¹ Era kuba langira abwo ekumi na babilyi, era kubawa e buashe n'e misi e ndonga s'e mbusi soshi n'e kufumya e malwala. ² Era kuba tchuma kwa beyilyise e bwami bwa Ongo, n'e kulamya e balwala. ³ Era kubabira, "Mut'ekaa kandju kwa lubalamwo lwenyu, katchi, ilyi hawo, ilyi ilyi mukati (bilyo), ilyi faranga, ilyi tchiro n'e muuma wenyu ata baa na ndjimba e bilyi. ⁴ Na ngasi nyumba yoshi era mung'engira mwo, mwikale mwo, kuyika mutenge mw'oyo musi. ⁵ Na bala bwoshi bata bamwoere, (ilyi bata baangilyire), e mango mwera mwatenga mw'oyo musi, mukukumule tchiro n'e mukungu ulyi kwa maulu menyu, kuba buamilyisa e ndonga sabwo. ⁶ Bera kuenda, bera kusungula mwa misi, bera kwiyilyisa e mwasi mubuya, n'e kulamya e bandju ngasi andju. ⁷ Ne Herodi mwami, era kunva ngasi mwasi woshi wayilyikanaa, era kuba n'e buba kwa bushi bandju bauma b'endee bateta okwo Yoana Mubatisa yi wafukire kutenga mwa bafu, ⁸ n'e bandji bera kwende bateta okwo Eliya yi welukilyire, n'e bandji bera kuteta okw ngaba muuma mwa barebi ba mira yi w'omwokire. ⁹ Si kweyine, Herodi era kuteta, "Yoana namwishaa etchwe; na yinde ono nendjire n'onva e myasi e ndonga saye?" Era kuhonda e kumulola kwo. ¹⁰ Na ilyi abwo baanda (ilyi ndjumwa) baaluka, bera kubalyikira Yesu byoshi byayilyikanaa; era kubatola n'e kub'eka kw'ewe mwa musi muuma ubalangire Bethsaida. ¹¹ Na ilyi e mukundamano bamenya, bera kumukulyikira, era kubamwoera, era kwend'ateta nabwo e myasi y'e bwami bwa Ongo, era kufumya ilyi kulamya bala bwoshi babaa b'et'e mbuha y'e kulama. ¹² N'esuba lyera kutangira lyandaala; bala baanda baye e kumi na babilyi bera kuya er'alyi bera kumubusa, "Ulae e mukundamano, ilyi baya kwa misi n'e mahwa malyi ofi ofi, ilyi babwona ala baondjera n'e bilyo, kwa bushi ano tchulyi lulyi lukia weyine." ¹³ Era kuba bira, "Mubawe e bilyo," Bera kuteta, "Tchut'ete kandju e nyuma sa mikati etanu n'efi ebilyi, nga tchutayire kuba ulyira bano bandju bwoshi e bilyo." ¹⁴ (Kwa bushi e balume babaa baly'awo, babaa nga byumbi bitanu). Era kubira e baanda baye, "Mwikas'e bandju bwoshi kwa bikanda, ngasi tchikanda bandju makumi matanu." ¹⁵ Bera kuyira batcha, bera kub'ekasa bwoshi. ¹⁶ Era kutola era mikati etanu nesir'efi ebilyi, era kulola e ndonga, e mbingu, era kubilyisha, era kubifunanga, era kuwa e baanda baye baabire e mukundamano. ¹⁷ Bera kulya, bera kwiuta bwoshi; na mwa kakatchi k'e byande byoshi byashibaa, bera kukundamanya bitchilyi e kumi na bibilyi. ¹⁸ Na emango byayikire, Yesu era kuba endjir'ema kw'ewe, e baanda baye babaa balyi alauma naye, era kuba busa, "Kute! E mukundamano endjire ateta okwo nyono nyinde?" ¹⁹ Bera kuhusa, bera kumubira, "Yoana Mubatisa. Si kweyine, e bandji Eliya; n'e bandji b'ende bateta okwo muuma mwa barebi ba mira yi w'omwokire." ²⁰ Era kubabira, "Nenyu mwendjire mwateta okwo nyono nyinde?" Petro era kumuhusa, era kuteta, "Woyo u Kristo wa Ongo." ²¹ Era kubabira, era kubaakanya, okwo batabiraa tchiro n'e mundju oyo mwasi; ²² era kuteta, "Bishingenene e