¹ E bwanya bwanyi! Kwa bushi nyono nyilyi ng'okwola babaa baumbure e biumbulwa by'e bishangi bibuya, nga zabihu s'ende saumbulwa e nyuma s'e kuumbula; si ata bira binga lyibwa; e mutchima wanyi ahondjir'e bifuma by'elyire. ² E mundju ola w'emere Ongo aterekire, ata tchibwonekane mwa tchiwo, na tchiro kutaly'e mundju w'e bwenge mwa bandju; bwoshi b'endjire bahonda kwa banga shesha e mikira; ngasi mundju endjire eya mwenye wabwo mwa kasira. ³ E mabwoko mabwo met'e mabi bamakole kwa bushiru; e mundju mukulu endjir'ema e kumw'ongera, n'e mwishi w'e mandja atchikubur'e kubyaangilyira; e mundju mukulu endjire ateta e bibi bilyi mwa mutchima waye; batcha ku b'ende bayir'ebye alauma. ⁴ E mundju ola ulyi mubuya e kakatchi kabwo kwalyi nga mbigili, n'e mundju ola w'e kuyir'e bibuya e kakatchi kabwo, yi mubi kulush'e lubanda lwihur'e mikere; olo lusiku lw'e balanzi bawe, ku kuteta, e lusiku lw'e kwishirwa kwawe, lwayikire; batcha e kutambukala kwawe kungayika. ⁵ Muta tchikubayiraa mwira wenyu, na muta bikiraa e tchirongosi tchenyu e mulangalyiro; ulange e nyunvi s'e biremberembe by'e bunu bwawe, ilyi tchiro mukawe uwondjere mwa tchifuba tchawe atamenyaa e mwasi. ⁶ Kwa bushi e mwana ende eta eshe e honyi, n'e munyere ola w'ende wabangana n'e nyina; n'e mukasi wa hwelyirwe ola wabangana n'e nasala; e bahombanyi b'e mundju baba bw'omwo nyumba yaye yeyine. ⁷ Si kweyine nyono, nyinga mulangalyira Enawetchu; nyinga lyindjira Ongo w'e butchunguke bwanyi; Ongo wanyi anga ny'unva. ⁸ Utashaalukaa e ndonga sanyi, u muhombanyi wanyi; emango nakumbaere, ninga huba kwimuka; e mango nekere mwa mwisimya, Enawetchu angaba bulangare e mwanyi. ⁹ Nyinga babalyira e butchindjise bw'Enawetchu, kwa bushi namuayisise; kuyika e mango anga nyitetera kwa mwasi wanyi, nyikuyilyira e butchindjibuse; anga nyireta e mbuwa ilyi e bulangare, nanyi ningibwona e kunalyi kwaye. ¹⁰ Mu mango e muhombanyi wanyi anga lola kw'oyo mwasi, n'e honyi singa mubisha, oyo wanyibiraa, ''Ngayi Enawabwo alyi, Ongo wawe?''E meho manyi manga mulola kwo; na batcha anga bira tchibwa nga bihoo by'e ndjira yinene. ¹¹ N'e lusiku lw'e kwibakwa e tchikunguso tchawe! Olo lusiku e lubibi lwawe lukasheeresibwa bure. ¹² Olo lusiku, baka kwishira kutenga e Ashuru n'e misi y'e Misri, n'e kutenga e Misri kuyikaolo lushi, n'e kutenga kw'ene nyandja kuyika kwa indji, n'e kutenga kw'ene ndjulungu kuyika kwa indji. ¹³ Na batcha, e tchiwo tchingaba tchitalyi mwo kandju kwa bushi nabwo balyi mwo, kwa bushi n'e biumbulwa by'e biyiro byabwo. ¹⁴ Lyisa e bandju bawe kwa kahunya-hunya kawe, e tchikembe tch'e mwimwo wawe, omw'erungu, e kakatchi k'e Karmeli; na ubalyise e kakatchi k'e Bashani n'e Gileadi, nga mwa siku sa mira. ¹⁵ Ng'okwo mwa kakatchi k'e siku watengaa mwa tchiwo tch'e Misri, nyinga mulosa eby'e bisomerene. ¹⁶ E nyibaa singa lola, n'e kusomerwa kwa bushi n'e misi yabwo yoshi; baka bika e mabwoko mabwo kwa bunu bwabwo, e matchi mabwo matak'onva. ¹⁷ Bkalamba e mukungu nga ndjoka, nga bindju byaenda kwa tchitaka, kubakatenga e andju batchibishire, n'e kukukumana; bak'esha emw'Enawetchu, Ongo wetchu, kwa bwoba, nabwo bakw'obwowa kwa bushi nawe. ¹⁸ N'nde Ongo ulyi nga woyo, w'e kubabalyira e mabi, n'e kurekerera e bubi e bandju b'e mwimwo wawe bashibire? Atabika e bute bwaye e siku soshi, kwa bushi ende ashaalukira e bwondjo. ¹⁹ Akaaluka n'e kutchubabalyira, akabirata e mabi metchu; nawe uka kabulyira e byaa byabwo byoshi mwa nyandja. ²⁰ Woyo, ukayikilyisisa Yakobo e kulyi kwawe, ne Ibrahimu e bwondjo bwawe, bira walapiraa ba Tata kutengera e siku sa mira.