyo mundju angaba murebi wabwo bandju. ¹² E kunalyi nyinga kukundamanya, woyo Yakobo, na mu bwoshi. Busira karinda nyika kundamanya e bashibire bw'omwo Israeli. Nyika babika alauma nga bibusi mwa tchikembe. Nga buso bwa bibusi a andju abwo e kulyira. Bakaumbula e biumbulwa kwa bwingi bw'e bandju. ¹³ Ola w'ende wafuna arengir'e muhondo sabwo e ndonga sabwo, Bera kutchula e andju e kurengera kuyika mwa lunvi, Bera kwiluka e mbuwa eyera; e mwami wabwo naye arengire, era kuba hondorera, n'Enawetchu arengir'e muhondo sabwo.