mwana wa Adamu e kubwona e malyibuko manene, n'ekulayirwa n'e bahosi n'e bakulu b'e badjindji n'e baaandjisi, n'e kwitchibwa n'e lusiku lw'e kahatchu angafuka." ²³ Era kubabira bwoshi, "Ngasi mundju ola wahond'e kunyi kulyikira, atchilayire yeyine, atchi betchus'e musalaba waye ngasi lusiku, anyi kulyikire. ²⁴ Kwa bushi, ngasi mundju ola unga honda e kufumya e kalamwo kaye, anga kasheresa. Na ngasi mndju ola ukasheresa e kalamwo kaye kwa bushi nanyi, yi uka kafumya. ²⁵ Kwa bushi, bulyi bunguke butchiye e mw'ola mundju e kubwona e butala bwoshi, si kweyine ilyi anga tchiteresa ilyi kutchi sheresa yeyine? ²⁶ Kwa bushi, ngasi mundju ola unga nyibwonera e honyi nyono n'e myasi yanyi, e mwana w'e mundju (wa Adamu), naye aka mubwonera e honyi oyo mundju, e mango akesha mwa bukuse bwaye n'e bwa Tata n'e bwa malaika batchesibwa. ²⁷ Nenyu nyibabilyire e kunalyi, mulyi bauma mwa bano bemangire anola, bala bataka bwona e lufu tchiro n'e hitcha, kuyika tanga balole kwa bwami bwa Ongo." ²⁸ E nyuma s'eye myasi nga siku munane, Yesu era kutola Petro ne Yoana ne Yakobo, era kwiruka kwa muruko (ndjulungu) kuya kwema. ²⁹ Na mwa kuba alyi mwa kakatchi k'e kwema kwaye, e shushanyo y'e busu bwaye bwera kualuka, e ndjimba saye sera kuba seru, salangala langala. ³⁰ Na lolaa, bandju babilyi babaa b'endjire baanyira naye, nabwo yi Musa ne Eliya; ³¹ bera kubwonekana mwa bukuse (ilyi bulangare), bera kuteta e myasi y'e kufa kwaye okwo angayikilyisa e Yerusalemu. ³² Petro alauma nabwo abaa nabwo, babaa bayimirwe n'e tchulo; si kweyinee mango babere basukire, bera kulola kwa bulangare bwaye, alauma nabwo babilyi babaa bemangire alauma naye. ³³ Na ilyi baba bera batchiberula naye, Petro era kubira Yesu, "Enawetchu, bilyi bibuya tchube anola; na tchuyire bibanda (tchuala) bihatchu; tchibanda tchiuma tchawe woyo, etchindji tcha Musa, n'etchindji tcha Eliya." (Si kweyine, atabaa eshi tchiye atetchire.) ³⁴ Na ilyi aba endjire atet'ebye, kwera kwilukira e lwakungu, lwera kubabika kw'e mwisimya, bera kwobwowa llyi baya mw'oyo mwisimya. ³⁵ E murenge era kutenga mw'oyo mwisimya, era kuteta, "Onola yi mwana wanyi, muhombolwa wanyi, mumunvilyise." ³⁶ Na ilyi oyo murenge amala e kuteta, Yesu era kubwonekana alyi yeyine. Nabwo bera kusira, bata biraa tchiro n'e mundju woshi ebye balolaa kwo. ³⁷ Na ilyi e lusiku lw'e kabilyi lwayika, batengire okwo muruko (ilyi okwo ndjulungu), e mukundamano munene era kubuanana naye. ³⁸ Na lolaa, mundju muuma mwa kakatchi k'e mukundamano, era kwirusa e murenge, era kuteta, "Mwiyilyisa, nyikwemire ulorerese e mwana wanyi; kwa bushi alyi mwana wanyi yeyine. ³⁹ Na loreresaa, e mbusi s'ende samusimba, naye kulyi e bishangi ende ahuta e lukemi; na unawo sana mubika kw'e luungu, n'e kutangira atengwa n'efula (kwa bunu), na batcha ese mbusi sita mureka nga ata kwa kumulyibusa, n'e kutonyola tonyola. ⁴⁰ Nera kwema e baanda bawe basikule, si bata alyire." ⁴¹ Yesu era kuhusa, era kuteta, "Mwabwo mu tchibutchi tchitet'e bwemere, tchibutchi tchabirwe, ning'ekala nenyu na e kubatabala kuyika mangotchi? Reta oyo mwana wawe enera." ⁴² Na ilyi aba eralyi mwa kuya eye Yesu alyi, ese mbusi sera kumbhuta kwa tchitaka, sera kumubika kw'eluungu. Yesu era kukalyiyira eye mbusi yibi, era kufumya e mwana n'e kumualulyira eshe. ⁴³ Bwoshi bera kusomerwa, mwa kulola e bukulu bwa Ongo. Nabwo ilyi baba balyi mwa kusomerwa kwa bushi n'ebye byoshi byayilyikanaa, era kubira e baanda baye, ⁴⁴ "Mubike ene myasi mwa matchi menyu: Kwa bushi e mwana w'e mundju (mwana wa Adamu) angabikwa mwa maboko m'e bandju. ⁴⁵ Si kweyine, bata menyaa oyo mwasi, era kubishibwa e mwabwo, bata umenyaa; bera kwobwowa ekumubusa ku kuteta kute oyo mwasi. ⁴⁶ Bera kutangira babusanya, nde yi ukaba muklu mwa kakatchi kabwo. ⁴⁷ Ne Yesu ilyi amenya e ndanya s'e mitchima yabwo, era kutola e mwana mueke (ilyi e mwana mutoto), era kumubika e butambi saye, ⁴⁸ era kuba bira, "Ola woshi uka'ngilyira e mwana mueke ilyi mutoto ulyi ng'ono okw'e sina lyanyi; any'angilyire nyono; n'ola woshi ukany'angilyira nyono, 'angilyire ola wanyi tchumaa. Kwa bushi ola ulyi mueke e kakatchi kenyu mubwoshi yi ulyi mukulu." ⁴⁹ Yoana era kuhusa, era kumubira, "Mukulu, munene, tchwalolaa e mundju akula e mbusi kw'e sina lyawe, tchwera kumwanza kwa bushi atakulyikirene netchu." ⁵⁰ Yesu era kuba bira, "Kwa bushi; ngasi ola utalyi mubi wenyu ilyi alyi muuma nenyu." ⁵¹ Na ilyi, e siku s'e kwiruka kwaye s'aba sera silyi ofi, era kwerekera e busu bwaye kuya e Yerusalemu; ⁵² era kuvhuma e muanda waye, kuya e muhondo s'e busu saye; bera kuenda, bera kwingira mwa musi w'e Basamaria, ilyi bamukunganyisa e andju. ⁵³ Si kweyine, besh'eye batamwaangilyiraa, kwa bushi abaa erekesis'e busu bwaye, kuya e Yerusalemu. ⁵⁴ E baanda baye Yakobo ne Yoana ilyi balolaa ebye, bera kuteta, "Enawetchu, uhondjire tchweme e mulyiro wandaale kuteng'e mbingu, ubasherese; [ngokula Eilya naye ayiraa]? ⁵⁵ Era kualuka, era kubaakanya. [Era kuteta, "Mutamenyire mutchima mutchiye oyo mulyi nawo]. ⁵⁶ Kwa bushi e mwana wa Adamu (ilyi e mwana w'e mundju) at'eshaa kusheresa e mitchima y'e bandju, si kuyilamya. Bera kuteng'awo, bera kuya mwa undji musi. ⁵⁷ Na ilyi baba bera balyi mwa ndjira, mundju muuma era kumubira, "Nyinga kukulyikira ngasi woshi era ungaya. ⁵⁸ Yesu era kumubira, "E tchubwa tchw'et'e (ilyi tchulyi) mwa nyiutchu, n'e milonge y'omwo tchanya yet'e nyoo, si kweyine e mwana wa Adamu at'ete ala anga ondjesa etchwe lyaye." ⁵⁹ Era kubira eundji, "Nyikulyikira." si oyo mundju era kuteta, "Enawetchu, tanga kunyiwa e luuma, nyitangire kuya kubisha tata." ⁶⁰ Si era kumubira, "Reka e bafu babishe e bafu babwo; si woyo, enda uye kubalyikisa e mwasi w'e bwami bwa Ongo." ⁶¹ Eundji mundju naye era kumubira, "Enawetchu, nyinga kukulyikira; si kweyine utange kunyiwa e luuma, nyiye kulaa e bandju bw'omwo nyumba yanyi." ⁶² Yesu era kumubira, "E mundju woshi, ilyi angabika e kubwoko kwaye kwa kutem'ehwa, nga angahuba kulol'e nyuma, ata shingenene kwa bwami bwa Ongo."